Il-Ħamis li għadda,
il-Kumitat konġunt LIBE-PANA fil-Parlament Ewropew iddiskuta r-rapport tad-delegazzjoni
ta’ MEPs li żaru Malta biex jinvestigaw is-Saltna tad-Dritt. Dan id-dibattitu
seta’ jiġi segwit fuq is-sit tal-Parlament Ewropew, u fuq il-paġna ta’ Facebook
tal-Uffiċċju tal-Parlament Ewropew f’Malta, kif ukoll fuq is-siti tal-ġurnali
Maltin kollha.
F’dan id-dibattitu
spikkaw il-konklużjonijiet li ħarġu f’dan ir-rapport. Tkellmet Ana Gomes
mill-Partit Soċjalista, li qalet id-delegazzjoni se tibqa' għaddejja
bl-investigazzjonijiet tagħħa fuq is-saltna tad-dritt f'Malta. Qalet li saru laqgħat mal-Prim Imħallef, mal-Bank Ċentrali Ewropew u l-Awtorita' Bankarja
Ewropea. Qalet li veru li Malta daħlet id-direttiva kontra l-ħasil tal-flus
iżda din saret biss wara iż-żjara tad delegazzjoni. Qalet li l-Parlament Ewropew għandu jistieden lil entitajiet privati bħal
Bank Pilatus u Henley & Partners, li huma fiċ-ċentru tal-allegazzjonijiet
dwar korruzzjoni, u jitlob spjegazzjonijiet minn għandhom.
Sven Giegold mill-Ħodor
qal li f'Malta hawn kultura tal-impunità, u semma kif ma sarux investigazzjonijiet fuq il-ftehim
mal-Electrogas u lanqas il-bejgħ tal-isptarijiet. Qal li mhix qed issir 'due
diligence' kif mistenni. Infatti, kelliem iktar
tard ikkonferma kif anke’ Membru Parlamentari Vjetnamiża irnexxielha tixtri
passaport Malti, allavolja din hija PEP u mhux permess mil-liġi ta’ pajjiżha li
jkollha ċittadinanza doppja, u li dan juri kemm l-iskema tal-bejgħ ta’
passaporti m’għandhiex il-kontrolli neċessarji u qed tintuża bi skopijiet
korrotti.
Il-Ministru Owen Bonnici
prova ħafna jiġġustifika dak li qed jiġri f’Malta, u jkompli jmexxi
l-propoganda tal-Gvern li qed jiġġieled il-korruzzjoni. Sa prova jgħid li
Jonathan Ferris qed jitlob il-protezzjoni u l-istatus ta’ whistleblower biex jaħrab il-prosekuzzjoni! Dan juri kemm hu faħxi
l-mod kif il-Gvern għadu jiċħad l-istatus ta’ whistleblower lil Ferris, sakemm dan ma jgħidx x’ħa jiżvela
lill-Uffiċċju tal-Prim Ministru.
Tajba din. Biex ittini
protezzjoni, irrid ngħid lilek x’ħa nikxef fuqek. Dik saltna tad-dritt! Dik
liġi b’saħħitha tal-whistleblower!
Infatti malli temm
id-diskors tiegħu Bonnici, Giegold kien pront qallu li min jiddisprezza u juri
nuqqas ta’ rispett lejn l-MEPs u r-rapport tagħhom m’għandu l-ebda kredibbilità.
Dan id-dibattitu seħħ
proprju wkoll wara li nhar it-Tnejn, fl-Assemblea Parlamentari tal-Kunsill
tal-Ewropa fi Strasburgu li ikkommemorat lil Daphne Caruana Galizia, id-Deputat
Etienne Grech iddefenda l-Gvern Malti u b’nuqqas ta’ rispett enormi qal li
l-qtil ta’ Daphne kien inċident, u qal li Daphne kienet libera tikteb li trid.
Pronta kienet ir-risposta ta’ ħafna fuq il-midja soċjali li staqsew kif dan
għandu l-wiċċ jgħid li kienet libera tikteb li trid, meta din proprju inqatlet
minħabba dak li kitbet! U dan id-diskors ġie proprju mingħand Deputat li
f’Kumitat Parlamentari Malti kien qal li kien jisraq l-organi mill-Università biex joqgħod jilgħab bihom id-dar. Imbagħad jgħidulna li
ħaddieħor qed jagħmel ħsara lir-reputazzjoni ta’ Malta.
L-aktar li spikka pero’
fid-dibattitu tal-Ħamis kien id-diskors qasir li ntalab jagħmel fl-aħħar
it-tifel ta’ Daphne Caruana Galizia, Andrew. Huwa talab lill-MEPs biex ma
jħallu lil ħadd jgħidilhom li dak li qed jiġri f’Malta “mhux affari tagħkom”,
għax dak li qed jiġri f’Malta mhuwiex biss dwar ommu u l-qtil tagħha, jew dwar
il-poter politiku f’Malta, imma huwa dwar il-valuri kollha li jsawwru l-Ewropa.
Huwa irringrazzja lill-MEPs li mhux qed jibżgħu jitkellmu, għax skont hu, dawn
qed jimlew ftit miż-żarbun ta’ ommu.
Hija ħasra, li
fis-sentejn li Malta setgħet kienet qed tispikka fix-xena internazzjonali
minħabba l-Presidenza tal-Unjoni Ewropea u t-titlu tal-Valletta 2018, flok
spikkat għas-sabiħ tagħha, qed tispikka għall-korruzzjoni li qed titħalla għaddejja
u l-kultura ta’ impunità li hi
prevalenti. Pajjiżna jixraqlu ħafna aħjar. Ħa nieħdu snin biex nerġgħu insewwu
l-ħsara li qed issir lir-reputazzjoni tagħna, pero’ jekk nimxu bi programm
politiku serju u b’serjetà jirnexxielna.
Irridu biss nikkonvinċu lill-poplu li din is-serjetà tittraduċi ruħha f’aktar ġid, aktar xogħol, u kwalità ta’ ħajja aħjar.
Dan l-artiklu deher fil-Mument tal-Ħadd 28 ta' Jannar 2018.
Comments
Post a Comment