Din il-ġimgħa, l-Awtorità
Bankarja Ewropea ippubblikat
ir-rapport tagħha dwar il-Pilatus Bank u l-mod kif imxiet l-FIAU (Financial
Intelligence Analysis Unit), u għamlet ir-rakkomandazzjonijiet tagħha.
Ir-rapport sħiħ jinsab aċċessibli fis-sit tal-EBA f’dan il-link.
Ir-rapport huwa
wieħed ċar u li jikkonferma dak kollu li ilu jgħid il-Partit Nazzjonalista dwar
in-nuqqasijiet tal-FIAU u n-nuqqas ta’ azzjoni li ttieħdet fil-konfront
tal-Pilatus Bank. X’inhuma l-konklużjonijiet ta’ dan ir-rapport ta’ din l-Awtorità Ewropea?
Din l-Awtorità
bdiet tinvestiga l-mod kif l-FIAU
mxiet mal-Bank Pilatus wara l-kontroversja li qamet meta ġew ippubblikati rapport
moħbija tal-FIAU li kienu jikxfu kif in-nuqqasijiet li l-investigaturi kienu
sabu fil-Bank b’xi mod jew ieħor pruvat jitgħattew flok jiġu investigati.
Il-Bank allegatament kien involut biex jingħaddew kickbacks f’kontijiet ta’ nies esposti għal politika, kemm Maltin
kif ukoll barranin, u li kien qed iżommu id-dikjarazzjoni ta’ fiduċja li kienet
tgħaddi l-pussess tal-kumpanija fil-Panama Egrant
lil Michelle Muscat, mart il-Prim Ministru.
Il-Bank kien
ingħata liċenzja mill-MFSA fl-2014, u kienu saru investigazzjonijiet fil-post
kemm mill-MFSA u kemm mill-FIAU. L-ewwel kien ġie mċanfar mill-FIAU li
f’rapport moħbi kkonkludiet li kien qed jikser id-direttivi. Imbagħad f’rapport
aktar tard l-FIAU kienet qalet li kollox ġie solvut.
Fl-investigazzjoni
tagħha dwar dan l-Awtorità Bankarja Ewropea sabet “nuqqasijiet ġenerali u sistematiċi” fil-mod kif
l-FIAU f’Malta applikat id-direttivi ta’ kontra l-ħasil tal-flus fil-konfront
tal-Bank Pilatus.
Sabet li l-FIAU
lanqas biss żammet rekords li juru x’dokumenti kienet investigat fiż-żjarat
tagħha, hekk li ma tafx x’ġie investigat u dwar min.
Sabet li
d-diskussjonijiet tal-Kumitat tal-FIAU mhumiex dokumentati u raġunati, hekk li
ħadd ma jista’ jifhem b’liema konklużjonijiet ġie deċiż li jingħalaq il-każ
dwar il-Bank.
Sabet li l-FIAU
aċċettat mingħajr l-ebda mistoqsija li tinvestiga biss affarijiet żgħar li
tqajmu fl-ewwel żjara, u ma tinvestigax nuqqasijiet oħra li kienu ġew innutati.
Sabet li l-FIAU
ma għandha l-ebda dokumentazzjoni li turi kif waslet biex tikkonkludi li ma
kellha timponi l-ebda sanzjoni jew miżura kontra l-Bank Pilatus.
U mbagħad l-Awtorità għamlet numru ta’ rakkomandazzjonijiet,
fosthom:
- Li l-FIAU tieħu l-azzjonijiet neċessarji biex tiġi konformi mad-Direttivi ta’ Kontra l-Ħasil ta’ Flus
- Li l-FIAU ttejjeb il-mod kif teżamina r-riskji ta’ Ħasil ta’ Flus u Finanzjament tat-Terroriżmu fis-settur finanzjarju
- Li l-FIAU tistabilixxi proċess ċar u dokumentat biex iżżomm din l-eżaminazzjoni aġġornata
- Li tara li jkollha r-riżorsi neċessarji biex twettaq dmirha f’settur li kiber ħafna u sar aktar kumpless
- Li jkollha proċessi interni u robusti biex twettaq is-superviżjonijiet meħtieġa u żżomm rekords ta’ xogħolha
- U li tinforma lil din l-Awtorità x’passi ser tkun qed tieħu fi żmien għaxart ijiem.
U x’kienet s’issa
r-risposta tal-Gvern u l-FIAU? Li diżappuntati b’dawn il-konklużjonijiet, u li
ma taqbilx mal-proċess ta’ din l-investigazzjoniji.
Dan ir-rapport
huwa wieħed li jħammar wiċċ pajjiżna u li għamel ħsara kbira lis-settur u
lir-reputazzjoni tagħna bħala ġurisdizzjoni finanzjarja ta’ fiduċja. Din
il-ħsara ma hu responsabbli għaliha ħadd ħlief il-Gvern u l-FIAU, li tnawwru
biex jgħattu l-attività
kriminali ta’ membri tal-Gvern stess u tal-ħbieb tagħhom.
Fid-dawl ta’ dan
il-Partit Nazzjonalista talab l-inqas ħaġa li wieħed jistenna f’sitwazzjoni
bħal din: li tintrefa’ r-responsabbilità politika minn min poġġa f’riskju settur daqstant importanti. B’mod
partikolari mill-Ministru Edward Scicluna li flok ma ħa azzjoni, kien prova
jkisser il-kredibilità
tar-rapporti tal-FIAU, u flok attakka lill-kriminali, attakka lil min kixifhom.
L-istess
responsabbilità trid
tinterfa’ mill-Kummissarju tal-Pulizija, li qalilna li “m’hemm xejn
x’jinvestiga”, u mill-Avukat Ġenerali, li naqas li jieħu azzjoni dwar dawn
ir-rapporti kif titlob minnu l-liġi. Dawn it-tnejn issa ġew imgiddba u l-pajjiż
ma jista’ jibqagħlu l-ebda fiduċja fihom.
U l-istess
responsabbilità għandha
tintrefa’ mill-Prim Ministru, li kien il-bniedem li bis-saħħa tiegħu ħarab minn
Malta s-sid tal-Bank Pilatus, telqet titjira lejn Dubai u l-Azerbaijan
fl-istess lejl, u rrifjuta li tinfetaħ inkjesta qabel kulma kellu jitgħatta u
jaħrab jirnexxielu jitgħatta u jaħrab. Għax wisq probabbli, kien l-aktar wieħed
li kellu x’jitlef minn dan kollu.
Dan ir-rapport jikkonferma wkoll li l-Gvern għal dawn
l-aħħar snin iddefenda lil min wettaq atti kriminali, u keċċa u ppersegwita lil
min kixef il-korruzzjoni, kixef l-azzjonijiet, u xtaq li ssir ġustizzja.
Quddiem dan ir-rapport, il-Gvern mhuwa xejn ħlief kompliċi mal-kriminalità u
mneżża’ minn kull awtorità
morali u kredibilità biex
imexxi.
Dan l-artiklu deher fir-rubrika Cyberspace tal-Ħadd 17 ta' Lulju 2018
Comments
Post a Comment