L-artiklu tiegħi li deher fil-mument ta' nhar il-Ħadd 10 ta' Frar 2013
Meta tmexxi
bil-politika ta’ “the end justifies the means” u meta twiegħed kollox lil
kullħadd, tkun qiegħed biss tuża lil dak li jkun għax għandek bżonnu illum.
Wara li tkun għasartu, trid biss tibgħat għalih u ttih sitt tiri kiesaħ u
biered. F’kelma oħra, tarmieh. Muscat jużak illum u jarmik għada.
Ħafna nies li
żort fl-aħħar xhur tkellmu miegħi dwar żjarat li kellhom minn kandidati
Laburisti. Kif wieħed għandu jagħmel meta jżuru politiku, dak li jkun isaqsi
mistoqsijiet dwar f’hiex temmen, x’qed jipproponi l-partit tiegħek u kif lest
twettaq dak li qed tipproponi. Ħafna u ħafna familji qaluli li baqgħu bla
risposti ċari jew saħansitra kandidat tal-Labour qallhom mod u kandidat ieħor
ta’ Muscat qallhom mod ieħor! Lanqas il-kandidati tal-Labour ma jafu kif se
jwettqu dak kollu li qed iwegħdu, aħseb u ara kemm se ssir taf int! Lanqas id-Viċi
Mexxej tal-Labour stess ma kien jaf x’qed jipproponi il-Labour! Mhux ta’ b’xejn
il-Partit Nazzjonalista għadu l-aqwa għażla għalik u għal familja tiegħek.
Il-pajjiż imur ġo
ħajt jekk ma jkunx hemm min hu kapaċi jmexxi. Min imexxi irid jassigura li
l-finanzi tal-pajjiż ikunu fis-sod. Hu biss b’finanzi fis-sod, li Gvern ikun jista’ jieħu
inizjattivi li bihom titjieb il-kwalità tal-ħajja tiegħek. Gvern immexxi
mill-Partit Nazzjonalista fl-eqqel tal-kriżi ekonomika u finanzjarja
internazzjonali, kuntrarju ta’ pajjiżi oħra, żamm il-finanzi fis-sod. B’finanzi
fis-sod, ġab aktar investiment, inħolqu aktar minn 20,000 impjieg, naqqas
it-taxxi u investa aktar fis-saħħa, fil-qasam soċjali u fl-edukazzjoni. Mingħajr
finanzi fis-sod, jiżdiedu t-taxxi, kif kien għamel l-aħħar gvern laburista meta
ħarbat il-finanzi tal-pajjiż u daħħal 33 taxxa fi 22 xahar, taxi li kien iddefenda bis-sħiħ Joseph Muscat.
Gvern
immexxi mill-Partit Nazzjonalista jagħraf li biex int tagħmel qabża oħra ta’
kwalità, il-finanzi jridu jibqgħu fis-sod. Għalhekk il-Partit Nazzjonalista
ippreżenta programm elettorali realistiku li permezz bl-inizjattivi li fih
tikber l-ekonomija, jiżdied l-investiment, il-kummerċ u x-xogħol u tiżdied
l-effiċjenza.
L-iktar
miżura li kellimtuni fuqha din il-ġmgħa kienet dik li tolqot it-tfal. Gvern
immexxi mill-Partit Nazzjonalista jagħti vouchers għal childcare b’xejn lill-ġenituri
li jaħdmu full-time, part-time, b’ħinijiet flessibbli jew inkella li jkunu qed
jistudjaw jew jitħarrġu. Għal wara l-ħinijiet tal-iskola jkomplu jinfetħu aktar
Ċentri Klabb 3 – 16 fejn it-tfal mill-iskejjel tal-gvern, privati u
indipendenti jkunu jistgħu isegwu programmi edukattivi u ta’ żvilupp sas-
6.00pm. Il-Partit Nazzjonalista fil-Gvern iżid l-istipendji pro rata skont iż-żieda
li jingħataw il-ħaddiema. It-tfal tagħna rridu ntuhom futur aħjar mit-tfulija
tagħna. Għalhekk irridu nwettqu dan kollu.
Ħaddieħor
nefaq mil-mijiet tal-eluf f’billboards, flyers, kotba, ingravajjet, podiums u
ħafna xinxilli. Dan kollu jispiċċa wara id-9 ta’ Marzu. L-għada filgħodu jisbaħ
u għal ħames snin sħaħ xi ħadd li tagħżel int irid imexxi dan il-pajjiż. Mhux
bilfors dak li tagħżel int. Għal daqstant, int għandek tgħin fid-deċiżjoni lil
min għadu ma ddeċidiex. Int għandek tikkonvinċi li l-Partit Nazzjonalista huwa
l-aħjar għażla għal pajjiżna. M’aħniex u mhux se nkunu perfetti imma mal-PN taf
fejn int. Taf x’kapaċi jwettaq u taf li pajjiżek ikompli jimxi ‘l quddiem.
Il-vot mhux biljett tal-lotterija. Mhuwiex logħba tal-azzard. Użah u użah tajjeb.
Tħalliex
min juża l-vot tiegħek u jirkeb fuq il-weġgħa li forsi għandek llum, biex wara li jużak, jarmik. Hekk għamel Muscat lil “sieħbu” Anġlu Farrugia. Biex
għamel hekk lil min suppost kien l-id il-leminija tiegħu, aħseb u ara x’jagħmel
lilek meta jkun ħa dak li ried: il-vot tiegħek. Biex ma irrispettax l-għażla ta’ Viċi Mexxej li
għamlu d-delegati tiegħu stess, aħseb u ara kemm ser jirrispetta l-għażliet
personali tiegħek u l-libertà tiegħek bħala individwu.
Comments
Post a Comment