Dan l-artiklu deher fin-Nazzjon tal-Erbgħa 15 ta' Marzu 2017
U bir-raġun. Dak li ġara l-ġimgħa l-oħra fuq il-każ
tal-grupp db u l-ftehim jinten dwar il-bejgħ tal-art tal-ITS, u
d-donazzjonijiet ta’ dan il-grupp lill-Partit Nazzjonalista, filwaqt li fetaħ
kaxxa ta’ Pandora fuq dawk li huma donazzjonijiet tan-negozjanti u
korporazzjonijiet lill-Partiti u qajjem terremot politiku sħiħ, offra
opportunità biex wieħed jara mil-liema stoffa hu magħmul Simon Busuttil.
Ejja naraw ftit x’ġara. Il-Partit Nazzjonalista, malli bdew
joħorġu d-dettalji dwar il-kuntratt li sar bejn il-Gvern u l-grupp db dwar
l-art fil-Bajja San Ġorġ, mal-ewwel qajjem diversi punti dwar x’ma kienx qed
isir sew. L-ewwel nett dwar il-proċess tat-tender, jew aħjar it-“taparsi tender”,
li ġie ppubblikat fi żmien il-Milied u li għalih intalab prezz ta’ €10,000 biex
wieħed biss jara x’fih dan it-tender.
It-tieni dwar il-prezz li bih ingħatat
din l-art, prezz miżeru ta’ €5 miljun ewro u €10 miljun oħra fuq seba’ snin
mingħajr interessi, meta tikkunsidra li din l-art ġiet stmatha fil-masterplan
ta’ Paceville li kkummissjona l-Gvern stess li tiswa mal-€200 miljun.
Spiża żejda
It-tielet
l-ispiża żejda li ser jidħol għaliha l-pajjiż biex imexxi l-Istitut tal-Istudji
Turistiċi minn fejn hu, spiża ta’ €70 miljun, biex din l-art tkun tista’
tingħata lill-grupp db. Ir-raba’ l-fatt li dan it-trasferiment tal-art
pubblika, art tagħna lkoll, sar mingħajr ma għaddiet riżoluzzjoni mill-Parlament
kif isir is-soltu.
Nhar il-Ħadd 5 ta’ Marzu, l-Kap tal-Partit Nazzjonalista
Simon Busuttil ħabbar li quddiem dawn il-mistoqsijiet li għalihom
l-Oppożizzjoni baqgħet bla tweġiba, l-Oppożizzjoni kienet ħa titlob l-Awditur
Ġenerali jinvestiga dan il-kuntratt. Hawnhekk il-grupp db beda gwerra
kkordinata ma’ Kastilja biex jattakka lil Simon Busuttil. Is-CEO ta’ dan
il-grupp, bagħat messaġġ lil Simon Busuttil li jixtieq laqgħa urġenti miegħu
biex jintalbu lura d-donazzjonijiet li dan il-grupp ta maż-żmien lill-Partit
Nazzjonalista. Kien hawnhekk li Simon Busuttil ħa d-deċiżjoni kuraġġuża u
ammirevoli li minflok ibaxxi rasu għal dan ir-rikatt, jesponi dan l-aġir u
jieħu pożizzjoni soda quddiem dawn il-bullies
li jaħsbu li jistgħu jixtru lil kulħadd.
Seta’ Simon Busuttil jieħu t-triq il-faċli u jirrispondi
lura li lest jiltaqa’ magħhom, itaptpilhom tnejn fuq spallithom, u jnaqqas
il-kritika li l-Partit kien qed jagħmel fuq dan il-proġett, bil-patt u
l-kundizzjoni li dawn jibqgħu jagħtu d-donazzjonijiet lill-Partit. Imma
m’għamilx hekk. Minflok, għażel it-triq id-diffiċli li jesponiehom u jagħmilha
ċara li filwaqt li l-Partit Nazzjonalista jaċċetta d-donazzjonijiet ta’ kulħadd
fil-parametri tal-liġi dwar il-finanzjament tal-Partiti, għax dak huwa l-unika
mod kif Partit f’Malta jista’ jopera, pero’ bl-ebda mod mhu ħa jħalli lil xi
ħadd jipprova jiddetta lilu u lill-Partit il-pożizzjonijiet politiċi tiegħu.
Iva, dan hu xaqq ta’ dawl għal politika Maltija. Għal wisq
żmien aċċettajna s-sitwazzjoni fejn ftit żviluppaturi li jifilħu jħallsu,
jżommu lill-politiċi fil-but u jippretendu li għax jiffinanzjawlhom il-kampanji
politiċi dawn jaġevolawhom. Ir-riżultat kien li dawn il-bullies stagħnew kien hemm min kien hemm fil-Gvern, ħafna partijiet
minn pajjiżna ġew irrovinati, u negozjanti oħra tal-affari tagħhom li ma kienu
jixtru lil ħadd baqgħu lura.
Simon Busuttil huwa l-uniku tama li din is-sistema tispiċċa
darba għal dejjem. Le, ma jistax ikun li min jilfaħ iħallas jibqa’ jgawdi u
jistagħna filwaqt li jirrovina ‘l pajjiż, u b’effett ta’ dan iħalli negozjanti
tal-affari tagħhom lura f’sistema assolutament inġusta. Aħna irridu pajjiż fejn
jirrenja l-ġid komuni u mhux l-interessi tal-ftit, u fejn l-opportunitajiet
ikunu miftuħa b’meritokrazija għal kulmin jixtieq jivesti, u mhux għal ftit
magħżula.
Dan hu t-terremot politiku li beda Simon Busuttil, u li jkun
jista’ jġibu fi tmiemu meta jkun Prim Ministru. Malta fejn ma jibqax jirrenja
l-establishment li lest jixtri
l-politiċi, imma Malta fejn jirrenja l-interess tal-poplu u s-saltna tad-dritt.
Dejjem ġie rifjutat
U din hija xi ħaġa li żgur ma jistax iwettaq Joseph Muscat. Għax kif innutaw
ħafna, jekk il-grupp db ippretenda li għax il-Partit Nazzjonalista ma għalaqx
ħalqu għandu jtih id-donazzjonijiet lura, mela kemm ħallas lill-Partit
Laburista li rranġalu dan il-ftehim oxxen li bih seraq din l-art pubblika
għall-profitt tiegħu? Speċjalment issa li nafu mill-President Onorarju tal-MDA
Michael Falzon li Silvio Debono ilu jitlob din l-art minn żmien
l-amministrazzjoni Gonzi, imma dejjem ġie rifjutat.
Għax il-problema mhix li partit jirċievi donazzjonijiet.
Anzi, dik hija l-unika mod kif jista’ jopera fis-sistema preżenti. Il-problema
hi jekk partit jaċċetta li għax xi ħadd itih donazzjoni, iżommu f’butu.
Il-problema hi jekk partit jaċċetta li għax xi ħadd itih donazzjoni, iħallsu
lura tagħha minn flus u art il-poplu meta jkun fil-poter. Il-problema hi jekk
partit jaċċetta li għax xi ħadd itih donazzjoni, dan għandu jkollu privileġġi
speċjali u preferenzi fuq il-kumplament.
Għaldaqstant, il-problema mihix id-donazzjonijiet li rċieva
l-Partit Nazzjonalista, li minkejja li rċeviehom ma aġevola lil ħadd fuq
ħaddieħor. Il-problema hija xi rċieva l-Partit Laburista biex aġevola lil
Silvio Debono fuq kull negozjant ieħor, u fuq l-interess komuni tal-poplu
kollu.
Comments
Post a Comment