Ħsibijiet: Il-ħadma tal-Vitals u Daphne

Ħadma tajba, minn fuq saħħitna

Waqt li l-pajjiż għadu qed iqum mill-qtil ta’ ġurnalista għax investigat stejjer kbar ta’ korruzzjoni, il-Gvern tana storja ġdida ta’ korruzzjoni proprju għal żmien il-Milied. Wara li għalaq il-Parlament u kulħadd daħal fl-ispirtu tal-Milied, ġie imħabbar li l-Vitals, li l-Gvern kien biegħhilhom tliet sptarijiet u s-sistema tas-saħħa tagħna, inbiegħu lil kumpanija oħra, Steward Health Care.

Dettalji tal-ftehim ma ġewx imħabbra, pero’ dehru diversi rappurtaġġi f’ġurnali ewlenin li jqajmu numru kbir ta’ mistoqijiet fuq dak li ġara. Nissuġġerilkom taqraw dan l-artiklu, kif ukoll dan. 

L-ewwelnett jidher li Armin Ernst, ic-Chief Administration Officer ta’ Steward Health Care, kien CAO ta’ din il-kumpanija fl-istess waqt li kien CEO tal-Vitals Global Healtchare. Din tqajjem numru kbir ta’ mistoqsijiet fuq il-kunflitt ta’ interessi li dan kellu.

It-tieni, jqumu mistoqsijiet kbar fuq min huma l-vera sidien tal-Vitals. Dawn is-sidien huma moħbija wara l-kumpanija Bluestone Special Situations 4, reġistrata fil-British Virgin Islands u li taħbi l-identità tal-ultimate beneficial owners tagħha. Dawn is-sidien ħadu l-isptarijiet Maltin, innegozzjaw ftehim favorevoli ħafna għalihom, fejn marbutin li jieħdu €1.6 biljun fuq it-tletin sena konċessjoni li ħadu, filwaqt li marbutin jinvestu biss ftit miljuni.

Kif jidhru l-affarijiet, il-Vitals għamlet biss biċċa xogħol tajba ta’ senserija għal profitt ta’ malajr. Ġiet Malta, ħadet it-tender b’kundizzjonijiet favorevoli ħafna mingħajr ma kellha l-iċken esperjenza fil-qasam, bil-ftehim favorevoli li ffirmat għolliet ferm il-valur tagħha, imbagħad x’ħin ġiet għal fatti biegħet dan il-ftehim favorevoli lil kumpanija oħra. Biċċa xogħol ta’ spekulazzjoni minn fuq dahar is-servizz tas-saħħa tagħna.

U allura bilfors li jqumu mistoqsijiet. Min huma s-sidien vera tal-Vitals, li sabu Gvern daqshekk ġeneruż magħhom li għenhom jagħmlu biċċa profitt daqshekk tajba? Kien hemm xi skambju ieħor ta’ flus, bħalma nafu li kien hemm minn fuq il-privatizzazzjoni tal-Enemalta u minn fuq it-tanker tal-gass? Kemm mill-€200 miljun li Vitals suppost nefqu f’Malta fil-verità ġew investiti?

Din l-istorja ma tistax tmut hawn, mhux imbilli l-Gvern stenna l-vaganzi tal-Milied biex iħabbarha. Il-poplu jeħtieġ li jkun jaf il-verità kollha.

Rikonoxximent ieħor għal Daphne Caruana Galizia

Kif jgħid il-Malti, ħafna drabi l-“profeta” jkun iżjed rikonoxxut barra pajjiżu milli f’pajjiżu stess. U hekk jidher li qed jiġri fil-każ tal-ġurnalista Daphne Caruana Galizia, li l-qtil makabru tagħha ftit tal-ġimgħat ilu ħasad lil kulħadd, imma illum il-ġurnata kważi iżjed fehmu dan xi jfisser għal pajjiżna l-barranin milli aħna stess.

Kien il-ġurnal La Repubblica li din il-ġimgħa premja lil Daphne Caruana Galizia bħala l-persuna tas-sena 2017. L-aħbar tħabbret f’editorjal speċjali fl-edizzjoni tal-Ħamis li għadda minn ħadd inqas ħlief Roberto Saviano, ġurnalist li jgħix maħrub b’identità moħbija u taħt skorta kontinwa tal-Pulizija minħabba l-kitbiet tiegħu fuq il-Camorra, l-organizzazzjoni kriminali li topera l-aktar qrib ta’ Napli imma li tmexxi l-maġġoranza enormi ta’ traffikar ta’ droga fid-dinja.

F’dan l-editorjal jgħid għaliex dan ir-rikonoxximent għal Daphne Caruana Galizia. Jgħid li Daphne niggżet lil kulħadd. Rat lil pajjiżha jinbidel f’ċentru tal-ħasil tal-flus. Daphne kienet qed “tixgħel id-dawl internazzjonali fuq il-korruzzjoni ta’ din il-gżira, kienet qed turi lil kulħadd nerv mikxuf, u allura bdiet tkun ta’ ostaklu għat-tmexxija tal-kapital maħmuġ”. U finalment, fl-aktar ċertifikat b’saħħtu li seta’ jtiha, jgħid li Daphne “kienet tinkarna s-saħħa tal-kelma, kapaċi li ċċaqlaq Gvern u twasslu jirriżenja. Daphne, bħan-ninfa fil-mitoloġija, li kienet tħobb tant il-libertà li kienet inbidlet fi pjanta biex tkun tista’ tiddefendieha...Il-qattiela ċċelebraw jiftħu l-inbid. Imma eluf niżlu fit-toroq f’isimha jgħidu li leħinha issa mhux jiskot imma jkun aktar b’saħħtu”.

Dan l-editorjal jista’ jinqara hawn. Għal min ma għandux aċċess għas-sit, Manuel Delia tellgħu wkoll fuq il-blog tiegħu.

Sadattant, waqt li ħaddieħor jirrikonoxxi x-xogħol kbir li għamlet din il-mara, aħna nagħtu Ġieħ ir-Repubblika lil min lil mara oħra, biex jagħlqilha ħalqha, heddida li “niġi għalik u nifqgħek”.

Nieħu din l-okkażjoni biex nawgura lilkom il-qarrejja tagħna l-Milied it-tajjeb!

Dan l-artiklu deher fil-Mument tal-Ħadd 24 ta' Diċembru 2017.