Mhux COVID biss...

 Artiklu li deher fil-ħarġa tal-Mument tal-Ħadd 14 ta' Marzu 2021

F’ “L-AQWA ŻMIEN” tikkonfondi liema storja tikkummenta. It-tentazzjoni hi li niffoka fuq l-emerġenza nazzjonali li l-COVID-19 ġabet fuq il-poplu tagħna. Emerġenza li ġiet aggravata bl-inkompetenza politika tal-Gvern ta’ Robert Abela. Iżda, f’dawn l-aħħar ġranet tant seħħew stejjer serji li nħoss li minflok nitkellem biss fuq waħda għandi naqsam magħkom riflessjonijiet  fuq uħud minnhom.

RAĦAL SĦIĦ BIL-ĠUĦ

Il-biċċa l-kbira minna lanqas biss tgħaddilna minn moħħna li f’pajjiżna jista’ hawn min qed ibati l-ġuħ. Fil-verità aktar minn 1500 familja talbu l-għajnuna tal-knejjes parrokkjali biex jgħinuhom jakkwistaw l-ikel għall-familja. Jiġifieri f’Malta, fl-“Aqwa Żmien”, għandna raħal ċkejken sħiħ fejn in-nies ma għandhomx ikel biżżejjed għall-familja u jibagħtu ‘l uliedhom jorqdu bil-ġuħ.

Tul dan ir-Randan il-CARITAS qed tmexxi kampanja ITMA’ U LIBBES. Ilkoll kemm aħna għandna ngħinu. Ikun tajjeb li fil-knisja fejn nattendu inħallu flus, ħwejjeġ tajbin u ikel. Imma l-aħjar ħaġa hi li nagħtu vouchers  jew inċemplu fuq in-numru apposta tal-Caritas għall-familji fil-bżonn:

€11.65 titma tifel/tifla għal ġimgħa (SMS 50619270)

€20 titma’ koppja anzjana għal 5 t’ijiem (ċempel 51002037)

€50 titma’ familja ta’ 4 għal 3 t’ijiem (ċempel 51902072)

Skont l-Uffiċċju Nazzjonali tal-Istatistika fl-2020 kellna kważi 83,000 persuna f’riskju ta’ faqar, waqt li madwar 40,000 persuna qed jgħixu f’kondizzjonijiet serji ta’ deprivazzjoni.

EMERĠENZA NAZZJONALI FIS-SAĦĦA

Is-sħaba sewda ta’ korruzzjoni li figuri ewlenin fi ħdan il-Gvern u l-Partit Laburista tefgħu fuq Malta u fl-aħħar sena, il-Covid-19, tant qatgħulna nifisna li mhux qed jirnexxielna naraw il-problemi fis-saħħa tal-poplu b’mod ċar. Iva, il-mod kif il-Gvern ta’ Robert Abela mexxa fir-rigward tal-pandemija aggrava bil-kbir sitwazzjoni li nibtet f’pajjiżna bħal fid-dinja kollha. Imma sadanitant hemm sitwazzjonijiet oħra li qed iġibu tbatija, inkwiet u tħassib fost eluf ta’ familji, speċjalment dawk milquta minn ċertu mard u kondizzjonijiet. Irrid nuri is-solidarjetà, fost oħrajn, ma’:

• Familji li tilfu qrabathom minħabba l-COVID.

• Dawk li mardu bil-COVID.

• Dawk li jinsabu isolati fl-isptarijiet u djar tal-anzjani.

• Dawk li kellhom l-operazzjonijiet tagħhom posposti.

• Dawk li tnaqsilhom xi servizz bżonnjuż tas-saħħa.

• Dawk li għandhom bżonn il-kemoterapija kontra l-kanċer u qed ikollhom jittalbu għaliha lil Community Chest Fund.

• Dawk li jbatu minn kondizzjonijiet speċjali bħal Cystic Fibrosis – kondizzjoni li Mandy Vella qed tagħmel kampanja importanti dwarha.

Hemm ħafna aktar x’ngħidu. Imma fir-rigward ta’ dawn l-aħħar tnejn ma jistax ikun li l-Gvern ma hux kapaċi jsib is-soluzzjonijiet finanzjarji biex jixtri bi prezzijiet speċjali l-mediċini meħtieġa, anke jekk dawn iqumu flejjes kbar. Ma narax għalfejn għal kura dawn in-nies iridu jittalbu għal karità, meta bi ftit miljuni li ma huma xejn fil-baġit biljunarju tal-Gvern dawn jistgħu jieħdu l-kura bi dritt.

MEXXEJ LABURISTA INKOMPETENTI U PRUŻUNTUŻ

Is-saga ta’ deċiżjonijiet u messaġġi żbaljati li għamlu Robert Abela, sħabu, u l-media Laburista appoġġjata mill-PBS hija fl-għerq tal-emerġenza nazzjonali fis-saħħa li qed naffaċċjaw. Kieku żammejna is-sistema li applikajna fil-bidu tal-pandemija kieku m’aħniex f’din il-kriżi. Minflok, fost ħwejjeġ oħra:

• Għamilna festival biċ-ċikċifogu lejn l-aħħar ta’ Ġunu 2020 biex niċċelebraw “ir-rebħa fuq il-pandemija”;

• Robert Abela ħafer il-multi – dak infurzar!

• Organizzajna parties internazzjonali kbar li pajjiżi oħra irrifjutaw, għax kellna l-“protokols u l-mekkaniżims” ta’ Julia Farrugia f’posthom.

• Ftaħna l-ajruport mingħajr ebda restrizzjonijiet;

• U serraħna moħħ in-nies li l-“mewġ qiegħed biss fil-baħar” u li ser “nitilqu niġru”.

Altru illi Robert Abela, sħabu u l-media Laburista bil-PBS magħha huma responsabbli.

IL-GVERN U L-LABOUR IŻOLATI

Kulħadd illum jinsab vuċi waħda dwar il-bżonn li l-pandemija tiġi miġġielda b’mod effettiv – tobba, nurses, spiżjara, laboratorji, ħaddiema fi sptarijiet u djar tal-anzjani, għaqdiet tal-employers, business, is-soċjetà ċivili, unjons. Imma fuq din ma nisimgħu qatt għaliex hemm ċensura sħiħa mill-PBS.

Issa għax kulħadd qed jikkritika l-imġieba tal-Gvern, f’erbat ijiem inħarġu iżjed multi milli nħarġu fl-erba’ xhur ta’ qabel, mingħajr ma kien għadu nbidel xejn mill-avviżi legali li kien hemm fis-seħħ. Mela allura kellu raġun min kien qed jgħid li ma kienx qed isir infurzar.

Il-Partit Nazzjonalista huwa minn ta’ quddiem favur is-saħħa tal-poplu b’sensiela ta’ proposti dwar x’jista’ jsir biex il-poplu jieħu lura saħħtu u n-normalità għall-ħajja tiegħu. Ibda biex billi l-politiċi jieqfu jindaħlu fuq l-awtoritajiet tas-saħħa, aħseb u ara illi jkeċċu u jagħlqu ħalq l-esperti li jtuhom pariri mediċi li ma jogħġbuhomx!

NAĦSBU FL-ISTUDENTI

Filwaqt li l-iskejjel u l-għalliema qed jagħmlu jistgħu bl-użu tal-internet biex ikomplu jgħallmu lill-istudenti, speċjalment issa li l-iskejjel ser ikunu magħluqin, m’hemmx dubju li l-istudenti – mill-iċken sal-ogħla livell – li inqabdu fil-kriżi tal-pandemija qed isofru konsegwenzi.

Importanti li naħsbu bis-serjetà kif ser norganizzaw miżuri biex, hekk kif il-pandemija tiġi mirbuħa, ngħinu l-istudenti f’kull livell jikkumpensaw dak li tilfu u jirbħu lura l-livelli, l-formazzjoni u t-taħriġ li għandhom dritt għalih.

THEDDIDA GĦAR-REPUBBLIKA

Bħallikieku l-Gvern ta’ Robert Abela m’għandux biżżejjed ma x’hiex iħabbel rasu, sab anke il-ħin biex jhedded li għaqda volontorja Repubblika li jfixkilha serjament fil-ħidma tagħha jekk tkompli bil-kritika politika tagħha kontra l-Gvern.

Din mhix biss theddida għal Repubblika. Din hi theddida għar-repubblika  u għas-soċjetà ċivili kollha. Għax f’Malta għandna diversi NGOs li fejn iħossu l-ħtieġa jagħmlu kampanji ta’ kritika kontra deċiżjonijiet u l-politika tal-Gvern. Din l-Art Ħelwa, Flimkien għal Ambjent Aħjar, Moviment Graffitti – dawn issa ser nhedduhom li ma jibqgħux NGOs jekk jagħmlu xi protesta jew jikkritikaw deċiżjoni tal-Gvern?

Id-dritt ta’ espressjoni u ta’ assoċjazzjoni huwa dritt fundamentali tal-bniedem. Dritt li twelidna bih u ħadd ma għandu għalfejn itihulna, wisq anqas jipprova jeħodulna. 

Iżda akbar ma hi t-theddida għad-demokrazija u l-libertà aktar il-poplu jifhem il-bżonn tal-bidla u ta’ paġna ġdida għal pajjiżna.