Dan l-artiklu deher fil-ħarġa tan-Nazzjon tal-Erbgħa 26 ta' Ottubru 2016
Il-ġimgħa li għaddiet tħabbar il-budget tal-Gvern Laburista
għas-sena li ġejja. Budget li l-Gvern sejjaħlu “budget soċjali”. Pero’ kemm
kien soċjali dan il-budget, speċjalment meta dan kien ġej minn partit suppost soċjalista,
u speċjalment meta wieħed iżomm f’moħħu li ilna tant niftaħru li l-pajjiż
għandu ekonomija sejra tajjeb u li qed tikber b’rata mgħaġġla?
Ejja nibdew mill-kontijiet tad-dawl. Wara li l-kontijiet
kienu raħsu grazzi għall-interconnector,
l-effiċjenza tal-power station
tal-BWSC u t-tnaqqis drastiku fil-prezz taż-żejt, kulħadd stenna li issa li
daħal f’pajjiżna t-tanker tal-gass u ser tibda topera l-power station l-ġdida tal-Electrogas, il-kontijiet kienu ser
jerġgħu jorħsu. Fl-aħħar mill-aħħar, din kienet il-wegħda tal-Partit Laburista
qabel l-elezzjoni: li jibni power station ġdida taħdem bil-gass u li grazzi
għaliha jkun jista’ jtina roħs ta’ €70 miljun fil-kontijiet tad-dawl. Iżda
minkejja li l-partners soċjali kollha talbu u stennew dan it-traħħis biex
tiżdied il-kompettivita’ ta’ pajjiżna, dan ma wasalx.
Fuq il-problema l-kbira l-oħra li qed jaffaċċja pajjiżna,
dik tat-traffiku. X’semma’ dan il-budget? Semma’ miżura waħda short-term, dik
li żgħażagħ ta’ 18-il sena jingħataw sena jużaw it-trasport pubbliku b’xejn.
Miżura tajba, imma li waħedha żgur li mhux ser tkun biżżejjed. Il-Partit
Nazzjonalista propona 35 miżura short-term li jistgħu ikollhom effett immedjat.
Sfortunatament, il-Gvern Laburista irredikolahom u ħela xhur milli jibda
jimplimentahom. Issa, fil-budget, semma’ żewġ miżuri minnhom: trasport
lill-ħaddiema ta’ dipartimenti tal-Gvern, u l-inċentivi lill-kumpaniji privati
li jipprovdu trasport lill-ħaddiema tagħhom. Prosit, nieħdu pjaċir li l-Gvern
fl-aħħar beda jagħti kas il-proposti kostruttivi li ilha tagħmel
l-Oppożizzjoni. Konna nieħdu pjaċir aktar kieku beda jagħti kashom mill-ewwel u
kieku jimplimenta aktar minnhom. U apparti dawn il-miżuri short-term, wieħed kien jistenna almenu l-bidu ta’ pjani fit-tul
ta’ kif ser tissolva din il-problema.
Inkomplu naraw x’kienu l-inċentivi soċjali li daħħal dan
il-Gvern. €2.25 iżjed fil-ġimgħa lil min qiegħed fuq il-paga minima u
lill-pensjonanti. Biżżejjed dan biex jgħin lil dawn in-nies joħorġu mill-faqar?
Skont ir-rapport tal-Caritas, fl-aħħar tliet snin biss, familja bi dħul baxx
żdiditilha l-ispiża bi €800 fis-sena. U dan biex tixtri biss l-affarijiet
bażiċi, mingħajr vaganzi u mingħajr kapriċċi ta’ xejn. Sfortunatament, la
l-pagi, la ż-żidiet tal-għoli tal-ħajja, u lanqas dawn iż-żidiet fl-allowances ma waslu biex dawn il-familji
jiżdidilhom id-dħul tagħhom b’rata biżżejjed biex jibqgħu ilaħħqu mal-ħajja.
Jiġifieri mhux biss mhux qed jimxu ‘l quddiem, iżda m’għadhomx ilaħħqu ma’ dak
li kienu jixtru tliet snin ilu.
Kien hemm ftit
miżuri soċjali oħra li daħħal dan il-Gvern, li kienu miżuri li ppropona
l-Partit Nazzjonalista mill-Oppożizzjoni. Dawn kienu t-tneħħija tal-income tax minn fuq il-pensjonijiet,
it-tnaqqis tat-taxxa fuq dividends minn
shares, li s-sick leave jintuża għal meta jimirdu t-tfal (għalkemm f’dan il-każ
il-Gvern ħabbar biss bidu ta’ konsultazzjoni), u t-tneħħija tat-taxxa fuq
il-faqar li kien daħħal dan il-Gvern stess, jiġifieri iż-żieda fuq il-kera
soċjali. L-ewwel għamel tliet snin jeħodilhom u jpoġġiehom f’riskju akbar ta’
faqar, issa ħa jerġa’ jnaqqasha u jtihielhom lura.
Apparti minn hekk, il-vera għajnuna soċjali li għandhom
bżonn in-nies l-aktar vulnerabbli, li huma dawk li qed jiffaċċjaw mard jew
problemi ta’ saħħa, ma waslitx. Il-pensjonanti xorta ser ikollhom jibqgħu
jixtru l-mediċini mill-ftit pensjoni li għandhom. Dawk li qed jiffaċċjaw mard
bħal kanċer xorta ser ikollhom jittallbu għall-mediċini. Il-Partit
Nazzjonalista ġa wiegħed li l-mediċini b’xejn ser tkun waħda mill-ewwel
affarijiet li jwettaq, għax huma dawn l-aktar nies vulnerabbli li għandhom
bżonn l-aktar għajnuna.
U fuq Għawdex smajtu xi ħaġa ġdida? Xejn, ħlief l-istess affarijiet li smajna fil-budgets ta’
qabel. Għax bilħaqq, kien hemm ħafna ripetizzjonijiet, fosthom erġajna smajna
li għandhom proġett ta’ €50 miljun f’housing
soċjali kif smajna s-sena l-oħra. Jagħmel parti mis-27% tal-miżuri li
tħabbru s-sena l-oħra u li ma twettqux din is-sena. L-aqwa li kien għamel kważi
erba’ siegħat għaddej jgħid x’ser jagħmel.
Mill-bqija, il-budget ma qalilna xejn fuq il-viżjoni li
għandu dan il-Gvern u fejn irid jieħu l-ekonomija tagħna. Ma qalilna xejn fuq
setturi ekonomiċi ġodda u l-impjiegi ġodda li jrid joħloq għaż-żgħażagħ tagħna.
Ma qalilna xejn fuq il-middle class u
kif din ħa timxi ‘l quddiem. Ma qalilna xejn fuq is-self-employed, tal-ħwienet u l-manifattura. Ma qalilna xejn fuq
il-fondi tal-Unjoni Ewropea. Ma qalilna xejn fuq il-ħarsien tal-ambjent.
U ovvjament, ma qalilna xejn fuq il-korruzzjoni u meta ser
jibdew l-inkjesti u l-investigazzjonijiet fuq min inqabad bil-kontijiet u
kumpaniji moħbija fil-Panama.
Comments
Post a Comment