Dan l-artiklu deher fil-ħarġa tan-Nazzjon tal-Ħamis, 13 ta' Novembru, 2014
Hekk sejjaħ il-proġett tal-power-station il-ġdida l-Kap
tal-Partit Nazzjonalista Simon Busuttil. U jum wara jum qed inkomplu naraw kemm
dan hu minnu. Mhux biss il-Gvern mhux ħa jlesti dan il-progett kif Joseph
Muscat wiegħed li ħa jagħmel b’tant konvinzjoni li intrabat li jekk ma jagħmilx
hekk jirrezenja, imma talli qed ikompli jigdeb u jikkontradixxi lilu innifsu
fuq l-aspetti kollha tal-pjan tal-enerġija li ppreżenta qabel l-elezzjoni.
Wiegħed li ħa jraħħas il-kontijiet u jħallas lura d-dejn tal-Enemalta grazzi
għal kemm ħa tiffranka mill-prezz tal-fuel il-power-station il-ġdida, iżda issa
qed jgħid li ħa jkun jista’ jraħħashom anke’ mingħajrha. Id-dejn tal-Enemalta
wkoll issa qata’ qalbu minnu, u iddeċieda li jbiegħha liċ-Ċina kontra l-wegħda
li għamel lill-ħaddiema tal-Enemalta.
Il-power-station il-ġdida tal-BWSC kien
wiegħed li taqlibha għal gass l-Enemalta u tibqa’ propjeta’ tagħha, minflok
illum biegħha liċ-Ċinizi wkoll, u issa qed jgħid li għadu qed ifittex
investitur li jħallas biex tinqeleb għal gass. Wiegħed li sa ma jaqlibha għal
gass, iħaddimha bid-diesel, pero’ għadha s’issa tahdem bl-HFO, li issa hu stess
qed jammetti li wassal għal enerġija u arja aktar nadifa wara li beżża’
lin-nies ta’ Marsaxlokk bil-mard tal-kanċer għalxejn qabel l-elezzjoni.
Ftiehem
għal prezz fiss għal ħames snin biss, bi prezz li ha jinbidel fit-tlettax-il
sena ta’ wara li fihom xorta ħa nkunu marbutin minn għand min nixtru
l-elettriku. Probabilment elettriku żejjed li mhux ħa jkollna bżonn, għax kemm
il-konsorzju tal-power-station il-ġdida u kemm iċ-Ċinizi li xtraw
il-power-station tal-BWSC iriduh jixtri l-elettriku kollu tagħhom, li
fil-maġġoranza tal-ħin huwa d-doppju ta’ kemm għandna bżonn.
Biex jgħatti din il-balbuljata, il-Gvern qed jgħid li ħa
jbiegħ l-elettriku żejjed minn fuq l-interconnector. Ejja ngħidu li dan ikun
possibli. Fl-Ewropa bħalissa għaddej proċess ta’ armonizzazzjoni ta’ prezzijiet
tal-elettriku, fejn il-prezzijiet bħalissa qed ivarjaw bejn it-3ċ5 u l-4ċ8 għal
kull unit. Biex il-Gvern ibiegħ l-elettriku fl-Ewropa, irid jikkompeti b’dawk
il-prezzijiet. Niftakru li l-prezz li bih intrabat li jixtri l-elettriku minn
għand l-Electrogas, il-konsorzju tal-power-station il-ġdida, huwa ta’ 9ċ6. Mela
anke jekk ibiegħ dan l-elettriku fl-Ewropa, il-Gvern ħa jkun qed ibiegħu
bin-nofs ta’ kemm qed jixtrieħ, u allura b’telf konsiderevoli.
Hawnhekk iqumu ħafna aktar mistoqsijiet interessanti. La
l-prezzijiet fis-suq Ewropew huma prattikament in-nofs ta’ dak li ħa tkun qed
ibiegħ bih il-konsorzju l-ġdid, għalfejn fil-pjan tal-Gvern ħa nkunu qed nużaw
l-interconnector ftit ħafna u nixtru l-elettriku bid-doppju tal-prezz minn
għand l-Electrogas? Għalfejn ħa nintrabtu li nixtru l-enerġija minn għand
kumpanija waħda għal 18-il sena sħaħ, meta din il-kumpanija ġa qed ittina prezz
li hu d-doppju ta’ dak li nsibu fl-Ewropa?
U allura wieħed mill-ewwel jiġuh dubji għala l-Gvern
iddeċieda li jagħti l-akbar kuntratt li qatt ingħata fl-istorja ta’ pajjizna,
kuntratt ta’ kwazi 400 miljun ewro, mingħajr ma għadda mill-proċess sħiħ ta’
tender. L-iskuża kienet li ried ilesti malajr, sa Marzu li ġej, biex jibda
jiffranka l-flus u jraħħas il-kontijiet. Imma illum nafu li dan mhux ħa jsir. U
allura l-mistoqsija tqum aktar qawwija minn qabel: għalfejn Konrad Mizzi u Joseph
Muscat taw kuntratt mingħajr tender lil konsorzju li ħa jbigħielna l-enerġija
b’tariffa li hi d-doppju ta’ dak li nistgħu nixtru mis-suq Ewropew grazzi
għall-interconnector?
Din hi l-mistoqsija li qed tpoġġi lil Joseph Muscat u lil
Konrad Mizzi daharhom mal-ħajt, u li qed iġġegħlhom jippruvaw idevjaw
l-attenzjoni billi jitfgħu t-tajn u jigdbu fuq ħaddieħor.
Comments
Post a Comment