Dan l-artiklu deher fil-ħarġa tan-Nazzjon tal-Erbgħa 11 ta' Mejju 2016
Meta politiku jigdeb għax ma jkunx jaf il-fatti sew, huwa
ħażin, għax fil-pożizzjoni tiegħu għandu jara li jkun infurmat sew fuq
is-suġġett li qed jitkellem fuqu. Iżda meta politiku jigdeb b’mod konxju, u
jgħid affarijiet li jkun jaf li mhumiex minnhom, il-ħażin huwa ħafna agħar,
għax hawnhekk il-problema mhix li l-politiku mhux infurmat iżda li b’mod konxju
qed iqarraq b’dawk li qed jitlobhom il-fiduċja tagħhom.
Meta qabel l-elezzjoni kont nieħu sehem f’diversi dibattiti
ma’ Konrad Mizzi, dak li imbagħad inħatar Ministru tal-Enerġija, dan Konrad
Mizzi kien jiġi f’kull programm ibiegħ il-proġett tal-Powerstation tal-gass, li
skont hu kellu jsir f’sentejn, kellu jsir mingħajr ma tiġi privatizzata
l-Enemalta, kellu jiswa €376 miljun li kien ħa joħroġ il-privat mingħajr riskju
fuq il-Gvern, li għalih kienu ħa jinbnew żewġ tankijiet fuq l-art, u li permezz
tiegħu kien ħa jitħallas id-dejn tal-Enemalta u jorħsu l-kontijiet tad-dawl.
Għal diversi drabi għednielu li dan ma jistax ikun.
Għednielu li impossibli jinbnew żewġ tankijiet tad-daqsijiet li qal hu biex
jaħżnu l-ammont ta’ gass li kien hemm bżonn. Għednielu li impossibli proġett
ta’ dik ix-xorta jsir f’sentejn. Iżda hu baqa’ jinsisti li aħna konna
negattivi, li hu kien ħa jbiddel il-mentalità li proġetti tal-Gvern jaqbżu d-deadline ta’ meta jitlestew. Li hu
qalilna, kien ser isalva l-Enemalta u grazzi għal dan il-proġett iraħħsilna
l-kontijiet tad-dawl u jagħlaq dik li hu iddeskriva bħala “il-fabbrika
tal-kanċer”.
Għaddiet l-elezzjoni, Konrad Mizzi inħatar Ministru, u bdew
is-sorpriżi. F’daqqa waħda, spiċċat l-idea tat-tankijiet fuq l-art u skoprejna
li kien ħa jirmonka tanker f’nofs il-port ta’ Marsaxlokk biex jaħżen il-gass.
Skoprejna li l-kumpanija privata li ħa tagħmel il-proġett kulma għandha huma assi
ta’ €10,000, u li l-proġett ħa tagħmlu kollu b’self mill-bank li għalih
il-garanzija ta’ €360 miljun ħa ssir mill-poplu Malti u Għawdxi. Skoprejna li
ma kien hemm l-ebda pjan biex tiġi salvata l-Enemalta, imma li din ħa tinbiegħ.
Skoprejna li ħa jkunu għaddew tliet snin u nofs u l-proġett ħa jkun għadu mhux
lest. Skoprejna li l-Gvern ħa jintrabat jixtri l-elettriku kollu ta’ din
il-powerstation għal 18-il sena sħaħ. Skoprejna li l-kontijiet tad-dawl setgħu
jorħsu mingħajr ma ssir din il-powerstation, għax kellna interconnector kważi
lest, u dik li laqqmu bħala “fabbrika tal-kanċer” tant kienet effiċjenti u
nadifa li ffrankat mill-ispiża taż-żejt u wasslet għal arja aktar nadifa.
Skoprejna li l-għada li ħa l-ġurament tal-ħatra, il-Ministru Mizzi kien diġa’ qed
jipprova jiftaħ kumpanija sigrieta fil-Panama. Skoprejna wkoll li kumbinazzjoni
waħda mill-kumpaniji fil-konsorzju li ħa jagħmel il-proġett, il-Gasol, kienet
kważi falluta u ma sarx due diligence
tajjeb fuqha, u kumbinazzjoni dakinhar li rtirat mill-konsorzju u biegħhet
l-ishma tagħha, il-Ministru Mizzi mexxa l-kumpanija li kellu fil-Panama għal
ġot-trust li kellu fi New Zealand.
Imma agħar minn hekk, sirna nafu li dakinhar li Konrad Mizzi kien qed
jgħidilna negattivi u “shame on you” meta bdejna ngħidulu l-fatti fuq
il-proġett li kien qed iwiegħed, hu diġa’ kellu quddiemu rapport mill-Gasol li
kien jgħid li ma setgħux isiru tankijiet fuq l-art u l-gass ħa jkollu jinħażen
f’tanker, li l-proġett kien ħa jiswma bejn nofs biljun u biljun ewro, u li kien
ħa jieħu bejn erba’ u ħames snin biex jitlesta. Iva, Konrad Mizzi kien diġa’
infurmat li aħna kellna raġun u li hu kien qed jigdeb minn qabel l-elezzjoni.
Iva, Konrad Mizzi kien qed jigdeb konxjament meta kien qed jgħid li ħa jibni
t-tankijiet tal-gass, li ħa jlestieh f’sentejn, u li ħa jiswieh €376 miljun,
għax ir-rapport li kellu quddiemu sa minn dak iż-żmien kien jgħid mod ieħor.
U allura, issa li nafu li Konrad Mizzi kien lest jigdeb b’mod daqshekk
sfaċċat qabel l-elezzjoni, kif qed nistgħu nemmnu li mhux qed jigdeb issa meta
jgħidilna li l-kumpanija sigriet fil-Panama bil-kont moħbi fid-Dubai jew
postijiet oħra, riedhom għal affarijiet nobbli u tajba? Kif qatt nistgħu
nemmnuh li l-miljun ewro fis-sena li kien ħa jitfa’ fihom kienu ġejjin minn
qliegħ onest meta l-paga tiegħu ta’ Ministru hija ta’ madwar €60,000 fis-sena u
ma għandu l-ebda assi oħra dikjarati li jistgħu ituh dak il-qliegħ?
U kif qatt nistgħu nemmnu li l-Prim Ministru Muscat mhuwiex kompliċi
miegħu meta qed jiddefendieh b’dan il-mod, u meta anke hu kien konxju minn
qabel l-elezzjoni li dak kollu li kien qed iwiegħed Konrad Mizzi kien gidba
sħiħa mill-bidu sal-aħħar.
Comments
Post a Comment