M’għadhomx Jafdawna

L-effetti tal-assassinju brutali ta’ Daphne Caruana Galizia għadu jiddomina mhux biss ix-xena nazzjonali, imma anke’ dik dinjija b’mod partikolari dik Ewropea. Kulħadd issa hu konxju u qed jara b’għajnejh fejn wassalna l-kollass tal-istituzzjonijiet u l-kultura tal-impunità li rajna tiġi kkultivatha u imbuttatha f’dawn l-aħħar snin.

Il-ġimgħa l-oħra rajna kif il-ġurnali u siti barranin qed jirreferu għal Malta bħala “Mafia State” u bħala demokrazija li teżisti biss fuq il-karta imma mhux fil-prattika. Din il-ġimgħa din ir-reputazzjoni wasslet biex grupp ta’ tmien organizzazzjonijiet tal-aħbarijiet ta’ livell internazzjonali jitolbu l-istituzzjonijiet Ewropej biex jinvestigaw huma l-assassinju ta’ Daphne Caruana Galizia. Għaliex? Għax bħal poplu Malti, mhumiex jafdaw it-tmexxija tal-Korp tal-Pulizija u l-istituzzjonijiet tagħna.

F’ittra ċara lill-Kummissjoni Ewropea, dawn qed jgħidu li l-qtil ta’ Daphne, flimkien man-nuqqasijiet strutturali li l-Kummissjoni diġa’ identifikat, juru l-bżonn ta’ investigazzjoni fuq l-istat tal-indipendenza u l-libertà tal-media f’Malta. Talbu li l-Kummissjoni tidħol fi djalogu urġenti mal-Gvern Malti biex tagħmillu ċara x’inhuma l-obbligazzjonijiet tagħna bħala membru tal-Unjoni Ewropea fejn jidħlu s-saltna tad-dritt u l-libertà tal-espressjoni.

Jgħidu wkoll li l-qtil ta’ Daphne juri l-perikli li qegħdin fihom il-ġurnalisti meta jfittxu l-verità, u juri l-biża’ li għandhom il-korrotti u dawk fil-poter milli xi ħadd jikxifhom.

Iżidu li għajnejn l-Ewropa qegħdin fuq l-awtoritajiet Maltin. Hemm bżonn li jingħataw ir-risposti u li l-ħatja jiġu proċessati. Iridu li dawk li kienu “direttament jew indirettament” responsabbli ta’ dan il-qtil jinġiebu quddiem il-ġustizzja, u li l-problemi strutturali li hemm fl-istituzzjonijiet Maltin jiġu indirizzati.

Il-firmatarji ta’ din l-ittra huma Katharine Viner (editor-in-chief tal-ġurnal The Guardian), Dean Baquet (direttur eżekuttiv ta’ New York Times), Jérôme Fenoglio (direttur ta’ Le Monde), James Harding (direttor tal-aħbarijiet u ġrajjiet kurrenti tal-BBC), Wolfgang Krach (mis-Süddeutsche Zeitung), Lionel Barber (mill-Financial Times), Mario Calabresi (minn La Repubblica) u Antonio Caño (minn El Pais). L-aħbar tista’ tinqara online fis-siti tagħhom kollha (fosthom fis-sit https://www.theguardian.com/media/2017/nov/02/world-media-chiefs-call-for-eu-inquiry-into-maltese-journalists).

Ironikament, waqt li dawn l-organizzazzjonijiet internazzjonali kollha, flimkien mas-soċjetà ċivili u l-Partit Nazzjonalista, qegħdin jitolbu lill-Gvern biex nibdew nindirizzaw il-problemi li hemm fl-istituzzjonijiet tagħna, il-Gvern u b’mod partikolari l-Prim Ministru Joseph Muscat għadhom jistqarru li m’hawnx problemi. Li l-istituzzjonijiet qed jiffunzjonaw. Li kulħadd qed jagħmel xogħolu. Li kulħadd negattiv, minbarra l-Gvern Malti.

Huwa ċar li l-Gvern qed jiġġieled għall-istatus quo. Biex kollox jibqa’ kif inhu. Biex ma tmurx ikun hemm xi Kummissarju u Avukat Ġenerali li ma jkunux pupazzi tiegħu u jfettilhom jieħdu azzjoni fuq il-każi ta’ korruzzjoni gravi li għandhom jistennew quddiemhom.

Mill-banda l-oħra, fil-Parlament il-ġimgħa l-oħra, fuq talba tal-Oppożizzjoni stess li l-Gvern għall-ewwel ma laqax, ġew diskussi dawn il-materji bħala materji ta’ natura nazzjonali urġenti. Il-Kap tal-Oppożizzjoni Adrian Delia mar fil-Parlament b’numru ta’ proposti, ta’ x’jista’ jagħmel il-Parlament minn din il-ġimgħa, x’jista’ jbiddel fis-sitt xhur li ġejjin, u kif għandu jwassal għal bdil Kostituzzjonali fi żmien sentejn. Pjan li jagħti lin-nies ftit tama, ftit wens, li dal-pajjiż ħa joħroġ minn dan il-mument iżjed b’saħħtu.

Iżda x’sab? Sab Gvern għal kollox negattiv, li ma laqa’ l-ebda proposta u li għadu jgħid li m’hemm bżonn ibiddel xejn.

Inħalli f’idejn il-poplu jiġġudika min qed ikun verament pożittiv u proposittiv, u min qed ikun negattiv. Inħalli f’idejn il-poplu jiġġudika jekk hux veru li kulħadd qed jagħmel xogħolu u jekk hux veru li m’hemm bżonn l-ebda riformi. Pero’ mhux għajnejn il-poplu biss hemm fuq il-politiċi din id-darba. Hemm għajnejn id-dinja wkoll. U jekk inkomplu nwieġbu għal dan il-mument b’dan il-mod ħażin, ir-reputazzjoni ta’ Malta ser tkompli tieħu daqqa kbira ‘l isfel.

Dan l-artiklu deher fil-Mument tal-Ħadd 12 ta' Novembru 2017.