Bħal-lum ġimgħa l-Partit Nazzjonalista kien għadu kemm eleġġa Kap ġdid, lil Dr Adrian Delia. Kien mument storiku għal ħafna raġunijiet. L-ewwel nett kienet l-ewwel darba illi għall-elezzjoni tal-Kap, id-demokrazija infetħet għal eluf ta’ tesserati. Kien hemm mat-18,000 tesserat li kienu eleġibbli jivvutaw (oħrajn ma kienux eliġibbli għax ma kienux ilhom sentejn tesserati), u minn aktar minn 15,000 illi ġabru l-vot ivvutaw ammont straordinarju ta’ 95%. Bidla kbira fl-istatut illi kien imbutta l-Kap preċedenti stess Simon Busuttil.
Kienet ukoll l-ewwel darba illi l-Kap li eleġġa l-Partit Nazzjonalista ma kienx Membru Parlamentari, u l-ewwel darba illi Partit politiku f’Malta eleġġa Kap illi ma kien għadu qatt ikkontesta elezzjoni ġenerali.
Din l-elezzjoni qajmet reazzjonijiet differenti, u s-sit elettroniku lovinmalta.com ġabar dawn ir-reazzjonijiet f’artiklu intitolat “Malta Reacts To PN's New Leader” (link sħiħ ta’ dan l-artiklu hawnhekk https://lovinmalta.com/opinion/reactions/malta-reacts-to-pns-new-leader). U qasam dawn ir-reazzjonijiet f’kategoriji differenti.
Kellek lil dawk, li kienu fil-maġġoranza, li awguraw u ferħu lil Adrian Delia għal din ir-rebħa u għar-responsabbilità ġdida li daħal għaliha. Fosthom kien hemm diversi kandidati u Deputati tal-Partit Nazzjonalista, nies ġodda li ssieħbu mal-Partit Nazzjonalista f’dawn l-aħħar erba’ snin bħal Michael Briguglio, u ħafna u ħafna tesserati u partitarji Nazzjonalisti. Ħafna minn dawn ukoll użaw din l-opportunità biex jirringrazzjaw lil Chris Said għas-servizz illi dejjem ta lill-Partit mingħajr interessi tul dawn is-snin kollha.
Kien hemm pero’ oħrajn li esprimew diżappunt u rabja. Uħud kienu nies li dejjem ħassewhom komdi mal-Partit Nazzjonalista u li l-ewwel reazzjoni tagħhom kienet li l-Partit spiċċa, jew li issa daqshekk ħadmu għal Partit. Oħrajn kienu ħafna profili fażuli imbuttati min-nies imqabbda mill-Partit Laburista biex iżidu d-doża ta’ dan is-sentiment u jippruvaw iħajru Nazzjonalisti jagħmlu hekk. Din il-kategorija pero’ tidher li matul din il-ġimgħa tmewtet ħafna. Il-Kap il-ġdid mill-ewwel wera li lest ikompli l-ġlieda kontra l-korruzzjoni u favur il-governanza tajba, billi anke’ attenda għas-seduta l-Qorti nhar it-Tnejn li għadda, u allura beda jagħti risposta lil dawk id-diversi li kienu xettiċi jekk kienx ħa jkompli din il-ġlieda. U l-fatt li Chris Said ukoll awguralu u wegħdu l-appoġġ sħiħ tiegħu għenet mhux ftit biex jittaffew xi feriti li nfetħu matul din il-kampanja.
L-iktar reazzjoni assurda kienet dik ta’ Kurt Farrugia, il-Kap tal-Komunikazzjoni tal-Gvern, li fi tweet qal “Enter the sleazy and the criminals” (jidħlu l-korrotti u l-kriminali). Nesa s-Sur Farrugia li għandu tliet membri tal-Gvern tiegħu taħt investigazzjoni maġisterjali. Nesa li dawn inqabdu fil-fatt jaħslu l-flus u jieħdu l-commissions, u l-unika raġuni għala mhumiex arrestati huwa li ħatfu l-Korp u l-Kummissarju tal-Pulizija u mhux iħalluhom jagħmlu xogħolhom. Agħar minn hekk, is-Sur Farrugia nesa li fil-kariga tiegħu huwa mhu parti mill-ebda Partit imma hu impjegat tagħna lkoll. Kull Kap ta’ Komunikazzjoni ta’ Gvern passat żamm ‘il bogħod milli jitkellem fuq politika partiġġjana. Xi ħadd jiftakar lil Gordon Pisani jagħmel xi kummenti simili? Le. Imma Kurt Farrugia lanqas rispett lejn il-kariga li jokkupa ma għandu.
L-aħħar tip ta’ reazzjoni kienet ta’ dawk li appellaw għall-għaqda. Huwa importanti għal Partit Nazzjonalista li jibqa’ magħqud biex ikun jista’ jagħti sfida lill-Partit Laburista, jiddefendi d-demokrazija u l-istituzzjonijiet tagħha, iwettaq r-rwol Kostituzzjonali tiegħu ta’ Oppożizzjoni Parlamentari, u joffri tama lill-poplu ta’ kif l-affarijiet jistgħu jsiru aħjar. Fl-aħħar mill-aħħar, dan hu l-Partit li dejjem iġġieled għad-demokrazija. Issa rridu nagħtu l-eżempju u naċċettaw riżultat demokratiku ta’ bejnietna. U infatti, il-preżenza kbira ta’ nies fuq il-Fosos din il-ġimgħa, u l-ammont ta’ nies ġodda li ttesseraw mal-Partit, hija xhieda li dan l-appell qed jintlaqa’, u n-nies qed ikomplu jżidu l-entużjażmu għal Partit Nazzjonalista.
Dan l-artiklu deher fil-Mument tal-Ħadd 24 ta' Settembru 2017.
Comments
Post a Comment