Dan l-artiklu deher fil-ħarġa tan-Nazzjon tal-Erbgħa 9 ta' Novembru 2016
F’Mejju 2015, Konrad Mizzi, bħala Ministru tas-Saħħa, kien
ħabbar li l-Vitals Global Healthcare kienu ġew magħżula bħala l-aħjar bidders
għall-investiment ta’ €200 miljun fis-settur tas-saħħa.
Bażikament, b’dan il-ftehim din il-kumpanija kienet ħa
tixtri l-Isptar San Luqa, l-Isptar Karen Grech, u l-Isptar Ġenerali ta’
Għawdex, u tirrinovahom.
Wieħed jistenna li meta Gvern ikun ħa jbiegħ servizz tant
essenzjali bħalma hu dak tas-saħħa, mhux biss jagħmel due diligence bis-serjeta’ fuq min huma l-investituri, imma
jassikura li dawn l-investituri jkunu nies b’esperjenza twila fit-tmexxija
tas-servizzi tas-saħħa. Pero’ ejja nħarsu ftit lejn kif ġara dan il-ftehim, u
min huma dawn il-Vitals Global Healthcare, għax hawnhekk ġara kompletament
l-oppost.
Ejja nibdew mill-fatt li kien ġa f’Marzu tal-2015, xahrejn
qabel ingħata t-tender, li l-ġurnalista Daphne Caruana Galizia kienet ġa
ħabbret ma’ min iltaqa’ l-Gvern u ma’ min ftiehem biex jgħaddi s-servizz
tas-saħħa. Fi blog ħabbret li dawn huma Oxley Capital, u kellha raġun, Oxley
Capital huma l-grupp ta’ investituri li għandhom sehem fil-kumpanija Vitalis
Global Healthcare. Iva, għax fi żmien li applikaw għat-tender kien jisimhom
Vitalis. Ħaġa tal-iskantament pero’ it-tender ġie iffirmat mal-Vitals. Forsi
ittra biss hemm differenti, imma fil-verita’ dan jagħmilha kumpanija
kompletament separata. Tant hi separata li din il-Vitals twaqqfet f’Malta
f’Mejju 2015 stess, ġurnata biss qabel tħabbar min ingħata t-tender! Nixtieq
inkun naf xi due diligence sar allura
fil-ġimgħat ta’ qabel fuq kumpanija li kienet għadha lanqas biss teżisti!
Imbagħad kien hemm kumbinazzjoni oħra. Il-kuntratt
mal-Vitals ġie iffirmat fit-30 ta’ Novembru 2015. U kumbinazzjoni, l-email biex
jinfetħu l-kontijiet sigrieti ta’ Konrad Mizzi, Keith Schembri, u l-misterjuż
Sur Egrant, intbagħtet mis-Sur Karl Cini tan-Nexia BT jumejn wara. Kontijiet li
fihom ikkonfermaw li ħa jġoġġu €1 miljun fis-sena.
Kumbinazzjoni, f’daqqa waħda Malta saret ħabiba speċjali
tal-Montenegro. Il-Prim Ministru Joseph Muscat għamel żjara ma’ Konrad Mizzi
fil-Montenegro, fejn iltaqa’ mal-Prim Ministru Montenegrin li ġie ivvutat bħala
l-Persuna tas-Sena fil-Korruzzjoni u l-Kriminalita’ Organizzata mill-OCCRP. Dan
il-Prim Ministru żar ukoll Malta din is-sena. Anke’ l-President Coleiro Preca
bgħattna l-Montenegro twitti t-triq! U kumbinazzjoni fuq il-kumibazzjonijiet,
il-Montenegro issa wkoll qed jidħlu fi ftehim eżatt bħal ta’ Malta ma’ din
il-Vitals Global Healthcare biex jingħaddula s-servizzi tas-saħħa ta’ hemmhekk.
Pero’ dawn il-kumibazzjonijiet mhumiex biżżejjed. Minn due diligence li sar minn klijent li ġie
avviċinat mill-Vitalis Global Healthacare biex jaħdem fuq dan il-proġett, sirna
nafu li “ekx-Ministru tal-Gvern Malti” (probabilment John Dalli), mar Dubai biex
jinnegozzja mas-sub-contractors li kienu interessati jaħdmu fuq dan il-proġett,
u qallhom li jekk riedu dan ix-xogħol kellhom javviċinaw lil Ram Tumuluri,
il-persuna li qed titkellem għal Vitalis. Id-due diligence li sar minn dan il-klijent jagħmillu din
ir-rakkomandazzjoni:
“Ibbażat fuq dan kollu, nirrakkomandaw lill-klijent tagħna
biex ma jinvolvi ruħu bl-ebda mod f’dan il-proġett. Il-kuntrattur (Vitalis)
huwa kumpanija falza (sham company), u m’għandux l-esperjenza la biex iwettaq u
lanqas biex imexxi l-proġett. Barra minn hekk, ir-risku ta’ ħsara
lir-reputazzjoni tiegħek huwa kbir, għax il-partijiet li qed jirrapreżenta Ram
Tumuluri huma l-istess kukkanja li inkixfet mill-Panama Papers. Hemm riskju
serju ta’ investigazzjoni mill-UE fuq korruzzjoni fil-kuntratti tal-Gvern,
partikolarment dawk li ħarġu minn Projects Malta.”
Iva ħbieb, il-kuntratturi interessati fil-proġett qed jiġu
rakkomandati biex iżommu l-bogħod minn Ram Tumuluri u mill-Gvern Malta minħabba
l-korruzzjoni.
U min hu dan Ram Tumuluri li qed jirrapreżenta lil Vitals
Global Healthcare? Li nafu fuqu hu li seraq $400,000 minn kontijiet ta’ hotel
li kellu fil-Kanada u ħarab, u li kumpanija li ħadmet miegħu qalet lil David
Thake f’telefonata fuq ir-radju li “ix-xamma ta’ korruzzjoni li għandkom hija
probabli minnha…li hu involut f’attivitajiet illeċiti, ma tiskantanix…mhuwiex
persuna affidabbli…qatt f’ħajjitna ma naħdmu miegħu jew nafdawh.”
U għadkom mhux konvinti li dan huwa ftehim jinten, korrott,
u maħmuġ? Mela ħa nżidu din. Din il-ġimgħa fuq il-blog ta’ Daphne Caruana
Galizia ġie leaked il-kuntratt, li
l-Gvern ippubblika b’ħafna faċċati vojta jew mgħottija bit-tipex. U taf xi
skoprejna? Li l- “investiment ta’ €200 miljun mill-privat” huwa gidba. Għax
il-Gvern Malti ftiehem li jħallashom €50 miljun fis-sena għat-tletin sena li
ġejjin.
Iva ħbieb. L-investituri li ħa jieħdu f’idejhom is-servizz
tas-saħħa ta’ pajjiżna, u li ma nafux minn huma għax moħbija wara kumpanija
moħbija fil-British Virgin Islands, ħa jieħdu minn fuq daharna €1.5 biljun fuq
30 sena!
Anke mis-saħħa tagħna qed tabbużaw! Istħu! Korrotti!
Comments
Post a Comment