Artiklu ppubblikat fil-Mument tal-Ħadd 28 ta' Frar 2021
Hija fin-natura tal-bniedem li jinġarr mal-kurrent; li jagħlaq għajnejh għal dak li hu ħażin sakemm ma jolqotx lilu; li kollox jgħaddi basta mhux wara biebu; li kollox sew sakemm hu qed ipappieha. Jagħmel hekk mhux għax kattiv, jew għax hu bniedem ħażin, imma għax dak ikun l-eħfef mod biex jirnexxielu jkampa mentalment quddiem l-inġustizzji u l-korruzzjoni.
Iżda l-istorja turina li kull darba li nagħmlu hekk inkunu qed inħallsu aħna stess, u uliedna, għall-konsegwenzi li jirriżultaw.
Fil-verità dan mhux xi fenomenu biss li ngħixu hawn Malta.
Fl-aħħar tmien snin nistgħu ngħidu li dan il-fenomenu sar l-ideoloġija u l-programm tal-Partit u l-Gvern Laburista. L-istrateġisti tal-partit qed jagħżlu li jirkbu fuq din id-dgħjufija tal-bniedem – li jsibha aktar faċli jagħlaq għajnejh għall-ħażin milli jkollu l-kuraġġ jiġġilidlu.
Malta b’livell daqshekk baxx ta’ fiduċja
Din hi ideoloġija u programm li daħlu lill-poplu f’waħda mill-akbar kriżijiet politiċi li qatt kellna b’konsegwenzi serji fuq l-ekonomija u l-ħaddiema ta’ pajjiżna. Qatt daqs issa Malta ma kellha livell daqshekk baxx ta’ fiduċja fix-xena Ewropea u internazzjonali. Spiċċajna m’għadniex fdati kif inhu meħtieġ. U l-fiduċja hija l-bażi ta’ kull relazzjoni.
It-traġedja tal-assassinju politiku tal-ġurnalista Daphne Caruana Galizia għadha qed tirbombja bil-kbir f’pajjiżna. Din hi traġedja li seħħet għax il-Gvern Laburista ħoloq l-atmosfera u l-ambjent biex da isseħħ. Bil-provi illum nafu li Daphne kienet qed tikxef korruzzjoni enormi fl-ogħla livelli tal-Gvern Laburista sa mill-bidu tal-amministrazzjoni fl-2013.
Il-Partit Laburista ma għamel xejn biex jevita din l-atmosfera u ambjent ta’ korruzzjoni. Għal kuntrarju ta s-sinjali kollha possibbli li kulħadd jista’ jagħmel li jrid b’impunità sħiħa – nepotiżmu u patrunaġġ bla rażan; ħadd ma jasal imkien jekk mhux tal-Partit, mill-ogħla istituzjonijiet sa l-iċken impieg, inkluż impiegi fittizji biex ma tmurx għax-xogħol; il-meritokrazija intremiet il-baħar; ir-regolamenti spiċċaw lanqas jiswew ħaqq il-karti miktubin fuqhom; Direct Orders bil-miljuni u lil tal-qalba; kuntratti maħduma bizzilla sa minn qabel ma telgħu fil-gvern; l-Awtoritajiet qishom biċċa lastiku jiġġebbdu skont “x’għandhom bżonn tal-qalba”; xiri ta’ voti bi pjaċiri li għalihom iħallas il-poplu bit-taxxi tiegħu.
Din il-ġimgħa wieħed mill-akkużati bil-qtil ta’ Daphne AMMETTA l-akkuża u laħaq ftehim li jagħti informazzjoni dwar reati kriminali oħra, u ħa sentenza ridotta ta’ ħmistax-il sena ħabs. Wasalna biex jittieħdu passi għaliex persuna oħra, Melvyn Theuma, ingħata proklama biex isalva ġidu u kixef dak li kien jaf dwar l-assassinju ta’ Daphne. U wasalna biex Melvyn Theuma jieħu l-proklama għax meta arrestawh inzerta li ma sabx quddiemu l-ispettur “orrajt” li avżawh qabel li kellu jinterrogah. U Melvyn beża’, u qabad jitkellem.
Dan kollu seta’ ġie evitat. Kif? Kieku l-Partit Laburista, Prim Ministru, Ministru u Membri Parlamentari tiegħu, qdew dmirhom u baqgħu leali lejn il-poplu u l-Kostituzzjoni kif ħalfu bil-ġurament meta telgħu fil-gvern. Kieku Joseph Muscat ħa l-passi ovvji dwar Keith Schembri u Konrad Mizzi hekk kif bdew ħerġin il-fatti. Kieku fin-nuqqas ta’ Muscat, dawn il-passi ħaduhom il-Membri Parlamentari Laburisti fil-voti ta’ fiduċja li ttieħdu fil-Parlament. Kieku Edward Scicluna flok għalaq għajnejh għal ħażin biex ma jitlifx il-paga, rabba sinsla u qal “Le”. Kieku dan sar, kieku Malta ma daħlitx fi kriżi. Kieku Malta għadha tgawdi r-reputazzjoni tajba li kellha. Kieku s-servizzi bankarji mhumiex fi kriżi. Kieku maħniex f’riskju ma ngħaddux mill-Moneyval. Kieku eluf ta’ imjpiegi fis-servizzi finanzjarji u l-gaming mhumiex fil-periklu.
U kieku Daphne Caruana Galizia għadha ħajja.
Jien minix wieħed minn dawk li nara kollox ħażin. Nara li qed isiru ħafna ħwejjeġ tajbin ta’ kuljum fis-saħħa, fl-edukazzjoni, fl-infrasttrutura, u f’oqsma oħra. Imma anke dan it-tajjeb qed jiġi infettat u mherri mill-ħażen li tħalla jirrenja bla rażan matul dawn l-aħħar snin. Għax l-għażliet li jsiru mhumiex isiru skont x’jaqbel il-poplu. Skont l-interess tal-ġid komuni. Iżda skont minn fejn dawk tal-qalba ser jagħmlu lira. Jew ewro. F’ċertu każi, anke ħamest elef minnhom kuljum.
Naħdmu favur il-kultura tal-ġid komuni
Dmirna fil-Partit Nazzjonalista hu li naħdmu favur il-kultura tas-sewwa. Favur il-kultura tal-ġid komuni. Hemmhekk igawdi kulħadd, mill-kbir saż-żgħir. U kulħadd ikun jista’ jgħix bis-serħan tal-moħħ li meta ser jiġi bżonn l-istituzzjonijiet, ser isibhom jipproteġuh, hu min hu, u mhux jipproteġu lill-kriminali.
Comments
Post a Comment