Wasal iż-żmien li l-Ewropa tieħu azzjoni

Nhar it-Tlieta li għaddew il-Parlament Ewropew iddiskuta s-saltna tad-dritt (rule of law) f’Malta, u l-għada, l-Erbgħa, ħa vot fuq riżoluzzjoni li fiha l-Parlament għamel diversi talbiet lill-Kummissjoni Ewropea.

X’kienet tgħid din ir-riżoluzzjoni, li wieħed jista’ jsib fis-sit tal-Parlament Ewropew (http://www.europarl.europa.eu/sides/getDoc.do?type=TA&reference=P8-TA-2017-0438&language=EN)?

Issejjaħ lill-Gvern Malti biex juża’ r-riżorsi kollha meħtieġa biex issir ġustizzja u jinqabdu l-qattiela. Issejjaħ għal investigazzjoni internazzjonali indipendenti fuq dan il-qtil. Issejjaħ biex tiżdied il-protoezzjoni lill-ġurnalisti u whistleblowers. Titlob biex jinħoloq il-Premju Ewropew Daphne Caruana Galizia għall-Ġurnaliżmu Investigattiv. Turi d-dispjaċir tal-Parlament li l-iżviluppi riċenti li seħħew f’Malta iqajmu inkwiet serju fuq is-saltna tad-dritt, id-demokrazija u d-drittijiet fundamentali tal-bniedem, inkluż d-dritt tal-media ħielsa u l-indipendenza tal-Pulizija u l-Ġudikatura. Issejjaħ lill-Kummissjoni biex tibda djalogu mal-Gvern Malti dwar is-saltna tad-dritt u l-ħarsien tal-valuri Ewropej f’Malta.  Issejjaħ anke’ lil Kummissarju tal-Pulizija u l-Awtoritajiet Maltin biex jinvestigaw il-proċess tal-liċenzja tal-Pilatus Bank, jinvestigaw lin-Nexia BT, u jinfetħu l-investigazzjonijiet li qatt ma saru fuq ir-rapporti tal-FIAU, il-Panama Papers, u l-ħasil ta’ flus ta’ PEPs mill-Azerbaijan u politiċi mill-Gvern Malti. Ir-riżoluzzjoni tesprimi wkoll l-inkwiet tal-Parlament Ewropew fuq dak li qal il-Prim Imħallef u dwar ir-rapport tal-Kumitat PANA, li jgħid kif l-istituzzjonijiet li suppost jinforzaw il-liġi f’Malta huma politiċizzati.

Matul id-dibattitu, MEPs ma qagħdux lura milli jesprimu dak li jaħsbu dwar il-Gvern Malti. Il-Viċi Chairman tal-ENF qal li Malta “gvernata minn gang kriminali”. Ieħor qal li Malta tfakkru f’Narcos, series televiżiva li turi kif bliet fil-Kolumbja kienu maħkuma minn ċrieki tat-traffikar tad-droga li kellhom lil politiċi fil-but. MEP oħra fakkret kif rebħa ta’ elezzjoni ma tieħux post xogħol il-Pulizija. Ieħor qal kif f’Malta qed naraw il-“privatizzazzjoni tal-istituzzjonijiet għal gwadann tan-nies fil-Gvern”. MEP oħra fakkret kif il-Gvern Malti ma jirrispettax lill-Parlament Ewropew, tant li Keith Schembri irrifjuta li jiltaqa’ mal-Kumitat imqabbad minnhom, u bagħtilhom envelop żewġ minuti qabel il-laqgħa.

Huwa kliem iebes, kliem li żgur l-ebda Malti ma ħa pjaċir bih u ma ġegħlu jħossu kburi. Imma sfortunatament huwa r-realtà. Realtà li mhux aħna biss qed naraw, li ilna nitkellmu fuq dawn l-affarijiet snin, imma qed jara kulħadd. Tant li l-Parlament Ewropew fuq din ir-riżoluzzjoni irnexxielu jkun magħqud aktar minn kull vot ieħor. 466 MEP ivvutaw favur, 49 ivvutaw kontra, 167 astjenew. Jiġifieri apparti l-gruppi tal-lemin estrem, kienu inqas minn 18 l-MEPs tal-Grupp Soċjalista, minn total ta’ 189, li ma kkundannawx lil Gvern li jagħmel parti mill-Grupp tagħhom. Uħud minnhom saħansitra vvutaw favur ir-riżoluzzjoni, il-maġġoranza tagħhom astjenew. Dan huwa sinifikanti, għax ifisser li l-MEPs tal-Partit Laburista u Joseph Muscat tilfu anke’ l-appoġġ tal-Grupp politiku li jagħmlu parti minnu. Lanqas il-familja tagħhom ma tista’ tiddefendiehom fuq il-ħmieġ li ħallew lil Malta tagħna taqa’ fih.

U għalhekk, min jipprova jiddemonizza l-MEPs tal-Partit Nazzjonalista, li f’din kienu magħqudin mal-kumplament tal-Parlament Ewropew, u jgħajjarhom “tradituri”, “Ġuda”, u aġġettivi oħra, għadu ma fehem xejn. Il-Parlament Ewropew ma vvutax kontra Malta. Anzi, il-Parlament Ewropew ivvota favur Malta u biex jiddefendi lil pajjiżna u lilna ċ-ċittadini tiegħu minn Muscat u l-abbużi ta’ poter ta’ dan il-Gvern. Il-Parlament Ewropew ivvota kontra Muscat u l-Gvern tiegħu, u mhux kontra Malta, għax huwa dan il-Gvern li qed imur kontra l-prinċipji fundamentali Ewropej. It-traditur huwa minn kisser isem pajjiżna għal gwadann personali tiegħu u ta’ dawk ta’ madwaru.

U huwa għalhekk li Muscat filfatt irnexxielu jgħaqqad il-Gruppi kollha tal-Parlament Ewropew, kontrieh.

L-isfortuna hija li issa hemm pajjiżi li qed jużaw dak li qed jiġri f’Malta biex jattakkawna fuq is-sistema ta’ tassazzjoni tagħna u l-iskemi ta’ bejgħ ta’ ċittadinanza. Is-sistema ta’ tassazzjoni hija intrinsikament marbuta mal-qasam tas-servizzi finanzjarji, u allura ma’ madwar 12% tal-ekonomija Maltija. U dan il-Gvern qed ikun lest ikisser ir-reputazzjoni tagħna f’dan is-settur, jipperikola daqstan impjiegi u dħul, sempliċiment biex jipproteġi l-korrotti li jħaddan fih.

Kif qalu l-MEPs tal-Partit Nazzjonalista, l-istituzzjonijiet Ewropej huma l-aħħar tarka li qed nittamaw fiha biex tħares lill-poplu Malti mill-abbużi u l-ksur ta’ drittijiet ta’ dan il-Gvern. Nittamaw li l-Kummissjoni Ewropea tasal li tieħu azzjoni.

Dan l-artiklu deher fil-Mument tal-Ħadd 19 ta' Novembru 2017.