Għalfejn Panama?

Dan l-artiklu deher fil-ħarġa tan-Nazzjon tal-Erbgħa 2 ta' Marzu 2016

L-aħbar li l-Ministru Konrad Mizzi waqqaf kumpanija sigrieta fil-Panama, f’isem trust li waqqaf f’New Zealand, fiż-żmien li hu kien Ministru, ixxukkjat lil kulħadd. Aktar u aktar għal fatt li Mizzi kien jipprova jagħti l-impressjoni ta’ politiku ġdid u modern.

Għalkemm Konrad Mizzi prova jagħti l-impressjoni li qed jiddikjara dan kollu biex ikun trasparenti, il-verità hi li kien kostrett jitkellem fuqu għax dan ġie żvelat mill-ġurnalista Daphne Caruana Galizia. Li kieku Konrad Mizzi ried jiddikjara din il-kumpanija sigrieta, ma kienx jinkorpora fil-Panama. Inkorpora fil-Panama biss għal fatt li din hi ġurisdizzjoni li ma tiżvela xejn mit-transazzjonijiet li jkunu għaddejjin f’dawn il-kumpaniji sigriet. Tant hu hekk li din hi blacklisted mill-Unjoni Ewropea stess li aħna nagħmlu parti minna! Din waħedha ukoll hi raġuni għala Mizzi għandu jirriżenja. Kif jista’ jkollok fiduċja f’Ministru li jmur kontra l-blacklisting tal-Gvern li jagħmel parti minnu hu stess?

Aktar minn hekk, ir-raġuni għala l-Panama hija blacklisted huwa għax din ma tikkoperax mal-investigazzjonijiet ta’ pajjiżi oħra rigward ħasil ta’ flus, qliegħ mill-korruzzjoni u finanzjament ta’ terroriżmu. U allura li jkollok Ministru ta’ Gvern li jpoġġi dan is-suspett ikrah fuqu hija gravi ħafna.

Konrad Mizzi qed jipprova jbellagħhielna li waqqaf din il-kumpanija biex teħodlu ħsieb l-assi tiegħu. Pero’ x’assi iddikjara hu fil-Parlament? Iddikjara dar f’Londra, dar f’Malta, €300,000 f’depożiti u daqstant ieħor f’self. Dan ifisser li d-dar ta’ Londra jew ta’ Malta għadhom taħt self mill-bank, u allura l-bank ma jħalliehx imexxiehom f’kumpanija jew trust, waqt li l-ammont ta’ flus hu żgħir wisq biex jiġġustifika t-twaqqif ta’ dan is-setup moħbi u kumplikat. U wieħed jistaqsi, x’sens qatt jista’ jagħmel li jmexxi flusu minn fuq ismu għal fuq kumpanija tiegħu? Biex jiffranka t-taxxa? Lanqas din mhi raġuni, għax il-paga tiegħu toħroġ dirett mill-Gvern u jiġi intaxxat mis-sors mal-ewwel. U peress li hu Ministru, ma jista’ jkollu l-ebda paga oħra.

Allura r-raġuni hija waħda: din il-kumpanija ma twaqqfitx biex jitmexxew flus fiha, imma biex jidħlu fiha flus ġodda. U la għażel li jwaqqafha f’post sigriet bħal Panama, ma ttinix tort naħsbu li l-flus li jridu jidħlu fiha ġejjin minn attività illeċta.

Speċjalment issa li nafu li dan is-setup ma sarx minnu biss, imma sar ukoll minn Keith Schembri, iċ-Chief-of-Staff fl-uffiċċju tal-Prim Ministru. U li t-tnejn li huma dan sarilhom mill-istess persuna, Brian Tonna, li għandu uffiċċju f’Kastilja. U li l-kumpanija twaqqfitilhom fil-Panama mid-ditta legali Mossack Fonseca, li qisu din kienet parti mir-roadmap, fetħet proprju uffiċċju f’Malta xahrejn wara l-elezzjoni tal-2013 mill-istess Brian Tonna. U li skont artikli f’ġurnali internazzjonali, din hija d-ditta li tintuża mid-dittaturi, oligarki, terroristi, u ħassiela tal-flus. U li t-tnejn sarilhom fiż-żmien meta flimkien ma’ Joseph Muscat u Kurt Farrugia, marru l-Azerbaijan mingħajr ma ħadu lil ħadd mis-servizz pubbliku jew diplomatiku kif isir is-soltu, u għamlu ftehim taż-żejt li minnu pajjiżna tilef €14-il miljun. U li dan huwa l-istess Ministru li biegħ l-akbar assi tal-pajjiż: l-Enemalta, il-power-station tal-BWSC, l-ipprivatizzar tal-isptar San Luqa, il-ftehim ma’ Barts, u l-kuntratt tal-Electrogas – kollha kuntratti li għadhom s’issa moħbija.

Iriduna nemmnu li dan kollu kumbinazzjoni, u li tant aħna imzazen li ma nafux ngħoddu mill-wieħed sal-għaxra. Qed jipprova jbellagħhielna li ħa jiġi investigat mill-Kummissarju tat-Taxxa, meta nafu li l-Panama mhi ħa ttih l-ebda informazzjoni. Qed jipprova jbellagħhielna li kollox sewwa għax issa ħa jagħlaqha, meta ma għandna l-ebda garanzija li l-għada jiftaħ ħamsa oħra flokha.

Bi sħaba sewda bħal din fuqu, kwalnukwe’ Prim Ministru li jġib lil pajjiżu l-ewwel, kien ikeċċi kemm lilu u kemm lil Schembri, ħa jserraħ moħħu li ma jiġix imċappas hu magħhom. Minn flok, qed naraw lil Prim Ministru jiddefendiehom bil-qawwa kollha. Anzi, lil Konrad Mizzi sa għażlu bħala Deputat Mexxej tal-Partit Laburista Bħal li kieku dan kollu normali, dan kollu etiku, dan kollu tajjeb.

U din tfisser ħaġa waħda. Li l-Prim Ministru ilu jaf b’din il-biċċa xogħol, u qed jibża’ li jekk jaqgħu huma, jaqa’ hu magħhom.

Imma issa l-poplu m’għadux iblah. Issa l-poplu qed jifhem li l-prezz ta’ dan kollu qed iħallsu hu, fost l-oħrajn bl-ogħla prezzijiet tal-petrol u diesel fl-Ewropa, prezzijiet li suppost niżlu bin-nofs. U għalhekk il-poplu qed jirvilla għal min daħak bih u ttradieh b’mod daqshekk sfaċċat.

U għalhekk, nhar il-Ħadd, flimkien ser ngħidu “issa daqshekk” għal dan il-ħmieġ, għal din il-korruzzjoni, għal din il-kultura tax-xejn mhu xejn, li mhux biss qed inħallsu qares għalija bi flusna, imma qed tagħmel ħsara irreparabbli lir-reputazzjoni ta’ pajjiżna.