Dan l-artiklu deher fil-ħarġa tan-Nazzjon tal-Ħamis 3 ta' Diċembru 2015
Hija theddida li għandek tistenna jekk int tikkritika lil xi
ħadd, skont il-Ministru tal-Libertajiet Ċivili u l-Ugwaljanza Helena Dalli. Ma
tarax tiftaħ ħalqek, tgħidilna li qed nagħmlu l-affarijiet ħażin, u ma
tistenniex li xi Deputat, xi rappreżentant tal-poplu, jheddek li jiġi għalik u
jivvjolentak?
F’sentenza waħda, il-Ministru Helena Dalli ħattet il-ġlidiet
u l-kampanji kollha li saru minn gvernijiet suċċessivi kontra l-vjolenza
domestika, kontra l-preġudizzju li dejjem żvantaġġja lill-mara.
Huma ħafna n-nisa li jibżgħu jirrappurtaw vjolenza
domestika. Li joqogħdu lura. Li għal snin sħaħ, meta irrappurtaw każi simili,
ġew milqugħa lura mir-risposta “imma int x’għamiltlu biex għamillek hekk?”
Kampanja wara kampanja ta’ informazzjoni, iġġieldet dan it-tip ta’ rispons.
Il-Puliziji ġew mgħallma biex ma jaċċettaw qatt il-vjolenza domestika bħala
reazzjoni ġustifikata għal xi aġir ieħor, u lanqas ma jagħtu xi forma ta’
reazzjoni li biha l-vittma tista’ tinterpreta l-vjolenza b’dak il-mod. Għax
il-vjolenza mhi ġustifikata u skużata qatt.
U f’dan il-lat għad baqa’ xi jsir, ħafna. Għadek issib nies
li meta jisimgħu b’każi ta’ vjolenza domestika jirreaġixxu b’mod li jiskużawha
għax jassumu li kien hemm xi provokazzjoni jew xi raġuni għaliha. Għadek issib
nies li anke’ meta jisimgħu bi stupru, jippruvaw jitfgħu parti mit-tort fuq
il-mara, fuq x’libset jew kif ġabet ruħha, u li kienet hi li pprovokat dik
ir-reazzjoni. U dan hu ħażin.
U allura, f’dan il-kuntest, jidher ħafna u ħafna aktar gravi
l-kumment tal-Ministru Dalli, li għal ġieħna hi l-Ministru tal-Ugwaljanza u
l-Libertajiet Ċivili, li tipprova tiġġustifika theddida ta’ vjolenza minn raġel
fuq mara, għax skont hi kienet il-mara li pprovokatu bi kliemha.
Tajjeb infakkru l-kuntest li fih sar dan it-theddid. Kienet
sessjoni tal-Parlament, wara ġimgħa li fiha Marlene Farrugia irriżenjat
mill-Grupp Parlamentari Laburista għax dan il-grupp kien qed jivvota kontra dak
li huma stess wegħdu fil-manifest elettorali, u li fiha d-Deputat Farrugia
kritikat dan l-aġir. F’sessjoni suċċessiva, waqt li hi lanqas biss kienet
fil-pussess tal-kamra u lanqas biss kienet qed titkellem, id-Deputat Joe Debono
Grech qabad jgħajjat u jgħajjarha. X’kienet il-provokazzjoni? Il-kritika li din
id-Deputat bħala rappreżentant tal-poplu għamlet lill-Gvern li ivvota kontra
dak li wiegħed qabel l-elezzjoni. U f’nofs dan it-tgħajjir, Debono Grech
jhedded li jivvjolentaha.
Hija ħasra li fid-diskussjoni tal-mozzjoni li biha
l-Oppożizzjoni ikkundannat l-aġir ta’ Debono Grech, u r-ruling tal-ispeaker li
poġġa t-theddid ta’ Debono Grech fl-istess livell tal-kliem lura li qalet
Farrugia, Debono Grech sab l-appoġġ ta’ tliet nisa mill-Grupp Parlamentari
Laburista: Justyne Caruana, Deborah Schembri u Helena Dalli. Iġġustifikawh,
iddefendewh, u tefgħu t-tort fuq min ipprovokah. Anzi l-Ministru tal-Ugwaljanza
kompliet tgħaxxaqha matul dil-ġimgħa meta qalet li Deputat mara indipendenti
għandha l-istess poter u saħħa ta’ Deputat raġel fih daqsha darbtejn meta dan
jheddida li jivvjolentaha.
Mhux ta’ b’xejn li Farrugia qalet li l-pożizzjoni ta’ Dalli
m’għadhiex tenibbli u għandha tirriżenja minnufih.
Għax il-messaġġ li bagħtet Dalli, li bagħat Muscat, u li
bagħat il-Gvern Laburista huwa li f’Malta liberali u progressiva, jekk tikkritika
tkun qed tistedinha. Jekk tgħajjar, stenna l-vjolenza lura.
U b’mod speċjali jekk tikkritika l-Gvern, tkun qed
tipprovoka, tkun qed tiġġustifika t-theddid ta’ vjolenza fuqek, u jekk xi ħadd
jheddek u jsawwtek, miskin int għax tkun ġibtha fuqek b’idejk.
Comments
Post a Comment