Tiskanta, kull
ġimgħa toħroġ xi aħbar li tħallik bla kliem. Mela ftit tax-xhur ilu konna
nisimgħu spiss bi droga li tinstab fil-ħabs, u rapporti dwar droga li tiġi
traffikata b’mod regolari fost il-priġunieri. Dil-ġimgħa smajna b’oħra ġdida.
In-Nazzjon żvelat kif mill-Qorti sparixxew ħmistax-il blokk tal-kannabis li
suppost jiffurmaw parti mill-atti tal-Qorti, u li kellhom jintużaw bħala
evidenza f’ġuri.
Ħmistax-il blokka
mhumiex pillola waħda jew tnejn. Huma ammont kbir, li ma sparixxiex
kumbinazzjoni jew għax intilef, jew għax tpoġġa f’post jew f’ieħor. Fuq dan
infatti infetħet inkjesta immexxija minn Maġistrat.
Li jqajjem ħafna
dubji hu kif kumbinazzjoni, f’ġuri ieħor li sar fl-2012 relatat mal-istess
sejba tad-droga, il-Prosekuzzjoni għamlet ħafna żbalji banali li waslu biex
l-akkużat spiċċa inħeles bl-inqas danni possibbli. Dawn id-dubji u dawn
il-kumbinazzjonijiet iwaslu lil ħafna jistaqsu jekk hux vera li l-ġustizzja
hija għamja u ma tħarisx lejn uċuħ, jekk hux vera li l-liġi hi l-istess għal
kulħadd.
Issa sirna nafu
li apparti dawn il-ħmistax-il blokka kannabis, naqsu wkoll ammont ta’ pilloli ecstasy marbuta ma’ każ ieħor. Hija
possibbli f’dan il-pajjiż li lanqas fil-Qrati, u fl-istrong-room ta’ din
l-istituzzjoni tant importanti, ma għad hemm serjetà u ma għadniex nistgħu nafdaw li l-affarijiet jitmexxew sew?
Il-Gvern min-naħa
tiegħu ma tantx jidher għandu ħeġġa biex iżidilna l-fiduċja fil-Qrati. Ħatar
tliet imħallfin u tliet maġistrati, numru żgħir meta l-każi li hemm pendenti
juru li hemm bżonn ta’ aktar, u meta l-Gvern għandu l-fakultà jappunta sa ħames imħallfin oħra. Biex tgħaxxaq
pero’, ċertu ħatriet ikomplu jikkonfermaw dak li qed jgħidu ħafna, li l-Qrati
qed jiddawru f’każin Laburista. Apparti li fil-ħatriet ta’ dawn l-aħħar ħames
snin rajna l-ex-Deputat Mexxej, ex-Editur tal-gazzetta, u ex-kandidati
tal-Partit Laburista jinħatru proprju meta għadhom lanqas ħarġu minn attività partiġġjana, issa għandna
Gvern li anke jisfida l-istess Kumitat għal Ħatriet fil-Ġudikatura li ħatar hu
stess.
Dan il-Kumitat ma kienx irrakkomanda n-nomina tal-Maġistrat Consuelo Scerri
Herrera, oħt il-Ministru Herrara, għal Imħallef, meta din kienet tressqet
mill-Gvern, minħabba l-imġieba xejn dekoruża tagħha. Anzi, ftit qabel l-istess
Maġistrat kienet qalet ċanfira mill-Kummissjoni għall-Amministrazzjoni
tal-Ġustizzja.
X’għamel il-Gvern? Sena wara, reġa’ ressaqha, ġie jaqa’ u jqum
mill-Kumitat, u appuntaha Imħallef. U jekk anke l-Gvern jiġi jaqa’ u jqum mill-istituzzjonijiet,
anke dawk maħtura minnu stess, kif nistennew li l-poplu jirrispettahom? Mhux
bilfors li allura fil-pajjiż tkompli tiżdied il-kultura tax-xejn mhu xejn, ta’
kollox jgħaddi, ta’ kollox xorta?
Fl-istess ħatriet, il-Gvern tella’ għal Imħallef lill-Maġistrat Anthony
Vella, il-Maġistrat li kien qed imexxi l-inkjesta fil-qtil ta’ Daphne Caruana
Galizia. Mingħajr ma nnaqqas xejn mill-mertu tal-Maġistrat Vella, naħseb
iż-żmien li fih ingħatat din il-promozzjoni mhuwiex għaqli, għax ifixkel din
l-investigazzjoni hekk kif il-Maġistrat irid jgħaddi kollox lil Maġistrat
ieħor. Insomma, forsi aktar mhux għaqli, dan kien pass intenzjonat. Forsi hawn
min vera għandu interess li jfixkel din l-investigazzjoni.
Dik hi r-realtà li qed ngħixu fiha. Pajjiż
fejn il-liġijiet u l-istituzzjonijiet, jintużaw u jiddawru għal skopijiet
politiċi. Fejn il-liġi ma tapplikax l-istess għal kulħadd u fejn il-ġustizzja
ma titħalliex għamja. U fejn id-drogi, għal kuntrarju tal-kriminali, jidħlu
l-ħabs, u jaħarbu mill-Qrati.
Dan l-artiklu deher fin-Nazzjon tal-Erbgħa 4 ta' Lulju 2018.
Comments
Post a Comment