Ilbieraħ
tħabbret tilwima industrijali oħra, wara dik tal-infermiera u l-qwiebel, issa
jerġa’ jmiss lill-għalliema. Niftakru li l-għalliema kienu diġa’ rreġistraw
tilwima industrijali mal-Gvern minħabba l-paga miżera li għadhom jitħallsu, li
qed twassal biex numru kbir ta’ għalliema jitilqu mill-professjoni filwaqt li
ftit huma dawk li qed jagħżlu li jibdew jaħdmu f’dan is-settur daqstant
importanti għat-tfassil tas-soċjetà ta’ għada.
Dak iż-żmien, Novembru li għadda, il-Prim Ministru Joseph Muscat u l-Ministru
tal-Edukazzjoni Evarist Bartolo kienu ħabbru li ser jagħtu lill-għalliema
“l-aqwa pakkett finanzjarju li qatt ingħataw”, kienu sejħulu “ftehim storiku
għall-għalliem tagħna, qalu li ser jaraw “żidiet ta’ 20%”. L-għalliema semgħu
ħafna kliem sabiħ, li wegħduhom kundizzjonijiet aħjar u pagi aħjar biex aktar
żgħażagħ jitħajjru jidħlu għal din il-professjoni u aktar għalliema jibqgħu
f’din il-professjoni.
Iżda fil-verità, issa li ħafna għalliema raw l-ewwel payslips biż-żidiet il-ġodda,
x’irriżulta? Irriżulta li f’dan “l-aqwa żmien”, iż-żidiet li ingħataw lil ħafna
minn dawn in-nies li f’idejhom hija fdata l-edukazzjoni ta’ uliedna u
tal-ġenerazzjoni ta’ għada, kienu żidiet miżeri ta’ anqas minn €50 fix-xahar.
Iż-żieda li ħadu 400 għalliem f’xahar, ħaditha waħedha Deborah Schembri
f’konsulenzi kull xahar mill-elezzjoni ‘l hawn biex Joseph Muscat iżommha
kuntenta. Dawn huma l-aqwa żidiet, l-aqwa pakkett finanzjarju, fl-aqwa żmien,
għal wieħed mill-aktar setturi importanti.
Issa l-għalliema qed jirreġistraw tilwima industrijali oħra, pero’ din
id-darba mhux fuq il-pagi u l-kundizzjonijiet. Din id-darba hi fuq xi ħaġa
aktar bażika, fuq il-mod kif jiġi stampat il-materjal li jkollhom bżonn jużaw
fil-klassijiet.
Fuq dan kont tkellimt fi djalogu tal-Partit f’Mejju li għadda, meta
l-Gvern kien beda proġett pilota fejn bih, l-għalliema kellhom jużaw biss
l-Istamperija tal-Gvern biex jipprintjaw il-materjal li jużaw fil-klassijiet.
Kull photocopy, kull handout, kull riżorsa, kellha tiġi
mgħoddija lill-Istamperija tal-Gvern ġranet qabel biex tiġi stampata hemmhekk.
Dan ħoloq diffikultajiet kbar għal ħafna għalliema. Tilfu parti sew
mill-awtonomija professjonil tagħhom u tal-iskejjel infushom, u naqqsitilhom
il-possibilità li jadattaw il-materjal skont iċ-ċirkustanzi tal-ġurnata u
l-abbilitajiet tal-istudenti li jkollhom quddiemhom. Fl-istess żmien li l-Gvern
qed jimbotta edukazzjoni iktar individwali, b’tagħlima aktar differenzjat skont
l-abbilitajiet tal-istudenti, jrid fl-istess nifs ixekkel il-mod kif l-għalliema
jadattaw il-lezzjonijiet tagħhom, li kultant ikollhom bżonn jagħmluha anke
fil-ġurnata stess. Dan filwaqt li lanqas biss ser ikollhom kuntatt ma’ min ikun
qed jagħmlilhom ix-xogħol, u lanqas biss ser ikunu infurmati meta u x’ħin dan
ix-xogħol ser ikun lest u ser jaslilhom.
Waqt il-proġett pilota f’numru żgħir ta’ skejjel, kienu inħolqu diversi
diffikkultajiet, fosthom li l-istamperija mhux dejjem laħqet max-xogħol. Wieħed
kien jaħseb li l-iskop tal-proġett pilota kien biex jekk jinqalgħu
diffikultajiet, il-metodu jitbiddel jew tinstab soluzzjoni oħra.
Iżda le, il-Gvern iddeċieda li b’arroganza sfaċċata jibqa’ għaddej.
X’jimpurtah mid-dinjità tal-għalliema. X’jimpurtah mid-diffikultà ġdida li ħa
jlaqqagħhom magħha kuljum. L-aqwa li tgħaddi tiegħu. L-aqwa, li issa kull biċċa
karta li titqassam fl-iskejjel tiġi stampata fl-Istamperija tal-Gvern.
Iżda ara taħsbu li din għandha x’taqsam mal-fatt li t-tenders tal-karti
u l-makkinarju tal-Istamperija tal-Gvern fl-aħħar 4 snin ħadithom kollha
l-kumpanija Kasco ta’ Keith Schembri. Dik biss kumbinazzjoni tafux.
Fl-aqwa żmien, anke l-edukazzjoni ta’ wliedna spiċċat għodda biex
iħaxxnu bwiethom. Għax ma tmurx il-Kasco jitlef xi ewro. Ma tarax. Flok nużaw
l-edukazzjoni biex insaħħu u ntejbu t-tagħlim, nużawha biex inżidu l-profitti
tal-ftit. Bil-paroli nitkellmu fuq “l-aqwa kundizzjonijiet għall-għalliema”,
waqt li bil-fatti naħdmu għall-aqwa kundizzjonijiet għal Kasco.
Almenu dawn il-profitti jidhru nodfa, u ma jkollux għalfejn joqgħod
jaħsilhom b’kumpaniji l-Panama u d-Dubaj biex jużahom. Ovvjament, ftit
jimpurath li din issir a skapitu tal-għalliema u l-istudenti tagħna. Dawk
sekondarji. Dawk oġġetti għall-użu tiegħu.
Dan l-artiklu deher fin-Nazzjon tal-Erbgħa 18 ta' Lulju 2018.
Comments
Post a Comment