Din hija l-ewwel darba li qed nikteb din ir-rubrika jiena minflok il-ħabib tiegħi Salvu, li għamel xejn anqas minn tlettax-il sena jikkummenta fuq dak li kien qed jiltaqa’ miegħu fuq l-internet. Minn hawn insellimlu u nirringrazzjah tal-kontribut siewi li ta lil din il-gazzetta, u tad-dedikazzjoni li wera biex dejjem żamm l-appuntament tiegħu tul dawn is-snin kollha. Ħa nkun qed nagħmel ħilti kollha biex nidħol għal dan l-impenn bl-istess dedikazzjoni. Nitlobkom biex tibgħatuli kwalunkwe’ suġġerimenti li jista’ jkollkom fuq l-email tiegħi mark@markanthonysammut.com.
Kap ġdid għal Partit Nazzjonalista
Din il-ġimgħa żgur kienet dominata f’pajjiżni mill-ftuħ u l-għeluq tan-nomini għal ħatra ta’ Kap tal-Partit Nazzjonalista. Illum nafu li l-kandidati ser ikunu erbgħa, li f’ordni alfabetiku huma: Adrian Delia, Alex Perici Calascione, Frank Portelli u Chris Said. Nawguralhom ilkoll u nirringrazzjahom li qed joffru lilhom infushom biex jidħlu għal din ir-responsabbilità kbira. Il-konferenzi stampa li taw iddominaw l-online portals kollha u d-diskussjoni ma waqfet xejn. Niftakru li din l-ewwel elezzjoni ta’ Kap minn mindu kien ġie emendat l-istatut, u dan ifisser li wara l-ewwel rounds ta’ voti mill-Kunsill Ġenerali, li ser isiru fit-2 u 3 ta’ Settembru u li fihom iridu jiġu eliminati żewġ kandidati, isir vot finali bejn iż-żewġ finalisti fis-16 ta’ Settembru li fih jipparteċipaw it-tesserati kollha.
Bla dubju dan wassal biex id-diskussjoni fost il-Kunsilliera, u din id-darba anke’ t-tesserati, tibda minn issa anke’ fuq il-midja soċjali. Fuq facebook hemm diversi gruppi ta’ Nazzjonalisti, ta’ tesserati u ta’ Kunsilliera li kienu hemm minn qabel l-elezzjoni, u issa qed iservu ta’ fora ta’ diskussjoni dwar xi kwalitajiet għandna nfittxu mill-Kap il-ġdid, u x’għandu bżonn l-aktar il-Partit Nazzjonalista bħalissa. Filwaqt li dawn id-diskussjonijiet huma importanti biex isir l-għarbiel u d-dixxerniment neċessarju, nappella lil dawk li jieħdu sehem fihom biex iżommu l-prudenza, u biex kemm fid-diskussjonijiet fis-cyberspace u kemm f’dawk fil-ħajja reali ma nagħmlux kampanji negattivi kontra kandidat jew ieħor. Fl-aħħar mill-aħħar aħna lkoll kollegi fil-Partit Nazzjonalista, u l-importanti hu li din l-elezzjoni interna ma toħloqx feriti imma twassal biex jingħażel min jingħażel Kap, kulħadd jingħaqad warajh biex flimkien nerġgħu inġeddu, insaħħu u nagħqdu l-Partit ħalli neħduh għal rebħa elettorali.
Panamagate fil-Pakistan
Ħabib tiegħi li jinsab missjunarju fil-Pakistan ġibidli l-attenzjoni għal dak li qed jiġri fil-Pakistan. Qed insegwi l-aħbarijiet fuq il-portal tal-ġurnal prolifiku Pakistani www.dawn.com. Il-ġimgħa l-oħra ġie ppublikat rapport ta’ Kumitat Investigattiv li twaqqaf mill-Qorti Suprema u li investiga l-familja tal-Prim Ministru u l-kumpaniji tagħhom li nkixfu fil-Panama, u li juri li ġew akkumulati assi aktar minn kemm il-qliegħ tagħhom kien jiġġustifika. Tfakkarkomx f’min kien qed ifaddal miljun fis-sena b’paga ta’ sittin elf ewro? Hemmhekk ukoll, qed isiru sejħiet qawwijin mill-poplu u mill-editorjali tal-gazzetti kollha biex il-Prim Ministru jirriżenja, almenu temporanjament sakemm jitlestew l-investigazzjonijiet kollha. Jekk jirriżenjax jew le għadna rridu naraw, pero’ qed jiġi investigat. Jidher li anke’ fil-Pakistan l-istituzzjonijiet indipendenti u d-demokrazija laħqu livell ogħla minn ta’ Malta. Għadna qed nistennew meta l-Ministru Mizzi u c-Chief of Staff ser jibdew jiġu investigati u proċessati mill-Pulizija fuq il-provi xokkanti ta’ ħasil ta’ flus li ġew ippubblikati.
Dan l-artiklu deher fil-Mument tal-Ħadd 23 ta' Lulju 2017.
Comments
Post a Comment