Xi ġranet ilu ġie pubblikat stħarriġ li jsir mal-Unjoni Ewropea kollha, magħruf bħala
Eurobarometer. F’dan l-istħarriġ saru sensiela ta’ mistoqsijiet lil dawk
intervistati, fosthom x’inhu l-aktar li qed jinkwethom f’pajjiżhom.
U x’inhu l-aktar
li qed iħasseb u jinkwieta lill-Maltin fuq pajjiżhom? Il-kriminalità. U dan b’kuntrast kbir mal-kumplament
tal-Ewropa. Għax filwaqt li l-medja fl-Ewropa hija ta’ 12% inkwetati dwar il-kriminalità, f’Malta din titla’ għal 45%. Erba’
darbiet aktar.
Ma niskantax.
Illum il-poplu Malti kultant iħossu ma jista’ jagħmel xejn quddiem ċertu
inġustizzji u serq, u fejn qabel kellu Korp tal-Pulizija li seta’ jserraħ rasu
minnu, illum għandu Kummissarju tal-Pulizija li hu magħruf biss
għall-inkompetenza tiegħu. Illum il-poplu Malti jara l-istituzzjonijiet li
suppost jipproteġuh mill-abbużi, u jarahom ma jagħmlu xejn, pupazzi f’idejn
Gvern li ħatafhom għal fini tiegħu. U jara l-mexxejja tiegħu, dawk li suppost
huma l-gwardjan tal-patrimonju u tal-ġid tagħna, u jaf li instabu jixxaħħmu u
jaħslu l-flus minn unit investigattiv iżda ma ttieħdu l-ebda passi fuqhom.
U hemm fattur
ieħor li qed iwassal għal dan it-tħassib dwar il-kriminalità, illi hu n-numru dejjem jikber ta’
barranin f’pajjiżna mingħajr mhu jsir biżżejjed investiment fil-Korp
tal-Pulizija biex dan iżid l-infurzar tal-ordni u sigurtà fil-pajjiż. Anzi, agħar minn hekk insiru nafu li
fl-istess Korp iddaħħlu Pulizija lura li kienu tneħħew minħabba kondotta
kriminali. U kien hemm minnhom li inqabad jixxaħħam f’post daqstant sensittiv
bħall-Ajruport Internazzjonali ta’ Malta, biex iħalli nies jidħlu f’pajjiżna
mingħajr ma jsiru l-kontrolli neċessarji ta’ sigurtà. Dawn l-affarijiet mhux qed jiġru
b’kumbinazzjoni. Qed jiġru frott il-politika tax-xejn mhu xejn li imbotta dan
il-Gvern, frott tad-deċiżjoni politika li biex jixtri l-voti ta’ nies li mhux
xieraq li jkunu fil-Korp, dan reġa’ daħħalhom lura fil-Korp.
It-tieni tħassib
kbir li għandhom il-Maltin skont dan l-istħarriġ infatti huwa l-immigrazzjoni.
32% semmew l-immigrazzjoni bħala l-aktar ħaġa li tħassibhom. Jidher iżda li dan
mhuwiex tħassib ispirat mir-razziżmu, imma mill-fatt li qed jiġu wisq barranin
jaħdmu f’Malta u l-effett li dawn qed iħallu. Infatti l-istatistika turi li fi
tliet snin il-popolazzjoni ta’ Malta żdiedet b’31,000 ruħ, kollha barranin.
Dan l-ewwelnett
qed jaffetwa l-kwalità tal-ħajja tagħna. Iżjed ma ssir densa l-popolazzjoni, iżjed jiżdied il-bini u
l-għafsa fuq l-ambjent naturali tagħna, u infatti l-ambjent jikkwalifika fit-tielet
post, bi 22% tal-Maltin imħassba fuqu. Iżjed jiżdied ukoll it-traffiku u
l-iffullar. Iżjed tiżdied l-għafsa fuq l-infrastruttura tagħna.
It-tieni effett
huwa wieħed ekonomiku. Ħafna mill-immigranti qed jiġu jagħmlu xogħolijiet ta’
kwalità baxxa u li jħallsu
pagi baxxi. Dan qed ikun ta’ għafsa fuq il-pagi tal-ħaddiema Maltin, għal fatt
li filwaqt li din iż-żieda ta’ ħaddiema qed tkabbar l-ekonomija, mhux tkabbar
il-flus fil-but ras għal ras, għax qed iżżomm il-pagi tal-Maltin baxxi.
Riċentament per eżempju, l-kumpanija tat-trasport pubbliku għamlet riklam
fil-Pakistan biex timpjega tliet mitt xufier għal Malta. Apparti li dan kien
riklam diskriminatorju kontra n-nisa u n-nies ta’ ċertu età, u li f’Malta ma kienx jitħalla jsir,
juri li l-importazzjoni ta’ ħaddiema li għandna huma fil-maġġoranza tagħhom
ħaddiema fuq pagi baxxi.
Mill-banda
l-oħra, dan qed joħloq għafsa kbira fuq il-qasam tal-proprjetà. Illum il-Maltin bilkemm għadhom
jaffordjaw fejn jgħixu f’pajjiżhom. Il-kera splodiet, u l-proprjetà tant għoliet li ħafna Maltin lanqas
joħolmu jixtru mqar il-flat tagħhom.
U nfatti
l-inkwiet l-ieħor huwa l-housing u
l-għoli tal-ħajja. Hawnhekk ukoll naqbżu lil ħafna pajjiżi Ewropej. U dan ġej
mill-fatt li filwaqt li f’dan il-qasam il-problemi qed jikbru, il-Gvern għamel
ħames snin mingħajr ma bena imqar appartament wieħed għal housing soċjali.
Dawn huma l-oqsma
fejn il-Gvern qed jonqos, bil-kbir. Dawn huma l-oqsma li l-Maltin qed
jinkwetawhom. U dawn ħa jkunu uħud mill-oqsma li l-Partit Nazzjonalista ħa jkun
qed jindirizza bi proposti konkreti u ta’ fejda għal kulħadd.
Dan l-artiklu deher f'In-Nazzjon tal-Erbgħa 28 ta' Frar 2018.
Comments
Post a Comment