Dan l-artiklu deher fin-Nazzjon tal-Ħamis 23 ta' Mejju 2013
Għaddew iżjed
minn xahrejn mir-riżultat tal-elezzjoni ġenerali. Xahrejn li fihom bdew jidhru
l-ewwel sinjali ta’ Gvern esklussiv, li nesa għal kollox il-meritokrazija li
wiegħed, u li minn flok qed juża l-istituzzjonijiet ta’ pajjiżna biex iħallas
lura lil min għenu jasal għall-għan tiegħu. Hija attitudni li qed tħassar ħafna
mit-tajjeb u sens ta’ servizz li hemm fil-politika, u li qed tferrex mentalita’
żbaljata.
Mill-banda
l-oħra, il-Partit Nazzjonalista jidher li tgħallem min-nuqqasijiet tal-passat,
u issa qabad it-triq għat-tibdil u riformi neċessarji biex jerġa’ jsir l-akbar
forza politika f’pajjiżna.
Parti minn din
it-triq ta’ tiġdid hija l-elezzjoni tat-13-il membru tal-Kumitat
Eżekuttiv tal-Partit Nazzjonalista li jiġu eletti mill-Kunsill Ġenerali.Ħassejt li jien ukoll kelli noffri
s-servizz tiegħi għal ġudizzju tal-Kunsillier, u din il-ġimgħa jien ukoll tfajt
in-nomina tiegħi għal din l-elezzjoni. L-ewwel nett nirringrazzja lil dawk kollha li
inkuraġġewni biex għall-ewwel darba noffri s-servizz tiegħi fuq livell intern
fil-Partit.
Niffaċċjaw l-isfidi b'kuraġġ
Nemmen li flimkien bħala Partit nistgħu naffaċċjaw l-isfidi li
ġejjin b'kuraġġ u minflok naqtgħu qalbna quddimehom, indawruhom f'opportunita'
ta' tisħiħ u tiġdid. Nemmen ukoll li rridu nżidu l-involviment taż-żgħażagħ
f'kull livell u organu tal-Partit. Il-leħen taż-żgħażagħ irid jerġa' jibda
jinħass jekk irridu nirbħu lura din il-faxxa tas-soċjeta' li sfortunatament
fl-aħħar elezzjoni l-Partit Nazzjonalista tilifha. Apparti minn hekk, importanti
li f'dawn l-organi jkollna persuni li huma tan-nies, li jagħmluha man-nies, li
jistgħu iwasslu quddiem it-tmexxija x'qed iħoss il-poplu, li fejn hemm bżonn
ikunu lesti anke jagħmlu ċertu kritika kostruttiva, imma dejjem b'lealta' lejn
il-Partit. B'lealta' nifhem li filwaqt li għandna lkoll insemmgħu leħinna u
nipparteċipaw fil-proċess tat-teħid tad-deċiżjonijiet, meta nagħżlu għal
konklużjoni għandna lkoll inkunu lesti nirrispettawha, u naċċettaw il-fatt li
dak li jiġi deċiż b'mod kollettiv huwa aħjar u aktar għaref milli dak li stajt
taħseb jew tiddeċiedi waħdek.
Personalment, inħoss li wara snin twal fil-Kumitat
Sezzjonali u seba' snin Kunsillier Lokali, nista' nagħti kontribut ikbar fi
ħdan il-Partit, dejjem jekk din tkun l-għażla tal-Kunsilliera. L-esperjenza
bħala kandidat fuq ir-raba' u l-ħames distrett fl-aħħar elezzjoni ġenerali
kompliet twessa' din l-esperjenza u tlaqqagħni ma' aktar nies. Dan issa irrid
inwasslu fil-prattika.
Pero' fuq kollox, għadni nemmen dak li għidt fil-Kunsill
Ġenerali ta' sentejn ilu: "Hemm bżonn li nerġgħu niskopru l-proċess ta’
djalogu u konsultazzjoni pubblika, kunċett li kien dal-Partit stess li daħħal
f’pajjiżna, iżda li f’ċerti deċiżjonijiet ingħata l-ġenb. Irridu nkunu Partit
aktar miftuħ għal ideat ta’ nies ta’ rieda tajba. Partit qrib tan-nies, Partit
li jisma’." Diskors fuq dawn il-linja għidt fid-diversi Kunsilli Ġenerali
li pparteċipajt fihom f'dawn is-seba' snin, u nieħu pjaċir li illum dan it-tip
ta' diskors qiegħed jinstema' ġej ukoll mit-tmexxija.
Indawru l-isfidi f'opportunitajiet
Konvint li flimkien
mal-Kap u l-amministrazzjoni l-ġdida, dan nistgħu inwettquh. Għandna triq diffiċli imma ċert li għandna
tmexxija li magħha kapaċi nimxuha, u kapaċi ndawru kull sfida f'opportunita'.
U l-aħħar kelma ta' kuraġġ tmur għat-tesserati u l-attivisti
ta' dan il-Partit. Dan il-Partit għandu għeruq b'saħħithom u ma spiċċax għax
tilef battalja. Dan kien il-Partit li dejjem emmen fil-poplu tagħna. Sa
mit-twaqqif tiegħu minn Fortunato Mizzi, il-Pater Patriae, dak li żera
f'qalb dal-poplu l-idea ta' nazzjon li għandu jippersisti għall-indipendenza u
s-sovranita' tiegħu, kien il-Partit li emmen fil-poplu. Għal Sir Ugo Mifsud u
Nerik Mizzi, u t-talba tagħhom għad-domion status biex il-poplu
Malti jmexxi ħwejġu hu. Għal
Ġorġ Borġ Olivier, missier Malta Indipendenti, li tagħna Nazzjon b'rajh
f'idejh. Għal Eddie Fenech Adami, li emmen li dal-poplu mhux biss kien kapaċi
jaħtaf l-opportunitajiet li tiftaħlu l-Unjoni Ewropea, imma kien ħa jkun kapaċi
jikkontribwixxi ma' pajjiżi kbar fit-tfassil ta' din il-komunita'. Għal
Lawrence Gonzi, li b'fiduċja sħiħa fil-ħaddiem u l-imprenditur Malti mexxa lil
pajjiżna fl-eqqel tal-agħar sfidi ekonomiċi. Il-Partit Nazzjonalista kien
dejjem il-Partit li emmen fin-nazzjon Malti. Issa pero', għandna nixorbu
minn dan l-għeruq biex aktar minn qatt qabel, nemmnu fina nfusna, fil-kapaċitajiet
tagħna, u li iva, flimkien ħa jirnexxielna nerġgħu nagħmlu lil dan il-Partit
wieħed rebbieħ.
Comments
Post a Comment