Dan l-artiklu deher fil-ħarġa tan-Nazzjon ta' nhar l-Erbgħa 1 ta' Frar 2017
Matul tmiem il-ġimgħa
li għaddiet saret it-tielet Konvenzjoni Ġenerali tal-Partit Nazzjonalista mindu
saret ir-riforma fl-istatut u daħlet fis-seħħ din il-Konvenzjoni, li darba
fis-sena tistieden lis-soċjetà ċivili u nies minn bara l-Partit biex
jaqsmu l-veduti tagħhom u jagħtu s-suġġerimenti. Dan bħala parti minn
eżerċizzju sħiħ ta’ djalogu li l-Partit Nazzjonalista jrid iżomm ma’ kulħadd,
ma’ kulmin għandu ‘l pajjiżna għal qalbu.
Wara l-Konvenzjoni Idea Malta, u l-Konvenzjoni Idea Ambjent,
issa kien imiss il-Konvenzjoni Idea Għawdex. Hawn min forsi jaħseb li dawn
il-konvenzjonijiet ma jfissru xejn, u huma biss xi messa-in-scena li ssir għal media. Pero’ huwa ċar li fil-każ
tal-Partit Nazzjonalista dan mhux il-każ. Il-konvenzjoni Idea Malta kellha
l-intenzjoni li ġġib flimkien lil dawk kollha li xtaqu jaraw Partit
Nazzjonalista iżjed b’saħħtu u miftuħ għal kulħadd biex nibdew flimkien
innaddfu l-politika u nibnu ekonomija fuq investiment serju. U infatti, dik li
mexxiet il-Konvenzjoni Ġenerali ta’ dakinhar, Rosette Thake, illum spiċċat
Segretarju Ġenerali tal-Partit. Alex Mangion, li dakinhar għamel appell
imqanqal biex il-Partit jinfetaħ aktar għal nies b’orjentazzjonijiet
differenti, illum huwa kunsillier u kandidat għall-elezzjoni ġenerali f’isem
il-Partit.
Il-konvenzjoni Idea Ambjent ukoll ħalliet frott importanti.
Dakinhar infetħet diskussjoni importanti ħafna fuq il-qasam ambjentali. Infetaħ
bieb għal NGOs ambjentali u dawk kollha li għandhom l-ambjent ta’ pajjiżna għal
qalbhom. Wara sena ta’ konsultazzjoni magħhom, ftit tal-ġranet ilu seta’ jiġi
ippubblikat id-dokument Kwalità ta’ Ħajja Aħjar b’171 proposta għal titjib
fil-qasam ambjentali. Dan huwa s-seba’ dokument mimli proposti li qed
jippubblika l-Partit Nazzjonalista mill-Oppożizzjoni. X’risposta għal min għadu
jipprova jbellagħha lin-nies li aħna xi Partit ‘negattiv’ u mingħajr proposti!
L-ebda Oppożizzjoni fl-istorja ta’ pajjiżna ma ppubblikat tant dokumenti u
proposti daqshekk xhur u snin qabel l-elezzjoni ġenerali. Żgur mhux Joseph
Muscat!
Fost proposti oħra, il-Partit Nazzjonalist qed jipproponi li
jidħol f’negozjati biex l-investituri Ġordaniżi jużaw art oħra flok iż-Żonqor
għal din is-suppost “Università Amerikana”, u li kull proġett nazzjonali li
jkun ser juża’ art ODZ, jekk jiġi approvat mill-Awtorità tal-Ippjanar, ikollu
bżonn żewġ terzi tal-Parlament biex jimxi ‘l quddiem. Hemm proposti oħra biex
jiġu kkumpensati nies li jkunu investew f’pannelli tax-xemx iżda wara li dawn
isiru ħaddieħor jgħolli l-bini tiegħu u dawn jiġu mgħottija. B’hekk għall-ewwel
darba jidħol il-kunċett ta’ drittijiet solari biex in-nies ikunu jistgħu
jinvestu f’din l-enerġija rinnovabbli b’moħħ aktar mistrieħ li l-investiment
tagħhom ser irendi. Proposti oħra jinċentivaw l-użu u r-riġenerazzjoni ta’
binjiet vojta fil-qalba tal-irħula tagħna, minflok il-bini ta’ aktar blokok
kbar f’zoni li għadhom mhux żviluppati, aktar investiment fir-riċerka, kif
ukoll l-evalwazzjoni tal-użu ta’ toroq solari (jiġifieri toroq magħmula minn
pannelli li kapaċi jiġġeneraw l-elettriku mid-dawl tax-xemx), li jistgħu iżidu
l-użu ta’ enerġija rinnovabbli mingħajr ma jużaw art agrikola għal solar farms kif qed ikun ikkunsidrat
bħalissa.
Dawn il-proposti intlaqgħu tajjeb ħafna u ġew imfaħħra minn
diversi għaqdiet ambjentali bħall-Flimkien Għal Ambjent Aħjar u l-Front Ħarsien
ODZ, u jagħtu l-bażi ta’ proposti importanti li għadhom miftuħa għal
diskussjoni ma’ min jixtieq jagħmel suġġerimenti oħra li jibnu fuqhom.
Din is-sena l-konvenzjoni iffukat fuq Għawdex, u wara li
tkellmu diversi nies minn barra l-Partit bi proposti u ħsibijiet fuq Għawdex,
il-Kap tal-Partit Nazzjonalista Simon Busuttil spjega l-viżjoni tiegħu u
tal-Partit għal Għawdex.
L-ewwel nett wiegħed li għall-elezzjoni ġenerali li jmiss
il-Partit Nazzjonalista ser ikun qed jippreżenta programm elettorali speċifiku
għal Għawdex. It-tieni, spjega li għalih il-politika Għawdxija trid tkun
mibnija fuq erba’ pilastri: l-aċċessibilità, l-identità, l-opportunità u
s-sostennibilità.
Dawn jiġu tradotti għal link permanenti bejn iċ-Ċirkewwa u
l-Imġarr permezz ta’ mina, li jservi ukoll biex jgħaqqad light railway minn
Għawde għal postijiet f’Malta bħall-Isptar, l-Università, l-Ajruport u l-Belt.
Jitwaqqaf Kunsill Reġjonali li jħares is-sussidjarjetà tal-gżira Għawdxija.
Jitwettqu l-wegħdiet li Joseph Muscat ma rnexxielux iwettaq, bħall-fast ferry service. Kien hemm diversi
wegħdiet oħra li Joseph Muscat għamel u wettaqx, bħall-airstrip, cruise liner terminal, casino u yacht marina. Jiżdied l-investiment f’Għawdex, fosthom fit-toroq,
li f’dawn it-tliet snin raw degradazzjoni qawwija, u fit-tieni cable diġitali, li huwa kruċjali biex
aktar kumpaniji b’mod speċjali fis-setturi tal-informatika u tas-servizzi
finanzjarji jkunu inċentivati jinvestu f’Għawdex u joħolqu impjiegi
għall-Għawdxin f’Għawdex stess.
Dawn jistgħu jidhru miri ambizzjużi, pero’ l-Partit
Nazzjonalista huwa kommess li jwettaqhom. Jekk ikollna Gvern li jiffoka fuq
it-tmexxija ta’ pajjiżna u dak li għandu bżonn, u mhux fuq kif ħa jimla l-bwiet
tal-qalba u jisker minn fuq dahar il-poplu (jew saħansitra jiffranka milli
jaħli l-ħin ifittex il-parkeġġ minn fuq dahar il-persuni b’diżabilità), nistgħu
nwettqu ħafna u ħafna aktar, u iva, flimkien inkunu nistgħu nirnexxu lkoll, u
mhux biss il-ftit magħżula.
Comments
Post a Comment