Artiklu tiegħi li deher fil-ġurnal "il-mument" nhar il-Ħadd 2 ta' Diċembru 2012
Waqt li kont għall-kwiet fil-pjazza tar-raħal ngħid kelmtejn ma’ żewġ anzjani li rawni nikber u li dejjem qaluli kelma ta’ ġid, dlonk nilmaħ ħabib antik. Konna ilna ma niltaqgħu żmien.
Ġie jsellimli u jawgurali hekk kif sar jaf li se nikkontesta l-elezzjoni ġenerali mal-Partit Nazzjonalista. Kont ftit sorpriż għax miegħu qatt ma tkellimt fuq politika. Spjegali għala jħoss li l-Partit Nazzjonalista għadu l-partit li l-aktar kapaċi jmexxi lil pajjiżna ’l quddiem.
Ejjew għal mument ninsew ir-rapporti pożittivi fuq il-finanzi ta’ pajjiżna li ħarġu diversi istituzzjonijiet varji.
Ejjew ninsew il-kummenti pożittivi li għamlu diversi Ministri Ewropej dwar pajjiżna.
Ejjew ninsew ir-ruxxmata rapporti pożittivi li l-Prim Ministru Gonzi ta lil Muscat waqt il-programm Xarabank.
L-ikbar ċertifikat ta’ fiduċja fl-amministrazzjoni preżenti wasal minn Muscat innifsu!
Muscat iddikjara li biex wieħed ikollu s-serħan tal-moħħ, jekk hu jkun elett, se jżomm l-istess Baġit li ressaq il-Gvern Nazzjonalista preżenti nhar l-Erbgħa li għadda!
Dan mingħajr ma kien għadu jaf x’fih il-Baġit. Meta wieħed ikun lest jixtri xi ħaġa li lanqas jaf x’inhi, hu sinjal ċar li jafda b’għajnejh magħluqin lil min qed ibigħielu!
Muscat stess jafda l-politika ekonomika u finanzjarja tal-Partit Nazzjonalista. Jintrabat li jimxi magħha minn ġimgħat qabel tħabbar l-istess Baġit. Dan mhux bħal xi ħadd li qed jixtri post minn fuq il-pjanta. Dan qed jixtri l-post mingħajr ma biss għadu ra dik il-pjanta. Dik il-fiduċja kbira li għandu fil-politika ta’ dan il-Gvern.
Fl-istess nifs, jgħidilna li l-pajjiż jinsab għarkupptejh, li m’hawnx xogħol, li kollox staġnat, li l-pajjiż miss il-qiegħ, li dan gvern skadut, li dan gvern li ma joħloqx ix-xogħol.
Jgħid dan kollu, u fl-istess ħin jiddikjara li lest iżomm l-istess Baġit imressaq minn Gvern Nazzjonalista.
Il-Labour induna li mhu kapaċi joffri xejn ġdid u wisq inqas aħjar minn dak li qed joffri l-PN. Il-Labour irid biss jikkopja l-politika tal-PN biex iserraħ ras in-nies li kollox se jmur sew. Dan fid-dawl tal-fatt li minkejja tant snin fl-Oppożizzjoni, il-Labour ma hux kapaċi jispira fiduċja la fis-sid tan-negozju u wisq inqas fil-ħaddiema.
Kif tista’ tispira fiduċja meta l-Labour jitkellem fuq transfers, fuq friża tal-minimum wage wara li tkellem fuq living wage li issa ġiet imwarrba, fuq li twiegħed kollox lil kulħadd?
Kif tista’ tispira fiduċja meta qed toffri lill-poplu Malti l-istess nies li kissru dan il-pajjiż fis-snin tmenin? Kif tista’ tispira fiduċja meta l-leader stess jgħid li the end justifies the means?
In-nies trid fatti. In-nies trid policies li jagħmlu sens u li jkomplu joħolqu x-xogħol u l-ġid. In-nies bħal dan il-ħabib li kellimni, u bħalma jgħiduli l-familji meta ta’ kuljum inżurhom fi djarhom, taf u tifhem xi problemi hawn f’bosta pajjiżi Ewropej.
In-nies taf u hi konxja ta’ kemm ħadem dan il-gvern minkejja t-tfixkil intern u minn barra fosthom dak mill-Oppożizzjoni.
Jeħtieġ inkomplu nispjegaw dan kollu biex dan il-pajjiż ikompli miexi ’l quddiem taħt tmexxija li tagħti ġieh lil kull wieħed u waħda minna. Tmexxija li ma tħarisx lejn pajjiżna bħala makku iżda tħares lejn kull wieħed u waħda minna bħala persuna kapaċi u abbli.
Din it-tmexxija li twassal tassew biex pajjiżna jimxi ’l quddiem, kapaċi joffriha l-Partit Nazzjonalista. U dan qed jammettih Muscat stess.
Iżda dan is-serħan tal-moħħ, il-poplu ma jridux biss għal sena. Ma jridux biss għal Baġit wieħed. Iridu għal leġislatura sħiħa.
Għaldaqstant għażla waħda għandu: jivvota għall-oriġinal u mhux għal kopja. Jivvota lill-Partit Nazzjonalista.
Comments
Post a Comment