Wara kulħadd għaref...kun għaref qabel

L-artiklu tiegħi li deher fil-mument ta' nhar il-Ħadd 24 ta' Frar 2013

Fi ftit ġranet il-votanti se jkunu qed jagħżlu min se jmexxi l-pajjiż fil-ħames snin li ġejjin u min se jkun qed jirrapreżentahom fil-Parlament.

Din mhijiex deċiżjoni li tittieħed fuq bażi istintiva. M’hijiex logħba tal-ażżard.

Għaldaqstant, f’nofs kampanja ta’ billboards ikkuluriti, u  slogans sbiħ u retoriċi, huwa importanti li l-votant jiddixxerni u jiffoka fuq dak li hu importanti. Fuq il-prioritajiet. Fuq dak li hu essenzjali.

Id-dinja għada kemm għaddiet mill-agħar riċessjoni ekonomika ta’ dawn l-aħħar tmenin sena, u għadha ma rkupratx minnha kompletament. F’bosta pajjiżi, il-banek tfarrku, il-gvernijiet ikkollassaw, intilfu għadd ta’ impjiegi, il-miżati tal-Universitajiet għolew, in-nies għadhom qed isofru l-konsegwenzi ta’ deċiżjonijiet populisti u ta’ deċiżjonijiet ħżiena ta’ gvernijiet li naqsu milli jieħdu deċiżjonijiet iebsa minħabba l-bżonnijiet elettorali.

Iżda ma nistgħux ngħidu l-istess għall-pajjiżna. Matul din ir-riċessjoni, il-Partit Nazzjonalista irnexxilu jikseb riżultati tajbin. Għamel rekord bl-ogħla rata ta’ nies li jaħdmu bi qliegħ li qatt kellu pajjiżna, 4 snin wara xulxin ta’ rekords fit-turżmu b’żidiet fl-għadd ta’ ljieli u ta’ flus minfuqa mit-turisti f’pajjiżna. Żied in-nurmu ta’ korsijiet u l-ammont ta’ studenti fl-Università, l-MCAST, l-ITS, il-Junior College u l-Higher Secondary, għamel rekord ieħor fil-perċentwali ta’ studenti li jkomplu l-edukazzjoni post-sekondarja, fl-għoti ta’ boroż ta’ studju post-sekondarji, u li mhux biss żamm l-edukazzjoni mingħajr ħlas iżda wkoll ta l-istipendju. Aħna l-iktar pajjiż fl-Ewropa fejn l-istudenti li jigradwaw isibu impjieg. Għandna l’għola perċentwali ta’ nisa taħt il-35 sena li għandhom impjieg, u qed naraw ukoll żieda sinjifikanti f’etajiet oħra. Irnexxilna nsiru mudell ekonomiku li huwa l-għira ta’ ħafna pajjiżi Ewropej, inkluż l-istess Ċipru li skont Muscat kellna nsegwu l-passi tiegħu.

F’dan ix-xenarju, il-Partit Nazzjonalista qed jirriskja li jispiċċa vittma tas-suċċess li kiseb hu stess. Hawn nistgħu inġibu l-eżempju ta’ dik li hija magħrufa bħala il-piramida tal-bżonnijiet ta’ Maslow. La darba l-bżonnijiet tagħna sirna nieħduhom ‘for granted’: l-edukazzjoni, ix-xogħol, il-pensjoni, is-suċċess ekonomiku u s-servizzi tas-saħħa, bdejna ingorru ħafna iżjed fuq it-trasport pubbliku u fuq il-problemi tal-parkeġġ fl-Università.

Dan ma jfissirx li kollox huwa ward u żahar. Ma jfissirx li dawn m’humiex importanti. Iva, jeżistu problemi u sfidi li rridu niffaċċjaw. U l-Partit Nazzjonalista huwa lest li jindirizzahom bi programm elettorali bi ċar u li jwassal għall-baġit bilanċjat sal-2015, u dan se jkun msejjes fuq l-esperjenza tat-tkattir tal-impjiegi u t-tkabbir tal-ekonomija li għenuna biex niġġieldu r-riċessjoni, nindirizzaw iktar l-evażjoni fiksali u l-abbuż fuq il-benefiċċji soċjali, tiżdied il-piena fuq dawk li jabbużaw mill-liġi u l-koruzzjoni, u tkun sostnuta l-ekonomija u l-kwalità tal-ħajja. U r-riżultati huma garantiti mill-kisbiet li ntlaħqu fil-perjodu ta’ kriżi.

Filwaqt li l-Labour ipprova jikkopja kemm jista’ minn dawn il-proposti, xorta waħda huwa magħmul mill-istess nies li biddlu l-VAT mas-CET u ma’ 33 taxxa oħra, li opponew id-dħul ta’ Malta fl-Unjoni Ewropea, u li mexxewna għall-22 xahar fl-aħħar 25 sena li matulhom in-nies li jaħdmu bi qliegħ naqas, u li matulhom kellna rekord fid-defiċit. Inkluż Joseph Muscat. U minkejja li jipprova jgħidilna ‘ejjew ninsew il-passat u nħarsu lejn il-futur’ biex inessina mill-iżbalji tiegħu u min-nuqqas ta’ viżjoni li għandu, xorta waħda rridu nħarsu lejn it-track record tiegħu u lejn l-ammissjonijiet riċenti tiegħu ta’ fejn żbalja.

Għaliex fl-aħħar mill-aħħar, fl-10 ta’ Marzu ma jkollnix iktar movimenti, ma narawx iktar slogans, u ma narawx iktar billboards ikkuluriti. Fl-10 ta’ Marzu, partit politiku se jkun qed imexxi l-gvern, u se jkun qed jieħu d-deċiżjonijiet politiċi. U n-nies tiegħu se jkunu qed jieħdu d-deċiżjonijiet li aħna rridu nixtarru u nagħżlu.

Fid-deċiżjonijiet li nieħdu, ma rridux politiċi li jirrejalizzaw bl-iżbalji tagħhom snin wara. Wara kulħadd għaref. Irridu politiċi li jħarsu fil-futur u jaraw x’għandu bżonn il-pajjiż minn qabel, speċjalment fid-dinja daqstant dinamika li qed ngħixu fiha. Għaliex jekk jagħmlu żball, aħna se nkunu qed nħallsu għalih.

Għalhekk, Joseph “li nirriżenja jekk ma nasalx” Muscat m’huwiex biżżejjed. Għax il-ħsara tkun laħqet saret.

Iva, nistgħu niddiskutu l-bżonnijiet fil-quċċata tal-piramida, imma nistgħu nagħmlu dan jekk inkunu żguri li għandna il-pedamenti soda. U l-bażi hija magħmula mill-ekonomija, il-ħolqien tax-xogħol, l-edukazzjoni u s-saħħa.

U l-Partit Nazzjonalista dejjem assikura li jsaħħaħ dan il-pedament, li fetaħ il-bibien għall-opportunitajiet, anki meta kien hemm l-oppożizzjoni ta’ Muscat. Pajjiżna irnexxilu jbaħħar il-quddiem, fl-Unjoni Ewropea, fil-kriżi fil-Libja, fil-kriżi finanzjarja, fiż-żieda fil-prezzijiet taż-żjut u ċ-ċereali, u fir-riċessjoni. Saħħaħna l-bażi tal-piramida, u rnexxilna ngħollu l-aspettitivi tal-poplu li dejjem jixtieq jgħix aħjar.

Dak li se nkomplu nagħmlu. Għalhekk l-għażla tiegħi hija l-PN. U għalhekk ukoll l-għażla tiegħek għandha tkun il-Partit Nazzjonalista.