Dan l-artiklu deher fil-ħarġa tan-Nazzjon tal-Ħamis 7 ta' Jannar 2016
Bdiet sena oħra, u f'dan iż-żmien huwa tajjeb li nħarsu lura lejn is-sena li għada kemm għaddiet. Fil-lat politiku nazzjonali, kienet sena interessanti ferm. Sena li rat żvolta fil-mod kif issir il-politika kemm fuq in-naħa tal-Gvern, u kemm fuq in-naħa tal-Oppożizzjoni.
Sfortunatament, rajna Gvern li matul is-sena li għaddiet sar aktar sfaċċat fl-iskandli li jħalli għaddejjin, jew saħansitra jorkestra hu. L-istorja ta' Gaffarena, li tibda mill-permess għal pompa illegali, tkompli bl-oxxenita' tal-artijiet tal-Gvern li ingħata wara esproprjazzjoni immuntata fuq kwart ta' proprjeta' fil-Belt. L-istorja tal-familja Zammit, li jinstab li kienet imsieħba fin-negozju ma' Gaffarena, bit-tifel ta' Zammit fl-istess ħin jinvestiga lir-raġel tat-tifla ta' Gaffarena dwar qtil, u l-istess tifel jgħaddi bord minn mal-Pulizija u jiddaħħal fl-Enemalta għal għexieren ta' eluf ta' ewro. Stejjer li lanqas jekk tkun qed tikteb telenovella ma jiġuk f'moħħok.
Agħar minn hekk kien hemm diversi skandli orkestrati jew approvati mill-Prim Ministru. Dak tal-Cafè Premier, approvat mill-email privata tal-Prim Ministru nnifsu; l-14,000 visa u permessi tar-residenza foloz lil Libjani bl-involviment tat-Teżorier tal-Partit Laburista u tas-7,000 visa lil Alġerini maħruġin mill-Konsolat ġdid li Joseph Muscat stess fetaħ u li poġġa fih lil kuġinuh; it-taħwida tal-art taż-Żonqor u tal-baċir ta' Bormla li ttieħdet mill-poplu u ingħatat għal ċuċata lil persuna li għażel il-Prim Ministru, mingħajr ebda sejħa għall-offerti, u mingħajr esperjenza fil-qasam edukattiv; il-garanzija bankarja ta' 360 miljun ewro li l-Gvern ta minn flusna għal power-station li m'għandniex bżonn, u li dettalji tagħha ma taniex għax fi kliem Edward Scicluna "jkun hemm effett ħażin ħafna fuq l-ekonomija" jekk joħorġu d-dettalji; u l-permess li inħareġ b'ingann u b'abbuż lis-Segretarju Parlamentari Ian Borġ, fejn il-Prim Ministru qed jiddefendieh u jirrifjuta li jagħti każ dak li qalu kemm l-Ombudsman u kemm il-Kummissjoni Permanenti Kontra l-Korruzzjoni biex dan il-permess jitraġġa' lura.
Dan wassal biex f'din is-sena naqqset sew il-fiduċja tan-nies fil-politika. U dan ħareġ f'diversi surveys li ġew ippublikati. Lejn l-aħħar tas-sena, ħareġ ukoll survey fost in-negozjanti u kuntratturi li juri li żdied sew in-numru ta' dawk li jemmnu li biex tirbaħ tender jew kuntratt mal-Gvern trid tiffinanzja l-Partit politiku jew ixxaħħam lil xi ħadd. Kif jgħid il-Malti, il-qasba ma ċċaqċaqx għalxejn, u dan is-sentiment ta' korruzzjoni istituzzjonalizzata minn fuq qed jinħass sew fost il-poplu.
Sfortunatament spiċċajna bi Gvern li flok juża l-liġi biex jipproteġi l-poplu, jara kif idur mal-liġi biex jisraq lill-poplu ħalli jgawdu tal-qalba u dawk qrib Muscat.
B'kuntrast ma' dan, u jkolli ngħid b'sens ta' tama wkoll, kien hemm żvolta opposta fil-Partit Nazzjonalista. Apparti d-diversi każi fejn il-Kap tal-Partit Nazzjonalista Simon Busuttil wera kif qed jgħolli l-istandards ta' mġieba li jistenna mid-Deputati u mill-membri tal-Partit, il-Partit Nazzjonalista beda jippreżenta ruħu wkoll bħala Gvern alternattiv. Apparti milli jikkritika lill-Gvern, qed jgħid ċar u tond ukoll hu x'ser ikun qed jagħmel minflok meta jkun fil-Gvern. Għal dan il-għan, ippubblika żewġ dokumenti importanti: "Ekonomija għan-nies", fejn fih jagħti l-viżjoni ekonomika tiegħu biex il-ġid jinqasam b'mod iżjed ġust għal kulħadd, u "Nibnu fiduċja ġdid fil-politika", li fih il-Partit Nazzjonalista jagħti aktar minn mitt proposta ta' kif ser ikun qed ireġġa' lura standards ta' governanza tajba u mġieba korretta fost il-politiċi.
Il-Partit Nazzjonalista qed iżomm il-wegħdi tiegħu li jkun onest u jgħid minn qabel x'ser jagħmel. Qiegħed ukoll jagħmel patt ċar mal-poplu ta' x'ser ikun il-kejl li bih ħa jkun qed jimxi fil-Gvern. U qiegħed jibdel il-politika, billi għall-ewwel darba qed naraw partit li jipproponi mill-Oppożizzjoni. Dawn jawgura tajjeb għal futur.
L-isfida l-kbira ta' din is-sena għal Partit Nazzjonalista ser tkun li jikkonvinċi lil dawk li huma diżillużi mill-politika, li dak li qiegħed iwiegħed ser iżommu, u li mhux biss ser ikun aħjar minn Joseph Muscat illum, imma anke aħjar milli kien il-Partit Nazzjonalista stess fil-passat.
Bdiet sena oħra, u f'dan iż-żmien huwa tajjeb li nħarsu lura lejn is-sena li għada kemm għaddiet. Fil-lat politiku nazzjonali, kienet sena interessanti ferm. Sena li rat żvolta fil-mod kif issir il-politika kemm fuq in-naħa tal-Gvern, u kemm fuq in-naħa tal-Oppożizzjoni.
Sfortunatament, rajna Gvern li matul is-sena li għaddiet sar aktar sfaċċat fl-iskandli li jħalli għaddejjin, jew saħansitra jorkestra hu. L-istorja ta' Gaffarena, li tibda mill-permess għal pompa illegali, tkompli bl-oxxenita' tal-artijiet tal-Gvern li ingħata wara esproprjazzjoni immuntata fuq kwart ta' proprjeta' fil-Belt. L-istorja tal-familja Zammit, li jinstab li kienet imsieħba fin-negozju ma' Gaffarena, bit-tifel ta' Zammit fl-istess ħin jinvestiga lir-raġel tat-tifla ta' Gaffarena dwar qtil, u l-istess tifel jgħaddi bord minn mal-Pulizija u jiddaħħal fl-Enemalta għal għexieren ta' eluf ta' ewro. Stejjer li lanqas jekk tkun qed tikteb telenovella ma jiġuk f'moħħok.
Agħar minn hekk kien hemm diversi skandli orkestrati jew approvati mill-Prim Ministru. Dak tal-Cafè Premier, approvat mill-email privata tal-Prim Ministru nnifsu; l-14,000 visa u permessi tar-residenza foloz lil Libjani bl-involviment tat-Teżorier tal-Partit Laburista u tas-7,000 visa lil Alġerini maħruġin mill-Konsolat ġdid li Joseph Muscat stess fetaħ u li poġġa fih lil kuġinuh; it-taħwida tal-art taż-Żonqor u tal-baċir ta' Bormla li ttieħdet mill-poplu u ingħatat għal ċuċata lil persuna li għażel il-Prim Ministru, mingħajr ebda sejħa għall-offerti, u mingħajr esperjenza fil-qasam edukattiv; il-garanzija bankarja ta' 360 miljun ewro li l-Gvern ta minn flusna għal power-station li m'għandniex bżonn, u li dettalji tagħha ma taniex għax fi kliem Edward Scicluna "jkun hemm effett ħażin ħafna fuq l-ekonomija" jekk joħorġu d-dettalji; u l-permess li inħareġ b'ingann u b'abbuż lis-Segretarju Parlamentari Ian Borġ, fejn il-Prim Ministru qed jiddefendieh u jirrifjuta li jagħti każ dak li qalu kemm l-Ombudsman u kemm il-Kummissjoni Permanenti Kontra l-Korruzzjoni biex dan il-permess jitraġġa' lura.
Dan wassal biex f'din is-sena naqqset sew il-fiduċja tan-nies fil-politika. U dan ħareġ f'diversi surveys li ġew ippublikati. Lejn l-aħħar tas-sena, ħareġ ukoll survey fost in-negozjanti u kuntratturi li juri li żdied sew in-numru ta' dawk li jemmnu li biex tirbaħ tender jew kuntratt mal-Gvern trid tiffinanzja l-Partit politiku jew ixxaħħam lil xi ħadd. Kif jgħid il-Malti, il-qasba ma ċċaqċaqx għalxejn, u dan is-sentiment ta' korruzzjoni istituzzjonalizzata minn fuq qed jinħass sew fost il-poplu.
Sfortunatament spiċċajna bi Gvern li flok juża l-liġi biex jipproteġi l-poplu, jara kif idur mal-liġi biex jisraq lill-poplu ħalli jgawdu tal-qalba u dawk qrib Muscat.
B'kuntrast ma' dan, u jkolli ngħid b'sens ta' tama wkoll, kien hemm żvolta opposta fil-Partit Nazzjonalista. Apparti d-diversi każi fejn il-Kap tal-Partit Nazzjonalista Simon Busuttil wera kif qed jgħolli l-istandards ta' mġieba li jistenna mid-Deputati u mill-membri tal-Partit, il-Partit Nazzjonalista beda jippreżenta ruħu wkoll bħala Gvern alternattiv. Apparti milli jikkritika lill-Gvern, qed jgħid ċar u tond ukoll hu x'ser ikun qed jagħmel minflok meta jkun fil-Gvern. Għal dan il-għan, ippubblika żewġ dokumenti importanti: "Ekonomija għan-nies", fejn fih jagħti l-viżjoni ekonomika tiegħu biex il-ġid jinqasam b'mod iżjed ġust għal kulħadd, u "Nibnu fiduċja ġdid fil-politika", li fih il-Partit Nazzjonalista jagħti aktar minn mitt proposta ta' kif ser ikun qed ireġġa' lura standards ta' governanza tajba u mġieba korretta fost il-politiċi.
Il-Partit Nazzjonalista qed iżomm il-wegħdi tiegħu li jkun onest u jgħid minn qabel x'ser jagħmel. Qiegħed ukoll jagħmel patt ċar mal-poplu ta' x'ser ikun il-kejl li bih ħa jkun qed jimxi fil-Gvern. U qiegħed jibdel il-politika, billi għall-ewwel darba qed naraw partit li jipproponi mill-Oppożizzjoni. Dawn jawgura tajjeb għal futur.
L-isfida l-kbira ta' din is-sena għal Partit Nazzjonalista ser tkun li jikkonvinċi lil dawk li huma diżillużi mill-politika, li dak li qiegħed iwiegħed ser iżommu, u li mhux biss ser ikun aħjar minn Joseph Muscat illum, imma anke aħjar milli kien il-Partit Nazzjonalista stess fil-passat.
Comments
Post a Comment