Sinjura President, għażiż Kap, Segretarju Ġenerali, sħabi Kunsilliera,
Ninsabu fi żmien kruċjali, tliet snin mill-bidu ta' din il-legislatura. Tliet snin li fihom pajjiżna kellu jaffaċja sfidi kbar: ir-riċessjoni internazzjonali, il-prezzijiet taż-żejt, il-prezzijiet tal-ikel u ċereali, il-kriżi fil-Libja...u b'danakollu, iffaċjat b'dan il-maltemp, pajjiżna baqa' b'saħħtu, baqa’ wieħed mill-aqwa pajjiżi ewropej fit-tkabbir ekonomiku, fit-tnaqqis tar-rata tal-qagħad, u fit-trażżin tad-deficit. Waqt li pajjiżi oħra raw miżuri ta' awsterita' u fabbriki jagħlqu, pajjiżna ra aktar investiment, żidiet fit-turiżmu, u fabbriki jespandu.
Importanti għalhekk li din il-ħidma eċċellenti li twettqet, ma nħallux min jitfagħha fid-dell ta' issues oħra. F'dawn l-aħħar xhur, pajjiżna kien ipparalizzat fuq diskussjoni waħda: id-divorzju. Dik l-issue pero' issa ġiet deċiża. Id-deċiżjoni ntefgħet fuq l-elettorat, u l-elettorat ħadha. Issa jekk hemm prinċipju li dal-partit tant iġġieled għalih u tant iddefenda bi ħġaru meta kien mhedded, huwa r-rispett lejn id-demokrazija, u dan għandu jkun il-bażi ta’ kull prinċipju ieħor. Ejja naqtgħu l-lok għal dubji u għal attakki inutli mill-media. Il-Prim Ministru ġa ddikjara li r-rieda tal-poplu sejra titwettaq u li dmir il-Parlament issa huwa li jfassal l-aħjar liġi possibli. B'daqshekk mhux ser inkunu qed immorru kontra l-valur tat-tisħiħ tal-familja, li hija waħda mill-fehmiet bażiċi ta' dan il-Partit. It-tisħiħ tal-familja ma jiddependix mid-dħul jew le tad-divorzju. It-tisħiħ tal-familja jiġi fost oħrajn frott tal-miżuri li ġa daħħal dan il-Gvern fis-settur pubbliku, bħal flexitime, it-tax-breaks lil-ommijiet li jirritornaw fid-dinja tax-xogħol, l-istipendju li beda jingħata lil ħaddiema fuq il-paga minima li jibdew xi kors taħ taħriġ biex isibu xogħol aħjar, it-twessiegħ tal-brackets tal-income tax, il-miżuri li ttieħdu biex jiġu salvati l-postijiet tax-xogħol. Dawn huma l-inizjattivi li dan il-Partit ħa u jrid ikompli jieħu biex verament isaħħaħ u jħares il-familji.
Għal snin twal, in-nies setgħu iserħu moħħhom li l-Partit Nazzjonalista huwa dak il-Partit li jaffaċja l-issues b'mod professjonali u loġiku, li jagħmel l-affarijiet kif għandhom isiru, u li jsib l-aħjar soluzzjonijiet għall-isfidi li jkun qed jaffaċja l-poplu. Ma nistgħux inħallu li din ir-reputazzjoni li bnejna tul tant snin tittappan minn issues oħra li wasal iż-żmien li jiġu affaċjati u li forsi konna qed inħalluhom fil-ġenb. Ma nistgħux per eżempju nibqgħu passivi, meta bil-liġijiet preżenti, għandna lil min qed jirriskja l-ħabs għax ippublika storja fl-ogħla istituzzjoni akkademika ta’ pajjiżna. Ma nistgħux nibqgħu passivi meta għad għandna produzzjonijiet teatrali li jiġu ċċensurati mill-pubbliku adult. Hemm bżonn li bħala Partit fil-Gvern nagħtu iżjed kas tal-problema nazzjonali tal-ilma, u niżviluppaw opportunitajiet ta’ riċerka li jagħmlu l-Universita’ aktar sostenibbli. Fuq kollox, hemm bżonn li nerġgħu niskopru l-proċess ta’ djalogu u konsultazzjoni pubblika, kunċett li kien dal-Partit stess li daħħal f’pajjiżna, iżda li f’ċerti deċiżjonijiet ingħata l-ġenb. Irridu nkunu Partit aktar miftuħ għal ideat ta’ nies ta’ rieda tajba…Partit qrib tan-nies, Partit li jisma’.
Dan huwa mportanti mhux biss għal Partit, imma iżjed u iżjed għal ġid ta’ pajjiżna. Importanti għal pajjiżna, għax l-alternattiva l-oħra, il-Partit li qed jipprova jpinġi lilu nnifsu bħala 'progressiv', jekk tneħħilu l-maskla huwa fil-verita’ alternattiva medjokri. Huwa Partit li l-unika ħaġa ‘progressiva’ li wiegħed s’issa kienet il-'private members bill' fuq id-divorzju. Huwa partit li l-unika ħaġa minn għalih 'progressiva' li wettaq, kienet li ħoloq sezzjoni fi ħdanu għal persuni omosesswwali. Aħna f'dal-partit ma nissegregawx lil min hu differenti...f’dal-partit persuni omosesswali qegħdin hawn magħna f'dal-kunsill ġenerali, qegħdin magħna fil-kunsilli lokali, u qegħdin magħna fil-parlament, u huma stmati daqs kull persuna oħra. Huwa partit li biex ikun populista anke jwiegħed li fejn jidhirlu jmur kontra d-decizjonijiet tal-Qrati. Huwa partit li l-unika policy ekonomika li ppropona kienet is-shift tat-tassazzjoni minn fuq il-produzzjoni għal fuq min ihammeg. Probabli qas induna li din il-policy kienet qed titwettaq mill-gvern sa mil-leġislatura l-oħra, imma fl-istess ħin, dal-Partit tal-‘progressivi’ ried li jerġgħu jiġu ssussidjati l-applikazzjonijiet tal-kostruzzjoni, ried li titnaqqas it-taxxa fuq il-fuel, u jwiegħed li jerġgħu jiġu ssussidjati l-kontijiet tad-dawl u l-ilma. Nixtiequ jgħidilna jien, jekk la l-kostruzzjoni, la l-fuel, u lanqas il-power stations ma huma jħammġu, x'inhu jħammeġ mela? Fejn ser iżid din it-taxxa fuq min iħammeġ? Imma kulmeta xi ħadd azzarda jistaqsieh, wieġeb kif dejjem wieġeb s'issa fuq kull issue li staqsewh fuqha: “Ngħidulkom wara l-elezzjoni”. Grazzi ħafna ħabib...imma bil-futur ta’ pajjiżna aħna ma nilagħbux imħatri, b’pajjiżna aħna ma nagħmlux qabżiet fid-dlam.
Minn dal-Partit in-nies draw jistennew ħafna, għax dal-Partit tahom lura ħafna. Meta n-nies tawh kolonja, dal-Partit tahom lura Stat. Meta n-nies tawh pajjiż imkisser mingħajr rispett lejn id-drittijiet fundamentali tal-bniedem u b’demokrazija mhedda, dal-Partit tahom lura pajjiż modern, ġust, u liberu. Ejja nibqgħu dak il-partit li joffri l-aħjar soluzzjonijiet, partit li jiddjaloga, partit tassew nazzjonalista, għax jagħraf jilħaq l-aspirazzjonijiet tan-nazzjon kollu, u jkompli joffri l-ispazju biex min irid jikber, isib l-opportunitajiet kollha miftuħa quddiemu.
Hello Mark,
ReplyDeleteGhogobni mmens il-mod kif tkellimt fl-ewwel u fl-ahhar parti ta' dan id-diskors.
Nammetti li jiddispjacini li anki inti tispicca tattakka l-partit avversarju bis-soltu mod li kull min imiss mal-partiti jeccella fih, specjalment meta dan ikun f'ambjent fejn kulhadd ikun partiggjan u jaqbel ma dak li qed tghid.
Jiddispjaci li l-PN qed tattakkaw lil JM minhabba li qal li jghid dak li jrid jghid wara l-elezzjoni meta tafu li jekk jghid xi haga llum, facli dak li jghid tuzawh bhala arma kontrih fi zmien sentejn bl-interpretazzjoni partiggjana li kull partit jeccella fiha. Apparti hekk, Lawrence Gonzi stess qal xi haga hekk ftit jiem ilu (insejt fejn ghax kieku nikkwotalek)
Minn naha l-ohra, iva, tassew prosit ghal mod dirett kif tkellimt u waddabt challenge fuq il-partit, specjalment dwar ic-censura. Hadt gost nisimghek tghid li hemm bzonn "nisimghu" iktar.
Nittama li l-partit li minn pajjiz liberu tani partit skjav shih tal-UE, jgharaf ukoll dawn l-aspirazzjonijiet.
Grazzi tal-kummenti tieghek Pawl, napprezza.
ReplyDeleteAttakkajt lil PL u lil JM fuq il-kontradizzjonijiet fil-mod kif qed jitkellmu issa. Jishqu fuq il-'polluters pay' principle, u mbaghad fil-prattika jitkellmu kontra dawn it-tip ta' mizuri. U hemm hafna kontradizzjonijiet ohra li ma stajtx insemmi ghax kont marbut bil-hin: per ezempju l-'living wage' li qed iwieghed lil haddiema, imma lil employers jghidilhom li tkun volontarja.
Jiddispjacini li ghadek thares lejn l-UE bil-vizjoni ta' Sant...ma nahsibx li hija ffurmata minn 27 skjav. Nemmen li ghad fiha hafna burokrazija, u hela ta' finanzi fit-tmexxija taghha, pero nahseb li meta tqis kollox offriet lil pajjizna u lilna hafna opportunitajiet li qatt ma kellna qabel.
Diskors tajjeb ghall-udjenza li kien indirizzat.
ReplyDeleteRigward l-EU sfortunatament Malta ghad ghadna wisq impressjonijiet li hija genna jew infern meta fil-verita' hija triq tan-nofs. Ftit huma dawk in-nies li kienu kapaci jitkellmu fuqa b'mod oggettiv ghax kulhadd jibza li jigi ttimbrat bhala kontra jew favur. L-aghar haga li grat f'dal pajjiz hija li spiccajna li kull min jikkritika lil EU qed jigi ttimbrat li jrid li Malta tohrog mill-EU