Fil-ġranet li għaddew qamet kontroversja sħiħa dwar riklam li għalih intużat il-famuża pittura tal-Aħħar Ċena ta’ Leonardo Da Vinci. Kien hemm min ħassu offiż, kien hemm min ħadha biċ-ċajt, u kien hemm min saħansitra ħa l-liġi b’idejh u mar qatta’ dan ir-riklam. U peress li f’dawn il-ġranet kulħadd kien qed jitkellem dwar dan, xtaqt nislet ftit ħsibijiet żgħar minn dan l-episodju.
L-ewwel nett, bħalma għidt b’mod konsistenti f’episodji oħra fl-aħħar snin, id-dritt tal-libertà tal-espressjoni jibqa’ dritt sagrosant. U għalkemm din ikun hawn min iqarras wiċċu għaliha, il-ħsieb Ewropew espress f’diversi liġijiet u anke’ minn deċiżjonijiet tal-Qrati Ewropej, hu li libertà tal-espressjoni tinkludi wkoll id-dritt li toffendi. Anzi, hemm min saħansitra jgħid li l-libertà tal-espressjoni ma tfisser xejn mingħajr id-dritt li toffendi u tirredikola kwalunkwe’ ħaġa, anke’ affarijiet li għal ħaddieħor jafu jkunu għeżież ħafna. Ovvjament tiġi mill-individwu li jekk irid juri rispett lejn is-sentimenti ta’ ħaddieħor, joqgħod lura milli jirredikolahom. U sta għall-individwu l-ieħor ukoll li jekk iħoss li xi ħadd għamel riklam li bih offendih, jibqa’ fil-libertà li ma jixtrix il-prodotti tiegħu. Pero’ r-rispett ma jista’ qatt jiġi impost, a skapitu li jkun hemm xi ħadd jikkontrolla x’nistgħu nirredikolaw u x’ma nistgħux noffendu. Inkella din tista’ tiġi użata f’min qiegħed fil-poter biex jagħlaq ħalq ċertu kritika bi skuża li din toffendi.
U nżid oħra ma’ din, ħadd m’għandu jippretendi li jiġi protett milli jkun offiż. F’soċjetà demokratika u ħielsa għandek tkun int li tkun matur biżżejjed u tinjora affarijiet li tħoss li joffenduk. Sikwit ninzerta xi programm televiżiv li nħossu joffendili l-intelliġenza tiegħi biċ-ċuċati li jingħaddu. X’nagħmel? Nitlob il-liġi tagħlaqlu ħalqu, jew naqliblu u nistmah ta’ li hu? U allura, fil-miżien bejn il-kontroll li jista’ jwassal għal abbuż u l-libertà tal-espressjoni, għandha dejjem tirbaħ il-libertà. Dejjem sakemm din ma tinvolvix gideb u kalunji, jew ma tinċitax vjolenza jew mibegħda. Hemmhekk iva għandha tiġi mrażżna, u l-liġijiet tagħna diġa’ jaħsbu għal dan.
Jien ukoll Kattoliku, jien ukoll ħassejt li r-riklam irredikola xi ħaġa prezzjuża, pero’ l-Alla li nemmen fih jien hu kbir wisq biex jiġi offiż minn xi ħaġa daqshekk pwerili. Li kieku l-fidi tiegħi u Alla tiegħi jiġi affetwati minn dawn il-ħmerijiet, lanqas ikun vallapena nemmen fih.
Mela ejja nimmaturaw ftit u flok ninħlew niddibattu dawn il-kummiedji, niffukaw fuq il-veru attakki li qed isiru fuq is-sisien tal-valuri demokratiċi essenzjali tagħna. Għax waqt li l-poplu kien mehdi fuq il-pizza u l-burgers f’pittura, jew fuq id-dettalji ta’ terminoloġija fil-liġi, kompla l-attakk fuq l-istituzzjonijiet ta’ pajjiżna biex ikomplu jiġu kkontrollati minn min għandu x’jaħbi. U l-ġimgħa l-oħra tnejn minn ħutna, ħaddiema investigaturi li m’għamlu xejn ħlief għamlu xogħolhom b’integrità u serjetà, tkeċċew mill-aġenzija ta’ kontra l-ħasil tal-flus FIAU, biex id-dnub tal-kriminali jibqa’ moħbi u jibqa’ għaddej. Kumbinazzjoni fl-istess żmien li ħalliena Pietru Pawl Busuttil, vittma oħra ta’ inġustizzja li seħħet biex id-dnub tal-kriminali tletin sena ilu baqa’ moħbi u baqa’ għaddej.
Quddiem dawn l-inġustizzji żgur li jkun offiż Alla. Speċjalment meta jara soċjetà li tant saret individwalista u magħmula min-nies li jaħsbu biss f’tagħhom li mhux dejjem ikunu kapaċi jkunu hemm għal xulxin, jitkellmu biex jiddefendu lil xulxin, u jieħdu azzjoni biex niddefendu lil xulxin mill-idejn ħżiena u awtoritarji li qed jiġbdu l-ispag tal-poter, u li mingħajr skrupli jkissru lill-innoċenti biex il-ħatja jibqgħu jagħmlu li jridu u jibqgħu ma jitressqux quddiem il-Qrati biex issir ġustizzja.
Dan l-artiklu deher fil-ħarġa tan-Nazzjon ta' nhar l-Erbgħa 5 ta' Lulju 2017
Comments
Post a Comment