Ħafna drabi faċli
li biex wieħed jirbaħ il-voti, jew jikkuntenta lil sezzjoni ta’ nies għal
mument, ma jagħtix kas tar-riperkussjonijiet fit-tul u jwiegħed l-impossibli.
Basta fil-mument ikkuntentahom. Basta fil-mument ħadilhom il-vot.
Din hija
tentazzjoni li jaffaċċja kull politiku u kull Partit, iżda li nemmen li għandu
joqgħod attent ħafna milli jaqa’ għaliha għax faċli ttellfu l-kredibilità u għada pitgħada turta ħafna iżjed lil dawk
in-nies li jaraw li l-wegħdi li saru magħhom ma jitwettqux.
Huwa dak li qed
jiġri fl-ekonomija bħalissa. Għandna Gvern li qed ikabbar l-ekonomija b’rata
mgħaġġla, iktar milli hu normali, billi sempliċiment iżid il-popolazzjoni
bl-immigrazzjoni, mingħajr ma jara l-konsegwenzi li dan ser iħalli fil-futur: il-mod
kif qed jikber id-distakk bejn min għandu ħafna u min m’għandu xejn, u x’ser
ikun qed jiġri hekk kif din ir-rata tat-tkabbir fil-popolazzjoni tilħaq limitu.
U huwa dak ukoll
li ġara fil-każ tal-insib. Il-Qorti Ewropea tal-Ġustizzja ddeċidiet li l-insib
f’Malta għandu jieqaf. U għalfejn? Għax il-Gvern Laburista, fl-2014 u l-2015
fetaħ l-istaġun mingħajr ma applika d-deroga kif suppost. L-aqwa li għal dik
l-elezzjoni seraq il-vot tan-nassaba u wegħdhom li jistgħu jonsbu kemm iridu u għal
x’hiex iridu.
Issa x’ġara? Issa
eluf ta’ nassaba ser jispiċċaw ma jistgħux jipparttikaw id-delizzju minħabba
dik id-deċiżjoni mgħaġġla li ma tatx kas tal-konsegwenzi li ser tħalli ‘l
quddiem. Li kieku l-Gvern applika d-deroga kif suppost, u issodisfa
l-kundizzjonijiet kollha skont id-Direttiva Ewropea tal-Għasafar, li
tippermetti deroga għal numru żgħir ta’ għasafar u b’numru limitat ibbażat fuq
monitoraġġ tal-popolazzjoni, kieku forsi vera n-nassaba kienu jgergru għax ma
jistgħux jonsbu għal kollox, imma almenu kienu jkunu jistgħu jonsbu. Issa, għax
flok il-fidda wegħdhom id-deheb, spiċċaw ma jistgħu jonsbu xejn.
Issa li ntilfet il-kawża minħabba r-ras iebsa tal-Gvern, il-Partit Nazzjonalista
jerġa' jappella għal djalogu serju mal-Kummissjoni Ewropea u man-nassaba biex
insibu mod kif l-insib ikun possibbli b'mod sostenibbli u li jsir permezz ta'
pjan serju li ma jiksirx il-ħarsien tad-Direttiva Ewropea tal-Għasafar filwaqt
li ma jiġbidx aktar kundanni lejn Malta li minnhom jispiċċa jbati kulħadd.
Il-linja nazzjonali saret mistħija nazzjonali
Bħal kull ħaġa oħra li mess Konrad Mizzi,
l-Air Malta saret qassata. Mela l-ewwel mess l-enerġija, fejn il-pajjiż tilef
il-miljuni mill-ftehim tal-gass u mill-ftehim tal-fuels, biex sirna nafu li l-Ministru Mizzi u Keith Schembri daħlu
miljuni mill-commissions. Imbagħad
mess is-saħħa, fejn inbiegħu tliet sptarijiet, fosthom l-unika wieħed
f’Għawdex, lil nies li ma nafux min huma u li ħallewlna biss ħofra. Fejn marru
l-miljuni t’hawn għadna ma nafux. Issa mess lill-Air Malta, fejn deċiżjoni
ħażina wara l-oħra waslitha fi stat tal-mistħija, fejn ħadd ma għadu jafdaha, u
fejn qed issirilha ħsara kbira lir-reputazzjoni tagħha. Din il-ġimgħa erġajna
sirna nafu b’numru ta’ titjiriet li ma sarux, jew li telqu tard ħafna.
Mela l-ewwel il-Ministru Mizzi naqqas
il-flotta tal-Air Malta u kera ajruplani lil linji oħra. Imbagħad ħabbar numru
kbir ta’ rotot ġodda li l-Air Malta ma kellhiex biex taħdem, u spiċċat trid jew
tikri l-ajruplani hi jew tagħti t-titjiriet lil linji oħra, ta’ standards iktar
baxxi, b’detriment għall-passiġġieri, jew saħansitra tħassar it-titjiriet
tagħha.
Fl-istess ħin, l-Air Malta qed tagħti skemi
ta’ irtirar kmieni lil ħaddiema tagħha, b’offerti li jitilgħu anke
mal-€140,000. Wieħed jaħseb li dawn qed isiru għax għandha bżonn tnaqqas
il-ħaddiema imma le. Waqt li qed tagħti dawn l-iskemi, m’għandhiex biżżejjed
staff biex tħaddem it-titjiriet kurrenti tagħha, u qed tfittex li tħaddem iżjed
nies. Mela għalfejn qed tħallas lil ħaddiema ta’ esperjenza biex jitilqu? Forsi
biex noħolqu naqra postijiet x’nimlew qabel l-elezzjonijiet tal-MEPs tas-sena
d-dieħla?
Dik hi l-qassata kurrenti li qed jaħmilna
Konrad Mizzi, wara ż-żewġ qassati l-oħra fiż-żewġ setturi l-oħra li mess.
Il-problema hi li ta’ dawn il-qassatat, qed inħallsu aħna.
Dan l-artiklu deher fil-Mument tal-Ħadd 24 ta' Ġunju 2018.
Comments
Post a Comment