Sorry the below post is only available in Maltese. It is the report I presented in the Gudja PN Sectional Committee Annual General Meeting, regarding the work done in the Gudja Local Council. Other similar reports of previous years can be found at http://www.markanthonysammut.com/hidma
Din is-sena, permezz ta’ skema maħruġa mill-Gvern permezz tal-Kunsill Malti għall-Isport, is-Segretarjat Parlamentari għaż-Żgħażagħ u Sport u s-Segretarjat Parlamentari għall-Kunsilli Lokali u Konsultazzjoni Pubblika, il-Kunsill reġa’ ibbenefika minn finanzjament ta’ €2,400 biex komplejna l-attivita’ ta’ After School Sports għat-tfal tal-Primarja, kif ukoll komplejna nifirxu l-attivita’ sportiva anke’ għall-adulti b’korsijiet tal-Aerobika, Pilates u Zumba, b’finanzjament ta’ €480 mill-istess skema. Attivita’ oħra sportivi kienet il-Fun Run li saret bħala parti mill-attivitajiet ta’ Jum il-Gudja, li rat il-parteċipazzjoni ta’ ‘l fuq minn 40 persuna. Għall-ewwel darba saru wkoll sensiela ta’ events sportivi, b’kollaborazzjoni mal-Agones SFC, li kienu jinkludu Trail Run fil-kampanja, Cycling Time-Trial, Night Cross-Country Cycle, u Duathlon, li raw il-parteċipazzjoni ta’ diversi żgħażagħ u adulti anke’ minn barra l-Gudja.
Il-Kunsill Lokali daħal għall-ewwel Public-Private Partnership Agreement minn meta saret ir-riforma tal-Kunsilli Lokali. Dan il-ftehim sar mal-Gudja Utd. FC, u kien jikkonsisti f’għajnuna mill-Kunsill għall-immodernizzar tal-grawnd sintetiku, filwaqt li l-Kunsill ikun jista’ juża’ l-grawnd għal attivitajiet tiegħu.
Ta’ min isemmi li l-Gvern permezz tal-Fond tal-Kawżi Ġusti, ta wkoll għajnuna ta’ €45,000 fl-immodernizzar ta’ dan il-grawnd, u permezz ta’ dan l-istess fond anke’ għen lis-Soċjeta Filarmonika La Stella b’€10,000 fix-xogħlijiet ta’ restawr u immodernizzar li saru fil-Każin.
Il-Kunsill din is-sena reġa’ organizza ġimgħa ta’ attivitajiet biex ifakkar Jum il Gudja, li inkludiet tqassim ta’ kotba lit-tfal, fun run, volleyball tournament, servizz ta’ testijiet mediċi, ħarġa għal Għawdex, wirja tal-karozzi, u wirja ta’ artiġġjanat. Bħalma għamel f’dawn l-aħħar snin, il-Kunsill ħa sehem ukoll fil-Lejla Sajfija b’kollaborazzjoni mal-parroċċa bħala parti minn dawn l-attivitajiet.
Tkompla x-xogħol minn Transport Malta fuq toroq residenzjali u arterjali ġewwa l-Gudja, li din is-sena inkludew Triq Ħal Luqa, Triq Ħal Tarxien, Triq Bur Ġlat u Triq Ġużeppi Gravina. B’hekk mil-lista ta’ toroq residenzjali li kellhom isiru mill-Gvern u Transport Malta jonqos biss Triq Toni Zammit u n-na]a t’isfel ta’ Vjal it-Torri, li skont il-programm ta’ xog]lijiet li kien pjana l-Gvern g]andhom isiru sa Awissu tas-sena d-die]la. Min-naħa tiegħu l-Kunsill lesta x-xogħlijiet fuq Triq l-Awrekarja, Triq il-Palma, Triq Ħal Resqun u Triq William Baker.
Din is-sena rajna wkoll ir-riforma fit-trasport pubbliku. Sfortunatament din ir-riforma għada ma laħqitx l-ambizzjonijiet u l-ħtiġijiet tal-poplu Gudjan, pero’ b’dispjaċir ninnota li l-Kunsill Lokali tagħna ma pparteċipa xejn fil-proċess ta’ konsultazzjoni li sar qabel kif kien fid-dmir li jagħmel. Taħdidiet ma’ Transport Malta, fejn qed inressqu l-ilmenti li kellna mir-residenti u nagħmlu s-suġġerimenti tagħna, għadhom għaddejjin, u ingħatajna kelma li f’Ottubru għandu jibda servizz dirett mill-Gudja u Ħal Għaxaq għall-Belt. Tajjeb li qed inressqu l-ilmenti issa, pero’ kien ikun ħafna aħjar li kieku pparteċipajna fil-proċess mill-bidu.
Il-Gvern kompla jżid l-għajnuna u l-finanzjament lill-Kunsilli Lokali, u permezz tal-Awtorita’ tad-Djar nieda għall-ewwel darba l-iskema “Insaħħu l-Komunita', Riġenerazzjoni fl-Oqsma tal-Binjiet tal-Gvern.” Permezz ta’ din l-iskema, il-Kunsill Lokali ħa jkun qed jirranġa l-inħawi ta’ madwar il-flats fiz-Zona Residenzjali tal-Mitħna, b’investiment mill-Gvern ċentrali ta’ €75,000.
Dan is-sajf, il-Kunsill Lokali, grazzi għas-Sur Stefan Caruana, organizza t-tieni kors tad-Drama għaż-żgħażagħ, li kien tkomplija tal-kors li sar is-sena l-oħra. Dan wassal biex iż-żgħażagħ parteċipanti tellgħu rappreżentazzjoni ġewwa t-Teatru Grieg tal-Ġnien Raymond Caruana. B’hekk filwaqt li noffru alternattiva edukattiva għaż-żgħażagħ, inkunu wkoll qed inqajmu kuxjena kulturali u nużaw parti tal-Ġnien li għal ħafna snin kienet abbandunata.
Dan is-sajf ukoll, fi ħdan il-Kunsill Lokali organizzajt it-tieni proġett għaż-żgħażagħ barra minn xtutna. Wara li s-sena l-oħra grupp ta’ 4 żgħażagħ telgħu għal ġimgħa ġewwa Praga fir-Repubblika Ċeka għal proġett fuq il-Kultura tar-Reliġjonijiet, din is-sena, grupp ta’ 18-il żgħażugħ u żgħażugħa telgħu għal ħdax-il ġurnata ġewwa Dryanovo fil-Bulgarija għal proġett bit-tema “it-Tradizzjoni u l-Modernita’: Pont ta’ Ħbiberija”. Dawn il-proġetti huma uħud mill-opportunitajiet siewja immens li nfetħu għaż-żgħażagħ tagħna grazzi għas-sħubija ta’ pajjiżna fl-Unjoni Ewropeja, u jgħinuhom jiskopru u japprezzaw id-diversita’ kulturali li teżisti fil-pajjiżi ewropej. Għalhekk għandna nibqgħu nagħmlu ħilitna biex naraw li dawn l-opportunitajiet jinħatfu u nagħmlu l-aħjar użu minnhom.
Inġ. Mark Anthony Sammut
B.Eng.(Hons.); DipLCM
Kunsillier Lokali P.N.
30 ta’ Settembru, 2011
Comments
Post a Comment