Din il-ġimgħa ħafna studenti reġgħu bdew sena skolastika oħra, u allura din il-ġimgħa għal ħafna studenti, ġenituri u għalliema tinbidel ir-rutina u tibda rutina ġdida.
U għal ħafna minna, jerġa’ jibda wkoll it-tgergir fuq il-problema tat-traffiku. Problema li qiegħda tkompli tikber, waħda mill-ħafna problemi li għandna li jitilqu mill-fatt li l-unika mod kif qed inkomplu nkabbru l-ekonomija tagħna huwa billi nżidu l-popolazzjoni u nżidu l-ħaddiema. Xi ħaġa li kulma jmur qed nirrealizzaw li qed issir ħafna aktar insostennibbli. Dan il-pajjiż għandu limitu, u dan it-tkabbir hemm prezz xi nħallsu għalih. Prezz infrastrutturali, prezz ambjentali minħabba ż-żieda dejjem tikber ta’ bini, u prezz fuq il-kwalità tal-ħajja tagħna hekk kif kulma jmur il-pajjiż qed jinħass dejjem aktar u aktar iffullat.
Hemm diversi fatturi li wkoll mhux qed jgħinu biex tittaffa din il-problema tat-traffiku. Għadna poplu wisq marbut mal-użu tal-karozza tiegħu. Naqtgħu qalbna nużaw it-trasport pubbliku (għalkemm il-fatt li ma tantx tista’ sserraħ fuqu żgur ma jgħinx), naqtgħu qalbna nużaw ir-rota, naqtgħu qalbna nimxu. U sfortunatament qed inrabbu lil uliedna bl-istess mentalità. Meta kont għadni l-iskola jien kienet in-norma li t-tfal kollha jużaw van, minibus jew coach għall-iskola. Kien ukoll mument sabiħ fejn nissoċjalizzaw. Illum in-norma hija li jwassluk il-ġenituri. U ovvjament sa wara l-bieb tal-iskola, ma tmurx tinżel xi kantuniera bogħod u tilħaq tgħejja sa ma timxi ftit metri.
Dil-ġimgħa waqt li kont qed naqra ftit fuq din it-tema tfaċċa quddiemi artiklu tal-Kamra tal-Kummerċ (http://www.maltachamber.org.mt/en/putting-a-stop-to-malta-s-traffic-congestion) li jiddiskuti din il-problema u l-effetti tagħha, speċjalment l-effetti ekonomiċi. Hu stmat li l-konġestjoni tat-traffiku qed tiswa madwar €200 miljun lill-ekonomija Maltija, u din titla’ għal €1.2 biljun sas-sena 2050!
Il-Partit Nazzjonalista mill-Oppożizzjoni kien diġa’ għamel diversi proposti fuq dan is-suġġett, u anke’ ippubblika dokument b’diversi miżuri, fosthom trasport b’xejn għat-tfal tal-iskejjel kollha. Din hi miżura li wkoll ikkopja u wiegħed il-Partit Laburista, pero’ jidher li mhix ħa tkun qed tiddaħħal minn din is-sena. Ħasra.
Ma nistgħux ngħidu li kollox ħażin. Sar investiment infrastrutturali wkoll, bħal proġett tal-Kappara u l-propost proġett tal-Marsa, avolja ġew wara erba’ snin ta’ ixxuttar f’investiment infrastrutturali. Iżda l-pajjiż kemm jiflaħ aktar bini ta’ toroq ġodda?
Il-Kamra tal-Kummerċ f’dan l-artiklu wkoll għamlet numru ta’ proposti, fosthom l-involviment tal-privat għal sistemi ta’ mass transit. Il-Partit Nazzjonalista qabel l-elezzjoni wiegħed proġett ta’ metro/light railway li tgħaqqad l-aktar partijiet importanti. Il-Partit Laburista l-ewwel irredikola din il-proposta, issa qed jgħid li ħa jwettaqha. Nemmen li hija xi ħaġa essenzjali u li pajjiżna ilu li għandu bżonn.
L-artiklu jsemmi wkoll l-Intelligent Traffic Management System li l-Gvern ilu ħafna jiftaħar li implimenta. Ma nafx fejn qed jitħaddem dan pero’, għax ma tantx jidher li ħalla effett. Jew ġie implimentat biss fuq il-karta, u s-sistema li vera ġiet installata ma tilħaqx l-aspettattivi li tpoġġew? Jew is-sistema li biha intrebaħ it-tender lanqas biss tilħaq il-livell tekniku li kien jitlob it-tender innifsu?
Din il-problema hija waħda mill-aktar problemi akuti li qed isofri l-pajjiż, u li qed insoffru aħna ċ-ċittadini, u nemmen li bħala Oppożizzjoni issa għandna niffukaw fuq dawn il-materji u oħrajn li qed jolqtu lil Maltin fil-laħam il-ħaj, u nżommu l-Gvern kontabbli għal wegħdiet li kien għamel.
Dan l-artiklu deher fil-Mument tal-Ħadd 01 t' Ottubru 2017.
Comments
Post a Comment