B’għaġla liema
bħala, il-Gvern ressaq fi ftit ġranet abbozz ta’ liġi li jemenda l-Att Dwar
il-Protezzjoni tal-Embrijuni. Abbozz li huwa ċar mill-iżbalji ortografiċi u
f’ċertu każi kunfliġġenti li fih li sar ta’ malajr, u li sar biss biex il-Gvern
joħloq devjazzjoni fil-ġranet li fihom kien jaf li l-konsorzju ta’ ġurnalisti
tal-Forbidden Stories kien ser jiżvela aktar dettalji fuq il-korruzzjoni tiegħu
fil-proġett Daphne Project.
Il-Partit
Nazzjonalista huwa ċar fuq dan is-suġġett. Aħna Partit li nemmnu fil-valur
tal-ħajja u fid-dinjità tal-persuna
mill-konċepiment sal-mewt naturali tagħha. Aħna wkoll sensittivi għat-tbatija
li jgħaddu minnha l-koppji li jkollhom problemi ta’ infertilità, li nafu li jkunu lesti
jagħmlu minn kollox biex ikollhom l-ulied.
Huwa għalhekk li fil-Gvern, konna aħna li fl-2012 irnexxielna nsibu kunsens
unanimu f’dan il-pajjiż, wara snin ta’ konsultazzjoni u diskussjoni, biex
daħħalna l-ewwel liġi li irregolat is-servizz tal-IVF f’pajjiżna u rajna li dan
is-servizz jibda jingħata b’xejn mill-isptarijiet pubbliċi tagħna lill-koppji
li jkunu għaddejjin minn dawn id-diffikultajiet.
Pero’ konna qgħadna attenti li filwaqt li ngħinu lil dawn il-koppji,
inħarsu d-drittijiet ta’ kull embrijun li kien ser jiġi prodott u ta’ kull wild
li kien ser jitwieled. Dan billi assigurajna li kull embrijun kien ser jingħata
opportunità indaqs li jgħix, u kull wild kien ser ikun jaf min huma l-ġenituri
bijoloġiċi tiegħu għax kienu ser ikunu l-istess ġenituri prospettivi li jgħix
għandhom. L-uniku eċċezzjoni li saret kienet għal każ fejn l-omm, bejn iż-żmien
meta jiġi ffertilizzat il-bajd u ż-żmien meta jkun ser jiġi impjantat f’ġufha,
jiġrilha xi inċident jew diżgrazzja li minħabba fiha ma tkunx tista’ ssir
l-impjantazzjoni. Kien f’dan il-każ biss, fejn ma kienx hemm għażla oħra għax
inkella l-embrijun inkella kien imut, li bħala kontinġenza dak l-embrijun ġie
ffriżat biex meta l-omm terġa’ tkun f’kundizzjoni tajba, ikunu jistgħu jiġu
impjantati dawk l-embrijuni.
Dan l-abbozz li ressaq il-Gvern, jarmi għal kollox dan il-kunsens li kien
hawn f’pajjiżna, u jressaq prattiċi ġodda li anke pajjiżi liberali jew baqgħu
lura milli jdaħħlu, jew qed jerġgħu jaħsbuha biex ineħħu.
L-ewwelnett l-iffriżar tal-embrijuni b’mod ta’ għażla, u mhux aktar biss
f’kontinġenza. Dan ser joħloq stock kbir ta’ embrijuni ffriżati li jibqgħu ma
jingħataw il-ħajja qatt, li jkollhom fuqhom data ta’ skadenza li fiha jsiru
proprjetà tal-Gvern, taħt care-order
tal-Ministru. Din tarmi għal kollox d-dinjità tal-persuna umana fl-aktar stat vulnerabbli
tagħha. Il-Gvern qed jipprova jmewwet l-inkwiet li jqum minn din il-prattika
billi jgħid li dawn ser jingħataw għall-adozzjoni. Imma min ser jadotta
embrijun ta’ ħaddieħor meta faċilment jista’ japplika biex jagħmlulu tiegħu,
jekk hemm bżonn b’donazzjoni anonima ta’ sperma jew bajda kif tipprovdi din
il-liġi?
U hawn ngħaddu għat-tieni kwistjoni, dik tad-donazzjonijiet anonimi
tal-gameti. B’liema dritt niddeċiedu li noħolqu ġenerazzjoni ta’ tfal u
żgħażagħ li mhu ser ikollhom qatt id-dritt li jsiru jafu min huma l-ġenituri
bijoloġiċi tagħhom? Diversi pajjiżi li daħlu din il-prattika illum qed jerġgħu
jaħsbuha, għax hemm numru kbir ta’ individwi bi problemi psikoloġiċi ta’ nuqqas
ta’ identità għax ma jistgħu qatt jibnu u jsiru jafu l-għeruq tagħhom.
Il-Konvenzjoni tad-Drittijiet tat-Tfal issemmi b’mod ċar id-dritt li t-tfal
ikunu jafu l-ġenituri bijoloġiċi tagħhom, u aħna ser narmuha barra mit-tieqa.
Agħar minn hekk, il-Kummissarju tat-Tfal li suppost tkun tal-ewwel li tħares
dawn id-drittijiet, toħroġ stqarrija li fiha tigdeb u tqarraq meta tgħid li
dawn it-tfal ta’ 16-il sena jistgħu jsiru jafu min huma l-ġenituri bijoloġiċi
tagħhom. Mhux vera. L-abbozz tal-Gvern hu ċar li l-anonimità tad-donatur hija
mħarsa f’kull stadju. Ta’ 16-il sena l-individwu jista’ biss isir jafu
l-istorja medika tal-ġenitur bijoloġiku, iżda qatt l-identità tiegħu.
Apparti minn hekk, il-fatt li dan is-servizz ħa jkun provdut anke lil
persuni single, imur għal kollox
kontra l-kunċett tal-prokreazzjoni umana, li lkoll nafu li ssir bejn tnejn
min-nies u mhux minn persuna waħedha. Ser iwassalna biex ikun l-Istat stess li
joħloq ulied reġistrati b’unknown father.
U ma nikkumparawx din mal-adozzjoni. L-adozzjoni min persuni single u gay hija maħsuba biex almenu tipprovdi familja lil dawk li
m’għandhomx. Iżda huwa dritt tat-tfal li jitnisslu u kemm jista’ jkun jitrabbew
mill-ġenituri bijoloġiċi tagħhom.
L-aħħar punt huwa dwar il-maternità surrogata (surrogacy). Il-Kunsill tal-Ewropa ivvota b’mod ċar biex din
il-prattika tiġi abolita mill-Ewropa għax qed toħloq abbużi kbar, u qed
titratta l-mara bħala oġġett għal kiri. Pajjiż ħafna aktar liberali
bħall-Iżvezja, diġa’ għadda liġi li biha ma jippermettix iżjed din il-prattika
f’pajjiżu. Iżda aħna bravi. Aħna progressivi ħafna. Aħna mhux biss ħa ndaħħlu
s-surrogacy, iżda ħa ndaħħluha
mingħajr l-ebda termini jew kontrolli. It-termini u d-deċiżjonijiet fuq surrogacy, jgħid l-abbozz li ressaq
il-Gvern, ser jiddeċidiehom il-Ministru waħdu, b’avviż legali. Imma din
x’serjetà hi? U l-iktar ħaġa tal-iskantament hija li l-NGOs u Fondazzjonijiet
dwar id-Drittijiet tan-Nisa, fuq dan is-suġġett ma tkellmu xejn.
Huwa irresponsabbli u diżgustanti li l-Gvern juża’ dawn il-materji
sensittivi, jilgħab bil-ħajja tan-nies, biex sempliċiment jaljena n-nies
mill-fatti gravi li qed jiġu żvelati bħalissa. Il-pożizzjoni tal-Partit
Nazzjonalista hija ċara, aħna nemmnu f’IVF etika u li tirrispetta u
tissalvagwardja d-dinjità tal-embrijuni. Adrian Delia għamilha ċara wkoll li
meta nerġgħu inkunu fil-Gvern dawn l-emendi jiġu rtirati biex ikollna servizz
tal-IVF etiku, imma li nsaħħuh billi fost l-oħrajn naraw li l-mediċini
neċessarji għalih jiġu provduti b’xejn, xi ħaġa li sal-lum għadha ma ssirx.
Nappella lid-Deputati kollha tagħna, li għalkemm ġie irtirat il-Whip kif
il-Kap wiegħed li ser jagħmel fejn jidħlu materji ta’ sensittività morali,
isegwu l-pożizzjoni tal-Partit li wasalna għaliha wara seminar u diskussjoni
twila u miftuħa fl-Eżekuttiv, u jibqgħu jkunu vuċi għal dawk li huma l-aktar
vulnerabbli, għal valur tal-ħajja u għad-dinjità tal-bniedem.
Dan l-artiklu deher fin-Nazzjon tal-Erbgħa 25 t' April 2018.
Comments
Post a Comment