Ir-riżultat ta’ l-elezzjoni ġenerali żgur li ħasad lil ħafna minna. Żgur li ħadd ma kien qed jistennieh u żgur li ħadd ma bassru. Dan għax ir-reazzjoni li kull kandidat kien qed jieħu miż-żjarat fid-djar tan-nies kienu tajbin ħafna. Diversi nies bdew jesprimu li ġejjin lura. Diversi nies li s-soltu kienu jivvutaw lill-Partit Laburista esprimew magħna li kienu diżgustati bil-korruzzjoni. U allura x’wassal biex id-distakk bejn iż-żewġ partiti baqa’ fejn kien?
Fi ftit kliem naħseb li waqt li diversi nies kienu ġejjin lura lejn il-Partit Nazzjonalista, ma konniex qed nirrealizzaw li kien hemm oħrajn li kienu qed jitilquh. Min għax sab Gvern li kien lest jirranġalu l-permess, il-promotion jew il-job illi l-Partit Nazzjonalista qatt ma għenu fih. U min għax ħass li l-ekonomija u l-but kienu sejrin tajjeb, u allura ma kellux skop għala kellu jbiddel il-Gvern.
Hu x’inhu, dan ir-riżultat ħa jirrekjedi tibdil radikali fil-Partit Nazzjonalista. Fl-istrateġija, fil-lingwaġġ, fl-uċuħ. Pero’ l-valuri li ġġiliedna għalihom jibqgħu validi. Il-ħażin jibqa’ ħażin u t-tajjeb jibqa’ tajjeb. Irridu iżda niftakru li għal ħafna nies li jaqilgħuha u jiekluha, l-affarijiet li jolqtu l-but jiġu qabel il-governanza tajba u t-trasparenza. Mhux neċessarjament li min ivvota lill-Partit Laburista jaqbel mal-korruzzjoni. Iżda jista’ jkun li ħass li jew aħna ma konniex kapaċi niġġielduha u nnadfuha, jew ħass illi minkejja l-korruzzjoni ħajtu kien hemm aktar ċans li tmur għall-aħjar bil-Partit Laburista milli bil-Partit Nazzjonalista. Dik hija xi ħaġa li rridu nżommu dejjem f’moħħna.
F’dan il-mument, nixtieq insellem lit-tmexxija tal-Partit, u nirringrazzjaha tas-servizz kbir li taw lill-Partit u lill-pajjiż. Minkejja r-riżultat, ilkoll naqblu li taw dak kollu felħu u għamlu ħilithom kollha biex il-Partit jimxi ‘l quddiem. Insellem lill-uffiċċjali kollha tal-Partit, li sabu Partit f’sitwazzjoni finanzjarja diffiċli u wassluh biex illum qiegħed f’qagħda sostenibbli.
Insellem lill-Viċi Kapijiet, Beppe Fenech Adami u Mario De Marco, illi minkejja d-diffikultajiet ta’ saħħa li laqtuhom f’dawn is-snin, it-tnejn baqgħu jagħtu l-enerġija tagħhom kollha sal-aħħar. Nirringrazzjakom tal-eżempju kbir li taw lilna l-kandidati żgħażagħ biex nibqgħu nagħtu dak kollu li nifilħu għall-Partit u għall-pajjiż.
B’mod partikolari, insellem lill-Kap tal-Partit Nazzjonalista Simon Busuttil. Il-valuri li tkellem fuqhom u li irrapreżenta jibqgħu valuri importanti ħafna biex pajjiżna jagħmel qabża ta’ kwalita’ fil-mentalita’. Il-kuraġġ li wera biex jinħarġu fil-beraħ ċertu skandli jibqa’ ammirevoli. Is-sens ta’ dover u ta’ servizz li nissel fina, minn meta telaq il-karriera brillanti li kellu fil-Partit Popalari Ewropew biex jiġi jagħti sehmu fil-Partit Nazzjonalista fl-aktar mument diffiċli, jibqa’ ta’ eżempju għalina politiċi ġodda li rridu nħarsu lejn il-politika b’sens ta’ missjoni u ta’ servizz, u mhux b’sens ta’ karriera. Grazzi lilu, lil Kristina u lill-familja tagħhom talli taw ħilithom u l-enerġija tagħhom kollha għal dak li emmnu fih.
Minkejja d-daqqa, issa huwa l-mument li ningħaqdu, nifhmu x’ġara, nagħrblu x’hemm bżonn nirranġaw, u nieħdu d-deċiżjonijiet neċessarji biex il-Partit Nazzjonalista jerġa’ jsir Partit li lest jiggverna u li kapaċi jirbaħ.
Dan l-artiklu deher fil-ħarġa tan-Nazzjon tal-Erbgħa 7 ta' Ġunju 2017
Comments
Post a Comment