Risposta ta' Statista

Dan l-artiklu deher fil-ħarġa tan-Nazzjon tal-Ħamis 22 ta' Ottubru 2015

It-Tnjen li għadda, il-Kap tal-Oppożizzjoni Simon Busuttil għamel ir-replika tiegħu fil-Parlament għal budget li ħabbar dan il-Gvern ġimgħa qabel. Kien diskors li fih Simon Busuttil wera kif Partit Nazzjonalista fil-Gvern kien jagħmel aħjar. Barra minn hekk, kompla jikxef l-iskandli ta’ dan il-Gvern, u kif il-ġid li qed jinħoloq flok jinqasam b’mod ġust jew jintefaq fi proġetti li jgawdi minnhom kulħadd, qiegħed jinqasam bejn il-ftit tal-qalba li qed jiffangaw bil-għama.

Kwotazzjoni li spiss tissemma hija li “politiku ħsiebu fl-elezzjoni li jmiss, statista ħsiebu fil-ġenerazzjoni li jmiss”. U naħseb m’hemmx sentenza li toħroġ aħjar id-differenza bejn Joseph Muscat u Simon Busuttil f’kull aspett tal-budget.

Minħabba li limitat bl-ispazju, għal-lum ħa nħares biss lejn il-qagħda ekonomika. Joseph Muscat jiftaħar biss li l-ekonomija qed tikber. Ma jsemmi xejn fuq kif qed tikber u minn x’hiex inhu xprunat dan it-tkabbir. Mhux hekk Simon Busuttil. Mhux in-nies qegħdin hemm għall-ekonomija, imma l-ekonomija qegħda hemm għan-nies, allura mhix l-ekonomija waħedha li għandha tkun il-kejl ta’ kollox. Fir-replika tiegħu, Simon Busuttil spjega kif l-ekonomija qed tikber mhux b’mod sostenibbli, imma għax qed jonfoq aktar il-Gvern. U ara taħsbu li l-Gvern qed jonfoq aktar għax qed iwettaq xi proġetti kapitali u infrastrutturali li ħa jgħinu l-pajjiż jagħmel progress u jkun lest għall-isfidi ta’ għada. Anzi. Il-Gvern naqqas il-vot kapitali għall-infrastruttura b’€125 miljun! F’sentejn għamel €600 miljun dejn, mingħajr ma’ għamel proġett infrastrutturali wieħed, ħlief kompla dawk li beda Gvern Nazzjonalista, u ħafna minnhom b’fondi tal-Unjoni Ewropea. Mela fejn qed jintefqu dawn il-flus? Qed jintefqu f’pagi, f’konsulenzi u fit-tbaħrit tal-ħbieb tal-qalba. In-nefqa rikorrenti fuq il-pagi tal-Gvern kibret b’€180 miljun! Dawn huma flus li jridu jibqgħdu jintefqu sena wara l-oħra, u allura jekk darba fost l-oħrajn tinqala’ xi kriżi ekonomika li titlobna nieħdu miżuri ta’ awsterità, ma nkunux nistgħu nnaqqsu l-ispiża rikorrenti ta’ kull sena, u jkollhom jonqsu l-proġetti infrastrutturali meta l-aktar li jkun hemm bżonnhom. Daqshekk ma jimpurtahx mill-ġenerazzjoni ta’ għada Joseph Muscat.

 Il-qgħad li Muscat jiftaħar tant li naqqas, ukol qed jonqos mhux għax qed nattiraw xi investiment privat ġdid (għadna ma smajna bl-ebda kumpanija ġdid li investiet f’Malta u ħadmet in-nies f’dawn is-sentejn), imma għax qed iħaddem aktar nies mal-Gvern hu, u qed iqaċċat in-nies mir-reġistrar. Spiża li ħa jibqa’ jsib ma’ wiċċu kull Gvern li jmiss. Daqs kemm irnexxielu jnaqqas nies minn mal-Gvern il-Partit Nazzjonalista f’għaxar snin, Joseph Muscat reġa’ żiedhom f’sentejn biss.

U allura, meta wieħed jara l-ispejjeż fuq pagi u konsulenzi jiżdiedu, waqt li proġetti infrastrutturali jonqsu, wieħed jinduna li pajjiżna qiegħed f’sitwazzjoni fejn flok jiddejjen biex jinvesti, qed jiddejjen biex jitma’. Qisu missier ta’ familja li flok jieħu self mill-bank biex jibni sular, jew jixtri l-għamara, jieħu self mill-bank biex iżid il-pocket-money lit-tfal ħalli jibqgħu iċapċpulu. Imma din x’responsabbilità hi?

Fi ftit kliem, fuq naħa għandna lil dan il-Gvern moħħu biss fl-immedjat, fil-mument ta’ issa, f’kif ħa jimla l-bwiet ta’ min irid hu, f’kif ħa jagħmel “xi nies sinjuri” kif qalilna Toni Abela (li llum sirna nafu li hu wieħed minn dawk li qed isiru tabilħaqq sinjuri, għax konsulent fuq it-tfittxija taż-żejt, konsulent fuq it-traffiku, u konsulent fuq il-faqar), mingħajr ma jagħti kas ta’ xejn tal-ġejjieni u ta’ kif ħa jsaħħaħ ‘il-pajjiż għal futur. Fuq in-naħa l-oħra għandna l-Partit Nazzjonalista mmexxi minn Simon Busuttil, lest biex ikun Gvern alternattiv, Gvern bi proposti konkreti li flok jiffukaw biss fuq il-mument ta’ issa, jiffukaw fuq x’investiment għandu bżonn il-pajjiż biex ikompli jissaħħaħ u jkun lest jilqa’ l-isfidi ta’ għada, filwaqt li jattira setturi ekonomiċi ġodda biex ikompli joħloq impjiegi ta’ kwalità għal uliedna, kif dejjem għamel Partit Nazzjonalista fil-Gvern. Għalhekk, illum kulħadd qed jinduna li l-veru statista u l-Prim Ministru ta’ għada li jista’ jwettaq il-vera bidla li l-poplu xtaq huwa Simon Busuttil.