Dan l-artiklu deher fin-Nazzjon tal-Erbgħa 25 ta' Mejju 2016
Madwar ġimgħa u
nofs ilu, assistejna għal Prim Ministru jitkellem fis-Summit Kontra
l-Korruzzjoni. Ma kinetx xi ħaġa tas-soltu. Is-soltu l-Prim Ministru drajnieh
imur fis-summits biex ibiegħ il-passaporti, li issa nafu li anke inxtraw minn
nies korrotti u nies imfittxa mill-Pulizija, u li ħafna minn dawn in-nies anke
ingħatalhom id-dritt tal-vot mingħajr ma jikkwalifikaw għalih. Kienet stramba
li dan l-istess Prim Ministru issa jmur jitkellem kontra l-korruzzjoni.
Aktar minn hekk,
il-Prim Ministru qallhom li jistenna li d-dinja tieħu azzjoni fuq dak li ħareġ
mill-Panama Papers! Imma trid tkun vera ma tistħix biex tkun l-unika Prim
Ministru fl-Unjoni Ewropea li kellek Ministru involut, tkun l-unika Prim
Ministru li għandek Ministru li nqabad jipprova jbellagħha lil banek li hu diġa
kien faddal €6.4 miljun biex meta jiġi biex jiddepożita dak l-ammont ma jiġuhx
b’ħafna mistoqsijiet minn fejn ġew il-flus, u mhux talli ma ħadtx azzjoni,
talli iddefendejtu u tajtu promozzjoni, u mbagħad tmur quddiem id-dinja tgħid
li tistenna li ħaddieħor jieħu azzjoni.
Imma dan hu
l-istess Prim Ministru li fi Frar kien qed jgħidilna li ma jara li hemm xejn
ħażin li Ministru tiegħu fetaħ kumpanija u trust sigrieta fil-Panama waqt li
kien Ministru. Xejn ħażin hux. Kien biss issa li dan l-iskandlu faqqa’
mad-dinja kollha u kulħadd seta’ jara kif kienu r-reazzjonijiet ta’ pajjiżi
normali li l-Prim Ministru beda jdawwar xi ftit id-diska. Għax issa rajna
Ministru jirriżenjaw għax kellhom kumpaniji moħbija qabel ma saru Ministri, u
allura iżjed dehret kunrastanti l-pożizzjoni tal-Prim Ministru Malti li
jiddefendi Ministru li dawn il-kumpaniji fetaħhom l-għada tal-ġurament
tal-ħatra tiegħu.
Imma qalilna li
jiddispjaċieh. “Talabna apoloġija”. U allura suppost ninsew kollox u kollox
jibqa’ għaddej. Għax la qalulna ‘sorry’, ma ġara xejn li pruvaw jiftħu kont
biex idaħħlu mill-inqas miljun fis-sena minn “senseriji” waqt li kienu qed
ibiegħu l-akbar assi tal-pajjiż. U ma ġara xejn li lill-banek kien qed
jgħidilhom li għandu €6.4 miljun x’jitfa’ fil-kont. Jippretendi li ninsew.
Imma la ma tistax
tibqa’ tafda, ma tistax tinsa. Speċjalment meta hi ovvja li Muscat u Mizzi mhux
vera iddispjaċiehom ta’ li għamlu. Iddispjaċiehom biss li inqabdu. U allura,
il-fiduċja li ntilfet issa mhu ser jerġgħu jiksbuha qatt.
Imma l-inkwiet
mhux dan. L-inkwiet hu li minn flok warrbu u ġew investigati mill-Pulizija, kif
kien jiġri kieku konna pajjiż normali, dawn bdew kampanja sistematika ta’ gideb
u tfiegħ ta’ tajn biex mhux biss iħammġu l-Oppożizzjoni u l-membri tagħha, iżda
jħammġu l-politika kollha kemm hi.
L-istrateġija
tal-Gvern hi waħda: li jikkonvinċi lin-nies li l-politika hi maħmuġa, li biex
tkun fil-politika trid tkun korrott, u allura li l-politiċi huma kollha pezza
waħda u dak li qed jagħmlu l-Ministri u d-Deputati ta’ dan il-Gvern huwa
normali.
U din l-istrateġija ilha għaddejja mill-bidu
tal-leġislatura. Pruvaw ibbellgħuhielna:
- li
huwa normali li nies ħbieb tal-Prim Ministru jsiru miljunarju mil-lum
għall-għada;
- li huwa normali li min għandu jagħti t-taxxa u
l-kera lill-Gvern, minflok il-Gvern jiġri warajh biex jitħallas,jispiċċa jtieh
aktar minn €4 miljuni,
- li huwa normali li l-Ombudsman isib li intużaw
metodi qarrieqa fl-applikazzjoni tal-ippjanar tiegħek, u kollox jibqa’ għaddej
qisu qatt ma kien xejn, għax il-file tiegħek jibqa’ għal xhur sħaħ quddiem
il-Prim Ministru “...li jiddeċiedi...”
- li huwa normali li x-xufier tiegħek jispara fuq
in-nies, int tigdeb biex tgħattilu, u l-Prim Ministru jżommok fil-Kabinett;
- li huwa normali li tinsab ħati li sraqt u
xerridt ritratti personali ta’ individwu, u flok titkeċċa, tieħu job minn fuq
dahar il-poplu b’paga ta’ €80,000 u tissejjaħ “Suldat tal-Azzar“.
Ħbieb, importanti li ma nħallux il-Partit Laburista jirnexxi
f’din l-istrateġija maħmuġa li qed tagħmel ħsara kbira lis-sistema politika u
d-demokrazija tagħna. Le, maħniex kollha l-istess.
Le, ħafna minna jekk jiġi Gaffarena quddiemna ma
niffirmawlux biex jieħu €3.5 miljuni minn fuq dahar il-poplu għalxejn.
Le, ħafna minna jekk jiġi tal-Café Premier ma ntuhx ¢4.2
miljuni minn fuq dahar il-poplu flok niġru wara l-flus li l-poplu għandu jieħu
minn għandu.
Le, ħafna minna m’għandniex interess li mmorru niftħu
kontijiet moħbija biex nimlewhom bil-flus minn fuq dahar il-poplu meta nkunu
fil-poter.
Il-politika mihix maħmuġa. Il-politika hija l-futura ta’
uliedna. Il-politika hija l-opportunitajiet ta’ xogħol u ta’ edukazzjoni li ħa
ntuwhom. Il-politika hija s-servizz ta’ saħħa li ħa nsibu meta niġu bżonnu.
Il-politika hija l-futur tal-pensjonijiet tagħna. Il-politika hija kif ħa
nieħdu ħsieb l-ambjent li rridu ngħixu fih. Il-politika hija kif ħa nagħmlu
ġustizzja soċjali mal-batut u l-vulnerabbli.
U għalhekk, ħbieb, hemm bżonn li nkomplu ningħaqdu biex
nerġgħu nagħtu lil pajjiżna politika mibnija fuq il-ġid komuni u l-onesta’,
ħalli pajjiżna jerġa’ jikseb id-dinjita’ li tixraqlu, ir-reputazzjoni li
tixraqlu, u l-Prim Ministru li tassew jixraqlu.
Comments
Post a Comment