"Jekk partit politiku ma huwiex mibni fuq id-determinazzjoni
li jmexxi 'l quddiem kawża li hi ġusta u li hi morali, mela allura ma huwiex
partit politiku; huwa biss konfoffa biex jinħataf il-poter".
Sinjura President, għażiż Kap, Viċi-Kap, sħabi kunsilliera,
Dan il-kliem, tal-ekx President Amerikan Dwight Eisenhower, ġie
f'moħħi f'dawn il-ġimgħat li fihom, dan il-Gvern Laburista waqgħetlu l-maskla
ta' moviment progressiv, modern, trasparenti, li prova jpinġi qabel l-elezzjoni
u l-poplu illum qed jara b'mod ċar li taħt dik il-maskla hemm moviment ta'
ingann, moviment li ried biss jaħtaf il-poter u jużah mhux biex iservi imma
biex jisserva, u tal-qalba jiffangaw kemm jifilħu.
Minix ha nerġa' nirrepeti l-punti rigward il-budget li semma b'mod
dettaljat il-Kap tal-Partit Simon Busuttil fid-diskors eċċellenti li għamel
fil-Parlament.
Ħa nitkellem fuq l-iżviluppi inkwetanti li qed jitkellmu fuqhom
in-nies hemm barra. Inkwetanti għax l-aħħar darba li n-nies jiftakru xufiera
tal-Ministri jisparaw fit-triq, kien 28 sena ilu. Pero' mhux dak l-aktar li
inkwieta lin-nies. L-aktar li inkwieta lin-nies kien li bħal 28 sena ilu, min spara
sab Korp tal-Pulizija u Gvern jippruvaw jgħattulu. Jinkwetaw in-nies li l-Ministru ħareġ stqarrija giddieba, fejn ipprova jigdeb fuq dak li sparaw fuqu, ipprova
jiddefendi lil min spara, fejn gideb li kienu biss warning shots, fejn ivvinta
li kien hemm hit-and-run. Jinkwetaw in-nies li l-Korp tal-Pulizija, flok mexa
mal-proċedura, bagħbas il-provi fuq ix-xena tar-reat qabel saret l-inkjesta.
Dan kien xokk, speċjalment għal ġenerazzjoni tiegħi li dejjem
għexna f'ambjent trankwill, ambjent fejn stajt isserraħ moħħok li jekk xi darba
tkun vittma ta' xi ħaġa, ħa ssib l-awtoritajiet jaqbżu għalik u mhux jaqbżu
għal min jaggredik.
U għalhekk dal-kaz, wera l-periklu li jinħoloq meta jkollok Partit
fil-Gvern li jibbaża ruħu biss fuq in-nepotiżmu, fuq li naqbżu għal dawk ta’
magħna, għal "tal-familja", anke’ meta dawn jiksru l-ligi. U inutli
Joseph Muscat jipprova jaħsel idu minn dak li ġara, għax din l-attitudni ma hi
responsabbilita' ta' ħadd ħlief tiegħu.
Kien il-Prim Ministru li żera’ din l-attitudni meta ipproteġa
Mħallef li nstab ħati ta' mġieba skorretta u ma ressaqx il-mozzjoni ta'
impeachment fil-Parlament qabel ma dan irtira. U kompla jiżra’ din l-attitudni meta min instab ħati u ġie
kkundannat mill-Qorti Kriminali b'sentenza sospiża, il-Prim Ministru, flok ra li
jiħraxu l-pieni għal reati simili biex jipproteġi vittmi oħra, għammed lill-ħati
"suldat tal-azzar", għamlu eroj, anzi tah job komdu Dar
Malta! Dakinhar, f’dak it-tghanniq taħt it-tinda, il-Prim Ministru
bagħat messaġġ li jekk inti "tal-qalba”, “tal-familja", tista' tikser
il-liġi kemm trid għax ħa ssib il-Gvern Laburista jaqbeż għalik.
U dan jinkwieta lin-nies, għax nistgħu forsi ma naqblux fuq
il-budget, nistgħu ma naqblux fuq kif jinħoloq u jitqassam it-tkabbir
ekonomiku, imma fuq dawn il-prinċipji fundamentali: l-ugwaljanza quddiem
il-liġi, l-indipendenza tal-korp tal-pulizija u tal-forzi tal-ordni,
il-ġustizzja, is-saltna tad-dritt, il-prinċipji bażiċi li jagħmluna
demokrazija, għandna naqblu. Għax dawn huma prinċipji li ġġiliedna għalihom, ħdimna għalihom, uħud minnkom hawn qlajtu l-gass tad-dmugħ għalihom, u saħansitra kien hemm min xerred id-demm għalihom. U dawn il-prinċipji irridu niddefenduhom, niġġieldu għalihom, u ma nħallu lil ħadd inawwarhom mingħajr ma nieħdu azzjoni.
U allura din ħbieb tiegħi, trid tkun il-kawża ġusta, il-kawża
morali tagħna. Il-politika onesta. Il-politika mibnija fuq il-verita u mhux fuq
l-ingann. Politika mibnija fuq il-ġustizzja soċjali u mhux fuq l-iffangar minn
tal-qalba. Politika mibnija fuq il-ġid komuni u mhux fuq l-interessi tal-ftit.
U jien konvint li Simon Busuttil huwa l-bniedem li jista' jerġa' jagħti
lin-nies fiduċja fil-politika bħala servizz u bħala għodda biex isir il-ġid,
b’politika li tħares dawn il-prinċipji fundamentali ta’ demokrazija.
Pero dan ma jistax jagħmlu waħdu. Hemm bżonn li flimkien,
bħala poplu, niġġieldu l-kultura ta' omerta' li qed isaħħaħ dan il-Gvern. M’għandniex
nibqgħu naċċettaw kollox, u noqogħdu għal kollox. Tibżgħux titkellmu, ejja ma nibżghux nieqfulu lil dan il-Gvern, u kunu ċerti li ha ssibu l-Partit Nazzjonalista
magħkom, tarka tagħkom, biex iva flimkien, nibdlu l-kultura politika ta’
pajjiżna. Flimkien mal-Kap tagħna Simon Busuttil, nistgħu nerġgħu nagħmlu
mill-politika, għodda onesta ta' servizz, għodda li tmexxi l-quddiem il-ġid
komuni, u tarka vera għal dawk li huma l-aktar vulnerabbli.
Comments
Post a Comment