F’intervista li ta lill-Commercial Courier u li ġiet pubblikata din
il-ġimgħa, id-Deputat Laburista Luciano Busuttil ħabbar illi mhux ser ikun qed
jikkontesta l-elezzjoni ġenerali li jmiss (ara hawn).
Ir-raġunijiet li ta fl-artiklu huma illi jħoss illi biex tkun fil-politika trid
tħallas prezz qares wisq. Qal li “xejn m’għadu jinħass importanti. Li ma tarax
lil uliedek jikbru, tkun trattat b’disprezz għax li tkun politiku hija meqjusa
li int korrott, li tgħaddi minn ħafna gideb dwarek u agħar minn hekk dwar
il-familja tiegħek, li tkun trattat ta’ prostituta għal voti b’ħafna theddid
mill-kostitwenti, biex insemmi ftit, jgħinuk tagħraf li l-ħajja hija ħafna
iktar prezzjuża minn siġġu aħdar skomdu.”
Tħares lejha mingħajr ma tkun taf minn għand min ġejja, hija stqarrija li
fiha x’tomgħod. Ħafna mill-affarijiet li jsemmi huma realtà li jgħaddu minnha ħafna politiċi. Imma mbagħad niftakru ftit l-ironija ta’
kif ġab ruħu għal ħafna drabi Luciano Busuttil.
Dan kien l-istess Deputat li uża l-pożizzjoni tiegħu biex ġab blue badge ħalli l-mara tiegħu tkun
tista’ tipparkja l-karozza f’parkeġġi riżervati għal persuni b’diżabilità. U meta ġiet mistoqsija
fuqha, kienet qalet li iva, inħarġitilha blue
badge li tinħareġ biss lil persuni bi problemi ta’ mobilità, minkejja li
dejjem bit-takkuna.
Skont rapporti li kienu deheru fil-media, wara li l-mibkija Daphne Caruana
Galizia kienet żvelat din l-istorja, il-Pulizija kienu ħadu passi u irtiraw dan
il-permess li kien inħareġ b’mod abbużiv.
Diffiċli tilgħabha tal-vittma u nemmnuk meta kont użajt il-pożizzjoni
tiegħek biex tieħu parkeġġ minflok persuni b’diżabilità, dan kollu biex il-mara
ma tbatix miexja bit-takkuna.
Busuttil gerger ukoll fuq kif kien qed jipprostitwixxi ruħu għal voti.
Jaħasra hux. Membru tal-Gvern li ta aktar minn ħames mitt impjieg mal-Gvern
fix-xahrejn ta’ qabel l-elezzjoni (ara hawn),
li ta mitejn u għoxrin impjieg mal-Water Services Corporation fl-istess
xaharejn skont artiklu li deher proprju din il-ġimgħa (ara hawn), li jmexxi bil-mentalità li kull vot għandu prezz li tista’ tixtrieh, issa qed igerger li n-nies
imorru għandu biex ibiegħu l-vot għal ħaġa jew oħra. Sadattant, l-istess
Luciano biegħ is-silenzju u l-appoġġ tiegħu għal daqsxejn ta’ pożizzjoni komda
komda jmexxi Sports Malta, qasam li żgur m’għandu l-ebda mertu, esperjenza jew
kwalifika fih. X’ironija dan Luciano hux?
Aħjar Luciano Busuttil jgħidilna x’qiegħed joħloq din il-firda kollha
fil-Partit Laburista. Lilu forsi xtraw is-silenzju u l-appoġġ tiegħu
bil-pożizzjonijiet, imma waħda wara l-oħra, il-qsim issa qed jidher ċar minn
kulmin isegwi l-politika. Mhux ta’ b’xejn li l-Prim Ministru ħass il-bżonn li
l-Ħadd li għadda jfakkar li hu għadu l-Mexxej tal-Partit u beħsiebu jibqa’ hemm
għal naqra oħra mhux ħażin.
Dan l-artiklu deher fil-Mument tal-Ħadd 25 ta' Frar 2018.
Comments
Post a Comment