Din il-ġimgħa kont intervista minn Gabriel Ellul, ġurnalist tal-Media Link. Din l-intervista dehret fin-Nazzjon ta' nhar it-Tlieta 23 ta' Ottubru, fuq is-sit elettroniku maltarightnow.com, kif ukoll fuq Radio 101 u Net TV. Tistgħu taqraw l-intervista hawnhekk (jew tagħfsu hawn għal link oriġinali), jew taraw video tal-parti tal-intervista li xxandret waqt l-aħbarijiet:
Għaż-żagħżugħ Mark Anthony Sammut, kandidat ġdid tal-Partit Nazzjonalista fuq ir-raba' distrett, il-Partit Nazzjonalista huwa dak il-partit li fetaħ il-bibien għal ġenerazzjoni żagħżugħa. Huwa l-partit li tana l-għażla biex inkunu nistgħu nilħqu l-aspirazzjonijiet tagħna.
X'tgħidilna dwarek?
Jiena żagħżugħ ta' 26 sena. F'ħajti nipprova nkun attiv u
enerġetiku ħafna u nipprova nagħti sehmi f'numru kbir ta' għaqdiet u
attivitajiet. Naħdem bħala inġinier ma' kumpanija fil-qasam
tat-telekomunikazzjoni. Gradwajt fl-2008 u bħalissa qed insegwi kors ta'
Masters. Jiena wkoll kunsillier fil-lokalità tiegħi, dik tal-Gudja. Ili
kunsillier għal dawn l-aħħar sitt snin u nofs.
Bħala passatempi nħobb naqra u nsiefer. Inħobb ukoll il-mużika u
filfatt għandi wkoll diploma fil-pjanu. Inħobb ukoll l-isport,
speċjalment il-ġiri u t-triathlon. Se nkun qed nikkontesta l-elezzjoni
ġenerali li jmiss, bħala kandidat ġdid tal-Partit Nazzjonalista, fuq
ir-raba' distrett. Se nkun qed nikkontesta wkoll fl-elezzjoni lokali
tal-Gudja.
Għaliex għażilt lil Partit Nazzjonalista bħala l-partit tiegħek?
Għażilt lil Partit Nazzjonalista għax huwa l-partit li tana l-għażla. Huwa dak il-partit li jemmen li l-individwu għandu jkollu l-għażla biex jfassal ħajtu u jagħmel minna dak li jrid hu.
Jien ġej minn ġenerazzjoni li sabet ħafna bibien mifuħa. Ġej minn ġenerazzjoni ta' opportunitajiet. Għandna l-għażla li nixtru dak li rridu, li nistudjaw dak li nixtiequ aħna, li nippjanaw u nilħqu l-aspirazzjonijiet għal futur tagħna.
Naħseb dan kollu jiddistingwi lil Partit Nazzjonalista mill-Malta
Labour Party. Il-Partit Nazzjonalista dejjem wera fiduċja
fil-kapaċitajiet tal-individwu. Il-Partit Nazzjonalista huwa kontra
d-dittatura tal-istat.
Kif bdejt tagħti sehmek fil-partit?
Fil-Gudja minn dejjem kont involut f'ħafna għaqdiet. Tajt sehmi fil-grupp tal-abbatini, fil-grupp taż-żgħażagħ, fin-nursery tal-football, fejn kont kemm plejer kif ukoll kowċ. Naħdem ukoll fil-grupp tal-festa.
Meta ġejt mistieden biex nikkontesta l-elezzjoni tal-Kunsill Lokali fl-2006, bħal stajt inkompli nagħti sehmi fil-Gudja iżda b'mod differenti. Ġejt elett mal-ewwel darba, bħala l-uniku kunsillier tal-Partit Nazzjonalista fil-lokalità. F'dan l-istess żmien, sirt ukoll membru tal-Kumitat Sezzjonali tal-Partit Nazzjonalista tal-Gudja.
F'dawn l-aħħar sitt snin, b'liema mod tajt sehmek fil-lokalità tal-Gudja bħala kunsillier?
Kemm jista' jkun, pruvajt naħdem bis-sħiħ mal-kunsillieri sħabi, minkejja d-differenzi tagħna fil-politika. Ħdimt fost oħrajn fil-qasam tal-isports. Bdejna kors tal-aerobics, bħala parti minn inizjattiva biex inħeġġu lit-tfal jibqgħu attivi anke wara l-ħin tal-iskola. Għamilna wkoll programm għaż-żgħażagħ, dak tal-Youths on the Move, bl-għajnuna tal-KMS.
Ipparteċipajna wkoll f'erba' proġetti tal-Unjoni Ewropea ta' skambji taż-żgħażagħ. Għal dawn il-proġetti s'issa ipparteċipaw 30 żgħażugħ u żgħażugħa mill-Gudja.
Inti kandidat ġdid, kandidat żagħżugħ. Għaliex għażilt li tikkontesta din l-elezzjoni f'isem dan il-partit?
L-involviment tiegħi fil-politika beda permezz tal-Kunsilli Lokali. Kien imbagħad il-Prim Ministru Lawrence Gonzi li stedinni nikkontesta l-elezzjoni ġenerali bħala kandidat ġdid tal-partit.
Għamilt dan il-pass għax nemmen f'Malta aħjar, f'Partit Nazzjonalista aħjar. Irrid inkun ta' kontribut għall-oħrajn. Irrid nagħti l-kontribut tiegħi biex il-Partit Nazzjonalista jibqa' jagħmel dawk l-għażliet li dejjem mexxew lil Malta 'l quddiem.
U kif tħares lejn il-fatt li inti sirt kandidat ġdid? Tħares lejn din bħala sfida jew opportunità?
Ovvjament, mhux faċli li ssir kandidat ġdid tal-Partit Nazzjonalista. Hija xi ħaġa li teħodlok ħafna ħin u nħares lejha bħala missjoni, li tagħti l-kontribut tiegħek.
Imma fuq kollox, qed inħares lejn il-kandidatura tiegħi bħala esperjenza, esperjenza li tlaqqgħek man-nies u li tgħallmek.
Jekk tkun elett, bħala deputat ġdid fil-Parlament, fuq xiex tixtieq taħdem?
Bla dubju, nixtieq naħdem fuq dawk l-oqsma li l-iktar li missejt magħhom. Nixtieq insarraf il-ħidma tiegħi fuq iż-żgħażagħ bħali. Nixtieq ukoll niffoka fuq l-isport u l-edukazzjoni.
Nemmen li, bħala Gvern, għandna nkomplu naraw kif noħolqu iktar opportunitajiet għaż-żgħażagħ Maltin, fil-livelli kollha. Hemm bżonn li aħna ż-żgħażagħ nibqgħu ngawdu minn scholarships, minn taħriġ bażiku, minn taħriġ vokazzjonali, minn dak kollu li jista' jgħinna biex nilħqu l-aspirazzjonijiet tagħna għal futur.
Però, mhux hekk biss. Huwa importanti wkoll li nagħtu kas ta' dak li qed jiġri barra l-ħin tal-iskola. Hemm bżonn inqajjmu iktar dak l-element ta' sport u volontarjat. Il-ħajja sabiħa ħafna u jiddispjaċini meta nisma' b'żgħażagħ li jżommu lura milli jipparteċipaw, milli jagħtu sehemhom fis-soċjetà, iktar u iktar meta dawn l-istess żgħażagħ jispiċċaw jaqgħu fil-vizzji.
Dan kollu apparti l-kontribut li nixtieq nagħti fis-sostennibilità tar-riżorsi tagħna: l-ambjent, l-enerġija, l-ilma. Bl-esperjenza tiegħi bħala inġinier, irrid ngħin biex pajjiżna jkompli jħabbrek f'dawn l-oqsma wkoll. Dan minbarra li, bl-esperjenza tiegħi fil-mużika, nixtieq nagħti sehmi wkoll f'oqsma tal-kultura.
Kif tista' tara, hemm ħafna affarijiet li jinteressawni. Naħseb li dan huwa importanti, għax bis-saħħa t'hekk, tkun tista' toffri l-aqwa kontribut, jekk tkun elett fil-politika.
Il-fatt li inti żgħażugħ, taħseb li dan se jgħinnek biex tagħti sehmek fil-politika? Jew taħseb li dan jaf ikun ta' tfixkil?
Is-sehem taż-żgħażagħ huwa importanti ħafna, f'kull qasam tal-ħajja, speċjalment fil-politika. Nemmen li aħna ż-żgħażagħ kapaċi noffru dik il-perspettiva l-ġdida, dawk l-ideat ġodda. Forsi ż-żgħażagħ kapaċi jifhmu iktar 'il ġenerazzjonijiet ġodda u kapaċi jemmnu ħafna f'ideal partikolari. Nemmen li dan ikompli jixpruna l-ħidma taż-żgħażagħ u joffri lil politika dik l-enerġija ġdida.
Imma taħseb li ż-żgħażagħ tal-lum tinteressahom il-politika?
Naħseb li dak li kien qed jiġri f'dawn l-aħħar snin imbutta ħafna persuni 'l bogħod mill-politika, b'mod speċjali liż-żgħażagħ. Naħseb li ż-żgħażagħ ifittxu ħafna l-ġenwinità. Għalhekk hemm bżonn ta' iktar nies ġenwini fil-politika, biex joffru sehem sinċier fil-politika.
Għandek xi messaġġ partikolari li tixtieq toffri lil poplu Malti?
Għandna nkunu kburin bil-mod kif pajjiżna mexa 'l quddiem. Naraw kif pajjiżi oħra jirreferu għalina bħala xempju ekonomiku. Jarawna mudell għal pajjiżi oħrajn fl-Ewropa. Biss, l-isfidi għadhom u se jibqgħu ġejjin u nemmen li hemm bżonn ta' tmexxija għaqlija biex ma nitilfgħux dak kollu li ksibna flimkien.
Il-Partit Nazzjonalista kien dak il-partit li dejjem wera viżjoni jew għaqal biex il-ġenerazzjonijiet li jmiss jiksbu l-opportunitajiet neċessarji biex jirnexxu. Fid-dinja li qed ngħixu fiha, il-pajjiż għandu bżonn din il-viżjoni, dan l-għaqal. Il-pajjiż għandu bżonn lil Partit Nazzjonalista.
Comments
Post a Comment