Ċittadinanzi għall-bejgħ

 
Il-Gvern Laburista immexxi minn Joseph Muscat ħareġ b'idea ġdida li, skont hu, tagħmel "id-differenza bejn ekonomija preistorika u ekonomija li tħares 'il quddiem".

Jien meta ssemmili d-differenza bejn ekonomija tal-passat u ekonomija li tħares 'il quddiem, iżjed tiġi f'moħħi id-differenza bejn il-fabbriki tal-melħ u tal-buttuni, u l-investiment li sar f'oqsma bħall-avjazzjoni, farmaċewtika, informatika, servizzi finanzjarji, gaming u life-sciences. Ekonomija diversifikata ibbażata fuq is-servizzi u manifattura avvanzata. Iżjed naħseb li dawn jagħmlu l-ekonomija tagħna waħda b'saħħitha u li tħares 'il quddiem.

Mhux hekk jaħseb il-Prim Ministru. Skont il-Prim Ministru, ir-roadmap tiegħu għall-avvanz tal-ekonomija Maltija tikkonsisti fil-bejgħ taċ-ċittadinanza Maltija lill-barranin.

Għal Prim Ministru, l-identita’ Maltija hija xi ħaġa li għandha prezz u tista’ tinbiegħ. Imma ċ-ċittadinanza m’għandhiex tkun prodott merkantili. Iċ-ċittadinanza tfisser rabta ma’ pajjiż li għalih tħoss appartenenza. Sal-lum, biex issir ċittadin Malti (sakemm ma tkunx wild ta’ ċittadin Malti) trid tqatta’ numru ta’ snin tgħix Malta, tkun taf il-Malti jew l-Ingliż, tifhem kif jaħdmu l-istituzzjonijiet Maltin u s-soċjeta’ ċivili tagħna. Tkun fhimt u ipparteċipajt fil-ħajja u l-kultura Maltija. Issa le. Issa tista’ ma tkun qatt ġejt hawn, ma tkun qatt ġejt intervistat, ma jkollokx dixxendenza Maltija, u lanqas ikollok idea x’inhi Malta. Trid biss tħallas prezz ta’ darba.

Vera li kif qal il-Prim Ministru, hemm pajjiżi oħra li jagħmlu hekk? Pajjiż wieħed li sibt li kien joffri skema bħalna kien il-Montenegro. Pajjiz kandidat għas-sħubija fl-Unjoni Ewropea, li biex ikompli n-negozjati, il-Kummissjoni Ewropea talbitu jwaqqaf din l-iskema għax ma kinitx trasparenti u kien fiha ħafna abbużi.

Il-Prim Ministru semma l-Awstrija bħala eżempju. Pero’ l-Awstrija ma tbiegħx iċ-ċittadinanza. L-iskema tal-Awstrija, tagħti ċ-ċittadinanza lil min jinvesti flus fl-Awstrija bir-riżultat li joħloq numru ta’ impjiegi. L-iskemi ta’ pajjiżi oħra huma simili: tinvesti għal numru ta’ snin, toħloq l-impjiegi, jew iddaħħal xi benefiċċju ġdid għall-ekonomija. L-iskema li qed joffri l-Gvern Malti hija differenti. La tinkludi investiment, la tinkludi li l-investitur jgħix Malta, u lanqas tinkludi li l-investitur joħloq ix-xoghol. Hija biss ħlas ta’ darba. Xirja. U xirja mihix investiment.

Hemm pajjiżi li jagħtu permess ta’ residenza (residence permit) lil min jinvesti jew jixtri propjeta’ ta’ ċertu valur. Skema simili kienet anke’ toffri Malta sa ftit ta’ snin ilu, u kienet marbuta ma’ xiri ta’ propjeta u allura kellha rabta ma’ ħolqien ta’ xogħol u flus fl-ekonomija. U xorta waħda kienet tasal sa residence permit, li hu differenti ħafna minn ċittadinanza. Fosthom id-dritt tal-vot. Min għandu permess jgħix Malta ma jfissirx li jista’ jivvota, għax mhux meqjus Malti bħali u bħalek. Imma min jieħu ċ-ċittadinanza iva. U li ċ-ċittadinanza Maltija issa ingħatalha prezz, hija offiża kbira għal dawk li vera għandhom għal qalbhom is-sovranita’ u l-identita’ nazzjonali tagħna.

Hemm żewġ aspetti oħra inkwetanti f’dak li qed jipproponi l-Gvern. L-ewwel nett li min jixtri ċ-ċittadinanza Maltija b’dan il-mod mhux ser ikollu ismu ippublikat, u t-tieni li l-Ministru tal-Intern ħa jkollu diskrezzjoni totali fid-deċiżjoni ta’ min tinħariġlu ċ-ċittadinanza jew le. U bi Gvern li jħaddem bħala konsulenti nies imtappna bi frodi u korruzzjoni bħal Shiv Nair, u b’Ministru tal-Intern li għaddej minn froġa ghal oħra, din in-nuqqas ta’ trasparenza għandha għaliex tħassibna.

Hija r-reputazzjoni ta’ pajjiżna li ħa tbati. Pajjiz li jbiegħ iċ-ċittadinanzi tiegħu hu meqjus pajjiż tallab, pajjiż fil-qiegħ. U Gvern li jinżel f’dal-livell merkantili, huwa Gvern li qata’ qalbu li joħloq ix-xogħol u investiment li jrendi kif għamlu l-gvernijiet ta’ qablu. Altru milli qabża ghall-ekonomija tal-futur, din qabża għall-ekonomija tal-passat. Bid-differenza li issa, flok ġagħluna nagħmlu l-passaporti tagħna ħodor, ħa jbiegħu l-identita’ u d-drittijiet tagħna lil min lest itihom ftit flus.

Għax €750,000 biex tixtri passaport għalik, il-mara, u tliet itfal, huma ftit ħafna.