L-ahhar appell lid-Deputati

Onorevoli Deputat,

Nindirizzawk b’dan it-titlu għax int iġġorr privileġġ. Privileġġ li bil-vot tiegħek tibdel il-liġijiet ta’ pajjiżna, liema tibdiliet għandek tagħżel li tagħmel fl-aħjar interess ta’ pajjiżna. Privileġġ li tak il-poplu Malti, poplu li biex jissejjaħ “Nazzjon” u biex jissejjaħ “Malti” u jkun jista’ jġorr dan il-passaport, għadda minn storja u minn mixja li bdiet snin ilu. Mixja li ratna nissieltu għall-Indipendenza, inwaqqfu r-Repubblika u nissieħbu fl-Unjoni Ewropea, u li fiha l-mexxejja ta’ dan il-pajjiż dejjem żammew quddiem għajnejhom il-veru interess nazzjonali.

Aħna kburin li aħna Maltin għax aħna parti minn din l-istorja, għax aħna u l-antenati tagħna imxejna din il-mixja. Oħrajn kburin li huma Maltin għax ingħaqdu fiż-żwieġ ma’ Maltin u bdew jaqsmu din il-mixja magħhom. Oħrajn kburin li huma Maltin għax qattgħu snin jgħixu f’pajjiżna, tgħallmu l-lingwa tiegħu, saru jafu l-istituzzjonijiet tiegħu, ipparteċipaw fil-ħajja soċjali u ekonomika tiegħu, u illum aħna ilkoll inħossuhom parti mill-komunita’ tagħna.

Imma ħadd minna ma għandu l-privileġġ li jġorr dan il-passaport, bid-drittijiet kollha li jġib miegħu, sempliċiment għax ħallas għalih. Din l-identita’ Maltija m’għandniex intuha prezz għax tmur oltre’ mill-kummerċjaliżmu.

U l-fatt li aħna membri tal-Unjoni Ewropea tfisser li din iċ-ċittadinanza illum hija wkoll ċittadinanza Ewropea. Dan jitfa’ fuqna responsabbilita’ doppja, għax apparti r-responsabbilita’ lejn il-poplu tagħna, għandna responsabbilita’ lejn il-kumplament tal-komunita’ Ewropea li magħha issa qed naqsmu l-mixja tagħna.

Għalhekk Onorevoli, nappellawlek biex qabel tagħti l-vot tiegħek, bħala Malti Onorevoli, iżżomm din il-mixja ta’ poplu f’moħħok. Nappellawlek biex tagħti kas tar-riżervi li qed iqajjem il-poplu fuq il-bejgħ tal-identita’ tiegħu.

Nappellawlek biex almenu, minflok ma torbot dan il-privileġġ ma’ transazzjoni ta’ bejgħ, torbtu ma’ investiment b’saħħtu li joħloq ix-xogħol f’pajjiżna u ma perjodu ta’ residenza f’pajjiżna. Dan biex iċ-ċittadin Malti jkun verament qed jaqsam mal-ħajja ekonomika u soċjali tagħna.

Nappellawlek ukoll biex dan iċ-ċittadin ikollu ismu ippublikat fil-Gazzetta tal-Gvern kif dejjem sar, għax jekk tieħu din iċ-ċittadinanza għandek tkun kburi. U min ikun kburi li sar ċittadin Malti ma jiddejjaqx ixandar dan minflok ma jistaħba wara l-anonimita’.

Nittamaw minn qalbna li illejla jirbaħ il-buon sens. Nittamaw li illejla, inti bħala Onorevoli rappreżentant taċ-ċittadini Maltin, tagħti kas ta’ dak li qed jgħidulek dawn iċ-ċittadini li eleġewk. 

Nittamaw li ma ġġibx ruħek b’mod irresponsabbli, u ma tibdilx iċ-ċittadinanza u l-identita’ tagħna minn xi ħaġa ta’ valur imma mingħajr prezz, għal xi ħaġa bi prezz imma mingħajr valur.

Għax aħna l-Passaport Malti ma xtrajniehx, imma writnieh grazzi għal dak kollu li iġġieldu għalih missirijietna.

Dejjem tiegħek,

Zghazagh Maltin