Dan hu r-rapport ta' ħidma tiegħi li ppreżentajt fil-Laqgħa Ġenerali Annwali tal-Kumitat Sezzjonali tal-Partit Nazzjonalista fil-Gudja:
Din is-sena, permezz ta’ skema maħruġa mill-Gvern permezz tal-Kunsill Malti għall-Isport, is-Segretarjat Parlamentari għaż-Żgħażagħ u Sport u l-Ministeru responsabbli mill-Kunsilli Lokali, il-Kunsill ibbenefika minn finanzjament ta’ €4,000 biex komplejna l-attivita’ ta’ After School Sports għat-tfal tal-Primarja, kif ukoll komplejna nifirxu l-attivita’ sportiva anke’ għall-adulti b’korsijiet tal-Aerobika, Pilates u Zumba, u Sports for All. Dion kienet somma rekord li l-Kunsill ħa fil-qasam sportiv li jien responsabbli minnu. Grazzi għal dawn il-fondi, il-Kunsill għar-raba’ sena konsekuttiva issa beda l-programm ta’ sports wara l-ħin tal-iskola għat-tfal tal-primarja, liema programm din is-sena applikaw għalih 31 student u studenta, numru rekord ta’ parteċipanti speċjalment għal raħal żgħir bħal tagħna fejn in-numru ta’ tfal fl-iskola qiegħed dejjem jonqos. Saru wkoll korsijiet ta’ Pilates għal adulti, kif ukoll l-inizjattiva ġdida ta’ Sports for All. F’din l-inizjattiva, użajna l-ftehim tal-PPP li konna ffirmajna mal-Gudja Utd. F.C. is-sena l-oħra, u hemmhekk organizzajna sensiela ta’ sessjonijiet fejn waqt li kien hemm l-Aerobika u l-Pilates għaddejjin għall-adulti, kien hemm attivitajiet ta’ Fun Games u Ċikliżmu għat-tfal. B’hekk ġenituri setgħu jattendu filwaqt li jserħu moħħhom li uliedhom qegħdin jipparteċipaw f’attivitajiet simili fl-istess ħin u lok. Attivita’ oħra sportivi kienet il-Fun Run & Bike Ride li saret bħala parti mill-attivitajiet ta’ Jum il-Gudja u li fiha nġabru fondi għal Puttinu Cares. Għat-tieni darba saru wkoll sensiela ta’ events sportivi, b’kollaborazzjoni mal-Agones SFC, li kienu jinkludu Trail Run fil-kampanja, Cycling Time-Trial, Night Cross-Country Cycle, u Duathlon, li raw il-parteċipazzjoni ta’ diversi żgħażagħ u adulti anke’ minn barra l-Gudja. Grazzi għal din il-kollaborazzjoni, għall-ewwel darba waħda mit-tlielaq tal-Kampjonat tal-Mountain Bikes saret ukoll ġewwa l-ambjent rurali li jdawwar il-Gudja.
Dan is-sajf ukoll, fi ħdan il-Kunsill Lokali organizzajt ir-raba’ proġett għaż-żgħażagħ barra minn xtutna. L-iskambju ta’ din is-sena sar ma’ organizzazzjoni Bulgara ġewwa Sandanski fi proġett intitolat Youth European Synergy. Grazzi għal dan il-proġett, grupp ta’ 6 mużiċisti żgħażagħ ipparteċipaw fil-Balkan Youth Festival, li huwa festival ta’ mużika internazzjonali. Għalkemm laqqajna lil dawn iż-żgħażagħ fi ftit ġimgħat qabel il-proġett, irnexxielhom itellgħu prodott verament tajjeb ta’ medley ta’ diski Maltin maqlubin fuq stil Rock u Pop. Dawn il-proġetti huma uħud mill-opportunitajiet siewja immens li nfetħu għaż-żgħażagħ tagħna grazzi għas-sħubija ta’ pajjiżna fl-Unjoni Ewropeja, u jgħinuhom jiskopru u japprezzaw id-diversita’ kulturali li teżisti fil-pajjiżi ewropej. Għalhekk għandna nibqgħu nagħmlu ħilitna biex naraw li dawn l-opportunitajiet jinħatfu u nagħmlu l-aħjar użu minnhom. Barra minn hekk, qed naraw ukoll kif dak li jieħdu minn hemm ikompluh anke’ ġewwa l-Gudja, u għalhekk stedinna lil dawn iż-żgħażagħ biex jipparteċipaw mużikalment fil-villaġġ tal-Milied li jkonna fir-raħal tagħna.
Il-Gvern kompla jżid l-għajnuna u l-finanzjament lill-Kunsilli Lokali, u permezz tal-Awtorita’ tad-Djar u l-iskema “Insaħħu l-Komunita', Riġenerazzjoni fl-Oqsma tal-Binjiet tal-Gvern.” Permezz ta’ din l-iskema, il-Kunsill Lokali irranġa l-inħawi ta’ madwar il-flats fiz-Zona Residenzjali tal-Mitħna, b’investiment mill-Gvern ċentrali ta’ €75,000.
Dan is-sajf, il-Kunsill Lokali reġa’ organizza kors tad-Drama għaż-żgħażagħ, li kien tkomplija tal-kors li sar is-sena l-oħra. Dan wassal biex iż-żgħażagħ parteċipanti tellgħu rappreżentazzjoni ġewwa t-Teatru Grieg tal-Ġnien Raymond Caruana. B’hekk filwaqt li noffru alternattiva edukattiva għaż-żgħażagħ, inkunu wkoll qed inqajmu kuxjena kulturali u nkomplu nagħmlu użu anke minn parti tal-Ġnien li għal ħafna snin kienet abbandunata. Apparti minn hekk, grazzi għal kofinanzjament mill-Aġenzija Żgħażagħ, ħadt l-inizjattiva biex tmien żgħażagħ mill-Gudja jsegwu kors ta’ taħriġ fit-tmexxija.
Proġett ieħor li ngħatajt ir-responsabbilita’ għalih kien l-applikazzjoni ta’ skema ta’ parkeġġ residenzjali għal toroq fil-Gudja li jinsabu biswit l-Ajruport Internazzjonali ta’ Malta. Dawn it-torqo huma milquta minn problema ta’ influss kontinwu ta’ karozzi li jitħallew hemm għal żminijiet twal, bid-dannu li r-residenti ma jsibux parking. Wara diversi laqgħat ta’ konsultazzjoni ma’ Transport Malta, irnexxielna nġibu permess għal skema ta’ timed-parking għal dawk il-karozzi li ma jkunux jappartjenu lir-residenti f’ċerti ħinijiet matul il-ġurnata. Din l-iskema l-ewwel ħa titħaddem għal tliet xhur bi prova, imbagħad tkun tista’ tiġi reviża skont il-‘feedback’ li jkun hemm.
Il-Kunsill din is-sena reġa’ organizza ġimgħa ta’ attivitajiet biex ifakkar Jum il Gudja, li inkludiet tqassim ta’ kotba lit-tfal, fun run, volleyball tournament, servizz ta’ testijiet mediċi, ħarġa għal Għawdex, wirja tal-karozzi, u wirja ta’ artiġġjanat. Bħalma għamel f’dawn l-aħħar snin, il-Kunsill ħa sehem ukoll fil-Lejla Sajfija b’kollaborazzjoni mal-parroċċa bħala parti minn dawn l-attivitajiet. Sfortunatament din is-sena, din l-attivita’ kienet imtappna mill-aġir partiġġjan tal-kunsilliera tal-Partit Laburista. Wara li l-organizzaturi kienu laħqu ftehim mas-Sur Ronald Briffa biex ikun il-preżentatur tal-attivita’, kien anke’ tniżżel fil-programm, u kien anke’ ġie approvat mill-Kunsill, f’laqgħa 9 ijiem biss qabel l-attivita’, żewġ kunsilliera Laburisti talbu li dan il-preżentatur ma jitħalliex jippreżenta bl-iskuża li xtaqu lil xi ħadd mill-Gudja. Email li ntbagħtet mill-Kunsillier Osvaldo Pace lill-Kunsill Lokali wara din il-laqgħa, tikxef li din kienet biss skuża. Dan l-għaliex f’din l-email, is-Sur Pace bagħat lista ta’ preżentaturi minn fejn is-Segretarju tal-Kunsill kellu jagħżel. Din il-lista ta’ preżentaturi ma kienet tinvolvi lil ħadd mill-Gudja, imma kienet biss lista mibgħuta minn Ray Azzopardi ta’ preżentaturi li jagħmlu programmi fuq One TV u One Radio. Daqshekk hu moderat u progressiv il-Partit Laburista. Ir-riżultat aħħari kien li filwaqt li għal Ħadd imbagħad il-Kunsill irnexxielu jsib lil xi ħadd mill-Gudja, għas-Sibt l-organizzaturi spiċċaw tħallew mingħajr preżentatur minħabba l-ebusija tar-ras u l-fanatiżmu ta’ kunsilliera li suppost iġibu l-interessi tar-raħal qabel l-interessi partiġġjani tagħhom.
Nagħlaq billi nirringrazzja lill-Kumitat tal-appoġġ u l-koperazzjoni li dejjem insib minn għandhom waqt il-qadi tal-ħidma tiegħi fil-Kunsill Lokali tal-Gudja.
Comments
Post a Comment