Photo from: http://www.independent.com.mt/articles/2018-04-26/local-news/Jason-Micallef-situation-reflects-a-bigger-democratic-problem-V18-selection-committee-members-6736188817
Kultant f’dan il-pajjiż għandna t-tendenza li naqbdu kunċett, u nestenduh daqs li kieku japplika
bl-istess mod għal kulħadd u f’kull każ. Ejja nieħdu per eżempju l-prinċipju
sagrosant tal-libertà tal-espressjoni. F’daqqa
waħda sirna nużaw l-iskuża tal-“libertà tal-espressjoni” dejjem u kullimkien, u b’mod li ma jagħmilx sens.
Din il-ġimgħa kemm online u kemm fuq diversi siti soċjali qamet
kontroversja dwar il-kummenti li għamel Jason Micallef, Chairman
tal-Fondazzjoni Valletta 2018, dakinhar ta’ San Patrizju (17 ta’ Marzu).
Dakinhar, Jason Micallef kien tella’ ritratt ta’ nies jixorbu f’Paceville,
bil-kumment: “The situation is desperate. There is happy people every where you
look.” Din kienet parodija tal-aħħar kelmiet fil-blog tal-ġurnalista Daphne
Caruana Galizia, li ġiet maqtula brutalment fis-16 ta’ Ottubru li għadda.
Ħafna ħassewhom imweġġa’ bi kliem Jason Micallef, u bil-mod kif irredikola
ġurnalista assassinata. Pero’ l-prinċipju ċentrali ta’ din il-kwistjoni mhuwiex
jekk xi ħadd ħassux imweġġa’ jew le. Ħafna xogħlijiet artisti jweġġgħu n-nies,
u l-libertà tal-espressjoni hija appuntu l-libertà li tista’ tweġġa’
(bil-kliem u mhux b’mod fiżiku).
L-argument ċentrali għala ħafna ħassew li dan mhuwiex aġir denju
tac-Chairman tal-V18 huwa għaliex dan il-kliem juri li hu jmur kontra l-valuri
essenzjali Ewropej. Kif jista’, Chairman tal-Fondazzjoni ta’ Belt Kapitali
Ewropea, jirredikola attakk li sar fuq ġurnalista, attakk li sar fuq id-dritt
tagħna tal-informazzjoni, attakk li sar fuq il-libertà tal-espressjoni
innifisha. Huwa dan li jagħmel dak il-lingwaġġ ħażin.
U allura mhux ta’ b’xejn li grupp ta’ kittieba internazzjonali, fosthom
Salman Rushdie, Yann Martell, Ian McEwan u oħrajn, kittieba li jafu bil-fatti
xi tfisser libertà tal-espressjoni għax batew minħabba kitbiethom, talbu lill-Kummissjoni
Ewropea titlob għar-riżenja ta’ Micallef. Ma’ dawn żdiedu 72 Membru
Parlamentari Ewropew. Din il-ġimgħa, ingħaqdet magħhom ittra ta’ aktar minn 100
artist Malti li talbu għar-riżenja tiegħu, u magħhom 24 artist ieħor li beżgħu
juru isimhom. Għax fl-aqwa żmien, ma tistax tikritika lill-Gvern għax
taqlagħha.
Agħar minn hekk, Ulrich Fuchs, il-bniedem li mexxa l-Kumitat li għażel
lill-Belt Valletta bħala Belt Kapitali Ewropea 2018, ukoll ħabbar li ser
jibbojkottja l-attivitajiet kollha tal-V18 “sakemm in-nies li jirrapreżentaw
il-proġett ikomplu jeqirdu l-valuri Ewropej”. Miegħu żdiedet il-belt olandiża
ta’ Leeuwarden-Fryslân, li qed taqsam it-titlu ta’ Belt Kapitali Ewropea 2018
mal-Belt Valletta, li ħabbret li mhux ser tistieden il-Belt għall-attivitajiet
tagħha u mhux ser tattendi dawk ta’ Malta.
Biex tgħaxxaq, din il-ġimgħa, id-Direttur Artistiku ta’ V18 Mario Philip
Azzopardi, parti integrali mill-klikka ta’ Kastilja, ingħaqad ma’ marmalja fuq
il-midja soċjali li nfexxew jgħajjru, jidderogaw, u jxerrdu ritratti ta’
persuni li f’Londra protestaw mal-Prim Ministru Joseph Muscat għax reġa’ mar
ibiegħ il-passaporti. Sal-punt li għajjar lil waħda minnhom “qaħba”. Għax
esprimiet ruħha. Għax kellha l-ardir tipprotesta kontra dak li qed jagħmel
l-Imperatur.
U x’għamlu l-politiċi li lejhom huma kontabbli dawn it-tnejn min-nies,
is-Segretarju Parlamentari Deo Debattista, il-Ministru Owen Bonniċi u l-Prim
Ministru Joseph Muscat? Kollha skużawhom bl-iskuża tal-“libertà tal-espressjoni”.
Imma huwa proprju hawn fejn dawn mhumiex jifhmu li dawn in-nies, magħhom
iġorru kariga. Magħhom iġorru titlu. Magħhom jirrapreżentaw Belt u proġett. U
allura, Jason Micallef u Mario Philip Azzopardi, għandhom kull dritt li bi
kliemhom juruna kemm huma sessisti, kemm huma vulgari, kemm huma ridikoli u
kemm huma injuranti. Imma mhux waqt li magħhom qed iġorru t-titlu tal-Belt
Kapitali tagħna bħalha Belt Ewropea!
It-titlu ta’ Belt Kapitali Ewropea kellha tkun okkażjoni li tgħaqqadna,
okkażjoni li tagħmlilna unur u tagħmilna kburin, u mhux okkażjoni li ġġagħlna
nistħu mal-Ewropa kollha. Mhux okkażjoni fejn niġu mżebilħa u bbojkotjati.
Jekk jogħġobhom, Azzopardi u Micallef, għandhom jagħmlu pjaċir lil
pajjiżna, lil Belt Valletta, u lill-komunità artistika Maltija, u
jwarrbu biex ma tkomplix issir ħsara. Dejjem jekk iħobbu lil pajjiżna. Dejjem
jekk għalihom, Malta l-ewwel u qabel kollox.
Comments
Post a Comment