Ilbieraħ kellimni statista.
Raġel sempliċi u umli, li tani kollox mingħajr ma tani xejn.
Kulma tani kienet il-liberta' li naspira għal kollox mingħajr ma niġi bżonn ħadd u xejn.
Ħlief li noħlom u naħdem għal dak li nixtieq.
U xfaru d-dmugħ.
Għax ftit min-nies li ltqajt magħhom dal-ġranet, lesti jarmu kollox: il-viżjoni, l-ideal, il-ħolma, għax iqisu biss il-ftit tagħhom. Għax insew għalxiex jissejħu Nazzjonalisti. Insew li l-ġlieda tagħhom kienet kontra uħud mill-affarijiet li illum qegħdin jitolbu għalihom.
U għax ftakart ukoll li uħud inqdew bih. Dawk li ppruvaw iwaqqfuh mit-twettiq ta' din il-ħolma, illum qed jgħidu kemm kien tajjeb. Kemm kien kbir.
U ilbieraħ ġie. Kellimna. Għadu kburi b'pajjiżu bħalma kien snin ilu. Kburi li ta' warajh għadhom qed jibnu fuq dak li wettaq. Ta' pajjiż fejn tista' tirnexxi waħdek. Ta' pajjiż ta' kulħadd.
Għax pajjiżna għandu storja, li waslitu biex illum, pajjiżna diġa hu tagħna lkoll.
Ilbieraħ fuq il-fosos, iltqajt ma' min dik l-istorja kien l-awtur tagħha, u jixtieq ikompli jaraha titwettaq.
Hemm fuq il-fosos, fejn qabel kont inkun quddiemu, għall-ewwel darba kont warajh.
Wieħed mill-werrieta ta' dik il-ħolma, ta' dik il-viżjoni, ta' dak l-ideal.
Għax jien ukoll, għażilt li inkun protagonist mhux spettatur. Biex nagħti l-kontribut tiegħi, u nkompli nibni fuq dak li ħallewlna ta' qabilna.
Biex pajjiżi jibqa' tagħna lkoll.