Kollox beda minn
tweet ta’ Ana Gomes, MEP Portugiża tal-Partit Soċjalista. Ana Gomes kienet
l-MEP li mexxiet id-delegazzjoni ta’ MEPs li żaru Malta u kitbu r-rapport fuq
l-istat tas-saltna tad-dritt f’pajjiżna. Rapport li wassal għal diversi
konklużjonijiet, l-iprem fost it-talba biex jitneħħew il-politiċi li jissemmew
fil-Panama Papers, b’mod partikolari Konrad Mizzi u Keith Schembri. Din hija
talba li qed tiġi mill-MEPs mill-Partiti l-Kbar kollha tal-Parlament Ewropew:
il-Popolari, is-Soċjalisti, il-Liberali u l-Ħodor.
Din il-ġimgħa
kien Simon Busuttil li wara d-diskors tiegħu fil-Parlament, kiteb fuq Twitter li “l-unika raġuni għala Muscat
ma għamilx dak li hu sewwa u neħħa lil Mizzi u Schembri hija li jekk jitilqu
huma, jkollu jitlaq hu...Qed ipoġġi l-interess tiegħu qabel l-interess
nazzjonali.” Ana Gomes mexxiet din it-tweet
ta’ Busuttil, u żiedet magħha li hi tasal għall-istess konklużjoni. Żiedet li
“grupp politiku tagħna, il-Progressivi, ma għandniex nappoġġjawh, ma għandniex
nagħmlu kif għamel l-EPP fuq Orban, u jibqgħu jappoġġjawh għax hu parti
mill-istess familja.” Hawnhekk kienet qed tirreferi għal Viktor Órban,
Prim Ministru tal-Ungerija, li kien qed jimbutta tibdil Kostituzzjonali li jmur
kontra l-prinċipji demokratiċi Ewropej, iżda li s’issa l-EPP għadu jżommu parti
mill-Grupp tiegħu.
Il-ġurnal influwenti Ewropew Politico kiteb fuq din it-tweet, u t-Tlieta kiteb li “s-Soċjalisti
jidher li bdew isejħu għal ras Muscat” (https://www.politico.eu/newsletter/brussels-playbook/politico-brussels-playbook-presented-by-epp-group-eu-cappuccino-index-micro-plastic-strategy-another-romanian-pm-out).
Ir-reazzjoni tal-Prim Ministru Muscat kienet is-soltu
reazzjoni arroganti u pastaża. F’kumment lill-ġurnalisti qal li hu “jagħti kas
biss il-kummenti ta’ Prim Ministri oħra”. F’kelma waħda, qal li għalih
il-Parlament Ewropew u l-MEPs ma jiswew xejn. Dan meta hu stess sa ftit snin
ilu kien MEP! Dan id-diskors xejn ma niżel tajjeb mal-kumplament tal-Parlament
Ewropew u mal-MEPs l-oħra.
Gomes reġgħet kitbet fi tweet oħra l-Erbgħa, illi hi ħa
tibqa’ titkellem fil-kapaċità tagħa ta’ Kap tad-Delegazzjoni li ġiet
Malta. U minkejja li tagħmel parti mill-Grupp Soċjalista, dan mhux ser
jagħmieha milli titkellem fuq il-ħażin, anke’ jekk dan il-ħażin ikun ġej
min-nies fil-familja politika tagħha stess.
Ir-reputazzjoni tagħna fi Brussels qed tkompli nieżla
l-isfel. U żgur mhux tort tal-MEPs Nazzjonalisti, kif tipprova tpinġi
l-propoganda tal-Gvern. It-tort hu kollu ta’ Muscat u l-klikka tiegħu.
Ftehim korrott
Sadattant, komplew joħorġu aktar stejjer fuq il-ftehim
jinten tal-Vitals. Ftehim li juri li jew Muscat inkompetenti, għax ħareġ bi
ftehim li xejn ma kien jaqbel lil pajjiżna imma ta l-vantaġġi kollha lill-operatur
privat, jew Muscat korrott u għamel hekk għal raġunijiet korrotti.
L-editorjal tat-Times il-Ġimgħa kien ċar. Dan il-ftehim
għandu jitħassar. L-affarijiet li ħbew mill-kuntratt huma wisq inkwetanti, bħal
li rridu nħallsu aħna €80 miljun biex nieħdu l-isptarijiet lura għax Vitals ma
rnexxielha tagħmel xejn.
Sirna nafu wkoll mill-Assoċjazzjoni Medika Maltija u
l-laqgħa li huma kellhom mal-Kap tal-Partit Nazzjonalista Adrian Delia illi
huma għadhom s’issa fil-għama fuq x’qed jiġri fil-bejgħ għal Steward Healthcare
u fuq is-sitwazzjoni tal-ħaddiema kollha tas-saħħa.
Is-sitwazzjoni li ġab is-settur tas-saħħa fiha dan il-Gvern
suppost Soċjalista hija tal-biki. Għal snin twal kienu jikkritikaw kull
privatizzazzjoni li ssir, għax kienu jgħidu li dak li nbiegħ seta’ nbiegħ bi
prezz ogħla. Issa minflok jipprivatizzaw u ndaħħlu l-flus, qed jipprivatizzaw u
min suppost ‘jinvesti’ nispiċċaw inħallsuh flok iħallasna.
Jew inkompetenza, jew korruzzjoni maħduma.
M’hemmx raġunijiet oħra.
Dan l-artiklu deher fil-Mument tal-Ħadd 21 ta' Jannar 2018.
Comments
Post a Comment