F’Mejju li
għadda, meta bdiet tiżdied il-pressjoni fuq is-sistema ġdida ta’ kif qed
jinħarġu l-kontijiet tad-dawl u l-ilma u kif din qed twassal biex ħafna nies
jinsterqu, il-Prim Ministru Joseph Muscat kien qal li għaddej proċess biex
jirrevedu x’qed jiġri.
Issa, proprju
ġimgħa ilu, Il-Ministru tal-Enerġija Joe Mizzi ħabbar li minkejja din
ir-“reviżjoni”, mhu ser jinbidel xejn mis-sistema ta’ kontijiet pro-rata ta’
kull xahrejn, is-sistema li qed twassal biex ħafna nies iħallsu żżejjed
minħabba li l-kontijiet ikunu aktar frekwenti u ma jkollhomx ċans biex
l-allokazzjoni ta’ xahar ipatti għaliha xahar ieħor.
L-iskuża li ġab
Joe Mizzi għala ser tinżamm din is-sistema hija li jrid jiżkuraġġixxi n-nies
milli jaħlu. Irid jinċentiva n-nies biex joqogħdu iżjed attenti minn kemm
jikkunsmaw. Anzi, qal Mizzi, b’dan il-mod qed iħaddmu l-prinċipju tal-“polluters pay principle”, jiġifieri min
iħammeġ l-aktar iħallas l-aktar.
Din l-asserzjoni
ta’ Mizzi hija xejn altru milli redikola. Is-sistema li qed tħaddem l-ARMS
bil-kontijiet frekwenti ma tippenalizzax lil min jaħli, imma lil min juża’
d-dawl u l-ilma b’mod irregolari u mhux bl-istess ammont kull xahar.
L-allokazzjoni tat-tariffi minnha nnifisha diġa’ timplimenta l-“polluters pay principle” (PPP), għax ir-rata
tat-tariffi togħla iżjed ma tuża’ (jibdew bit-10ċ5 kull unit u jekk tuża’ ħafna
tista’ titlagħlek sa’ 64ċ kull unit). Meta l-kwota ta’ kemm għandna b’kull
tariffa tinqasmilna kull xahrejn din ma ssaħħaħx il-prinċipju tal-PPP, imma
tippenalizzak jekk il-kwota tiegħek dan ix-xahar ma tużahiex u tużaha xahar
ieħor.
Din mhi xejn
ħlief inġustizzja. Għalfejn jekk jien u int it-tnejn f’sena nikkonsmaw l-istess
ammont ta’ enerġija, imma għax jien ma nużax l-istess ammont kull xahar għandi
nħallas ħafna iżjed minnek? It-tnejn qed niswew lil Enemalta l-istess ammont
ta’ flus, it-tnejn qed naħlulha l-istess ammont ta’ fuel, it-tnejn qed nużaw l-infrastruttura tagħha bl-istess mod.
Iktar minn hekk, l-avviż legali li jirregola t-tariffi jitkellem ċar, dawn
għandhom ikunu ibbażati fuq “il-konsum kumulattiv annwali”. U allura ħalli jiġi
l-kont kull xahrejn biex jgħin il-cash-flow
tal-Enemalta, imma fl-aħħar tas-sena għandu jkun hemm mekkaniżmu li bih
jikkoreġi ħlas żejjed li jkun sar, bħalma jsir fit-taxxa tad-dħul. Hekk issir
ġustizzja.
Sfortunatament,
għalkemm dwar dan inġibdet l-attenzjoni kemm tar-Regolatur għall-Enerġija u
s-Servizzi tal-Ilma u kemm tal-Awtorità Maltija
għall-Kompetizzjoni u l-Affarijiet tal-Konsumatur, dawn l-istituzzjonijiet
qegħdin jonqsu milli jiddefendu lill-konsumatur Malti f’din il-kwistjoni.
Kwistjoni fejn jiddependi għal kollox minnhom minħabba l-fatt li kemm
l-Enemalta u kemm l-ARMS huma monopolju li ċ-ċittadin Malti ma jistax jgħaddi
mingħajrhom. Ma jistax għax qed jingħata servizz ħażin idur fuq alternattiva.
Għalhekk dawn huma regolati minn dawn l-istituzzjonijiet li suppost iservu ta’
tarka għaċ-ċittadin mill-abbuż. Iżda dan mhux jiġri.
Għaldaqstant
il-Partit Nazzjonalista qed ikun hu li qed ikompli jsegwi din il-kwistjoni. Ser
inkomplu l-ġlieda tagħna biex in-nies jinħarġulhom kontijiet ġusti li jsegwu
dak li jitlob l-avviż legali. Mhux biss, imma qed nikkommettu ruħna minn issa
li dawk kollha li insterqu minn din is-sistema jingħataw flushom lura. Inutli
tagħmel reviżjonijiet, imma mbagħad tiddeċiedi li ma tibdel xejn. Fejn hemm
il-ħażin irridu nirranġawh, u fejn iċ-ċittadin ġie misruq għandu jieħu lura dak
li hu tiegħu.
Comments
Post a Comment