L-artiklu tiegħi li deher fil-mument ta' nhar il-Ħadd 3 ta' Frar 2013
Sa minn ċkunitek
tibda tagħmel l-għażliet. Malli fil-klassi, l-għalliem isaqsi mistoqsija,
tista’ tagħżel li tkun awtur billi tipprova twieġeb. Tista’ wkoll tagħżel li ma
tgħid xejn, toqgħod bi kwietek ħalli żgur ħadd ma jgħidlek li weġibt ħażin.
F’dak il-każ tkun biss spettatur. Issib ukoll min ikun pinnur. Dan illum jgħid
mod u għada jgħid ieħor.
Jien għażilt li
naħdem fil-Partit Nazzjonalista. Inqis il-PN bħala l-awtur ta’ Malta
indipendenti, ta’ Malta fl-Unjoni Ewropeja u fuq kollox l-awtur li ġab ‘il-Malta
‘il quddiem, b’ekonomija moderna, u ħoloq opportunitajiet ta’ xogħol u edukazzjoni.
Bħal kull min ikun awtur, trid tippjana, trid tiddjaloga, trid tisma’, trid
tħassar u terġa’ tikteb, trid taġixxi u trid twettaq. Hekk għamel Gvern
Nazzjonalista fl-aħħar leġislatura. Bħal awtur ta’ ktieb, jiġu mumenti fejn
tħoss il-pressjoni, jiġu mumenti fejn il-muża ma tkunx fl-aqwa tagħha u jiġu
mumenti fejn trid tibdel dak li qed tikteb. Dak huwa li jwassal sabiex il-ktieb
ikun aħjar, sabiex il-ktieb ikun suċċess. Kieku kollox sempliċi, kieku kollox
isir waħdu, kieku kulħadd huwa awtur. Il-PN mhux talli kiteb rekords
fit-turiżmu, fl-ammont ta’ nies jaħdmu f’pajjiżna, fl-ammont ta’ gradwati u
fl-ammont ta’ servizzi tas-saħħa mogħtija b’xejn. Il-PN issa wkoll kiteb 125
proposta ta’ sustanza, li jagħmlu sens, fattibli u fuq kollox li minnhom igawdi
l-poplu kollu. Proposti minsuġa fuq il-valuri u prinċipji li huma identifikati
mal-PN.
Stajt għażilt
partit li jkun spettatur. Partit li jagħmel ħames snin imaqdar kollox, ma
jipproponi xejn, jivvota kontra kollox, u jwettaq il-politika tal-Le. Stajt
ħriġt ma’ partit li ħammrilna wiċċna mal-Ewropej kollha, li f’Malta jgħid mod u
fi Brussell jagħmel ieħor. Ma’ partit li iktar kemm jibdel affarijiet, iktar
kollox jibqa’ l-istess, kif qalilna l-ex Ministru Evarist Bartolo, li jibqa’
fl-istorja bħala l-Ministru li neħħa l-istipendji u bagħat l-istudenti
jiddejnu. Ma’ partit fejn “the end justifies the means” kif qalilna Muscat, dak
li jiddeskrivi l-Unjoni Ewropeja bħala “is-salib tal-millejnju”. Min jaf kemm
qalhom dal-kelmiet Anġlu Farrugia wara dak li għaddewh minnu! Stajt għażilt
partit fejn min mhux miegħek, “mhux parti mill-familja tagħna” kif qaltilna
Justyne Caruana, backbencher oħra fl-Oppożizzjoni. Il-Malta Labour Party kien
spettatur għal ħames snin sħaħ kuljum jittama li tasal l-elezzjoni biex
imbagħad iħabbar ftit gimmicks, jimla
Malta bil-posters u billboards, jonfoq bl-addoċċ u jittama
li in-nies ma tfittixx is-sustanza iżda taljena ruħha fit-tfiegħ tat-tajn u
l-ingravajjet ġodda.
Jista’ jagħti
l-każ li mhux biżżejjed li tirreferi għal Malta Labour Party bħala spettatur.
Dan għax malli qorbot l-elezzjoni inbidel kemmxejn minn spettatur għal pinnur.
Issa bdilna id-diska minn “Partnership, l-aħjar għażla” għal “l-aqwa fl-Ewropa”.
Qlibna minn miljun u nofs flus kontanti mill-Ewropa għal l-aktar pajjiż li se
jieħu fondi. Ir-riħ dawwar il-pinnur minn “Gvern tal-Laburisti” kif qalilna ċar
u tond l-istar candidate Jason Micallef,
għal “Malta tagħna lkoll.”
Il-Partit
Nazzjonalista kien u għadu l-awtur ta’ preżent u futur fis-sod għal Malta u
Għawdex. Iktar kemm indur djar, iktar nifhem kemm in-nies mhux il-gimmicks trid iżda is-sustanza. Dan li
qed joffri l-PN. Politika ta’ sustanza fejn mhux li tkun spettatur jew pinnur
iżda li tkun l-awtur tal-ġid li jinħoloq u li jitqassam b’mod ġust. Dak li jrid
iwettaq Gvern Nazzjonalista.
Fil-125 proposta li qed iressaq il-PN
quddiem il-poplu Malti, hemm waħda li laqtitni tassew. Din hija proposta 98 –
Fond ta’ solidarjeta. Jitwaqqaf Fond ta’ Solidarjetà li
fih jitħallsu 0.5% tat-taxxa tad-dħul li tħallas int u tagħżel INT min għandu
jgawdi minnhom direttament fil-formola tat-taxxa tiegħek. Il-benefiċċjarji
jistgħu jkunu għaqdiet tas-soċjetà ċivili li jaħdmu fil-qasam soċjali,
filantropiku, għaqdiet reliġjużi, ta’ kultura u arti, għaqdiet li jħarsu
l-annimali u oħrajn. Din il-proposta se tiswa lil Gvern madwar 1.8 miljun ewro
fis-sena. Int stess issa tista’ tagħżel lil min trid tagħti dawn il-flus.
Bl-għażla tiegħel int se tkun awtur ta’ bidla u għajnuna fil-ħajja ta’ min
verament għandu bżonn l-għajnuna. Din hija tassew politika li joħroġ biha min
ikun awtur tal-bidla u tas-solidarjetà u mhux min ikun spettatur u wisq inqas
pinnur.
Comments
Post a Comment