Ir-Rigal tal-Ħajja

Din il-ġimgħa laqtuni numru ta’ stejjer koroh, anzi traġedji, li għalija juru kemm hi prezzjuża l-ħajja u kemm kultant ma nagħtux każ il-valur tagħha biżżejjed, anzi ġieli ma nagħtu kasha xejn.

Ħa nibda bl-iktar aħbar li naħseb ixxukjat nies: 120 immigrant jgħixu f’razzett tal-annimali f’Malta tas-seklu wieħed-u-għoxrin (ara hawn). Sitwazzjoni li spiċċaw fiha minħabbba l-eżaġerazzjoni fil-kirjiet tal-proprjetà flimkien mal-egoiżmu ta’ min għaraf kif jisfruttahom. Xi ħaġa mhix sejra tajjeb, għalkemm il-propoganda tgħid mod ieħor. Imma huwa fatt li fl-aqwa żmien ma tistennix li għad hawn min ikollu jgħix fejn maxtura mal-baqra u l-ħmara. Dawk kellhom ikunu biss ġrajjiet tal-passat.

Aħbar li niktet lil ħafna kienet il-fekruna rari u protetta li nstabet mejta qrib Għawdex. Fekruna tiżen 190 kilogramma u twila aktar minn metru u nofs, li rari daħlet fil-Mediterran (ara hawn). Annimal ta’ dak il-kobor, ta’ dak il-ġmiel, li ma jagħmel ħsara lil ħadd, li nstab mejjet minħabba l-egoiżmu u t-traskuraġni tal-bniedem. Għax ma mititx b’kumbinazzjoni, mietet minħabba l-plastik li belgħet mill-baħar, plastik li tefa’ hemm bniedem li ġie jaqa’ u jqum u flok rema fejn kellu jarmi, qabad u tefa’ fil-baħar. Dawn il-ġimgħat kienet għaddejja kampanja biex tħeġġeġ lin-nies meta jmorru l-baħar jiġbru tliet affarijiet tal-plastik milli jagħmlu ħsara lill-ħut u ħlejjaq oħra tal-baħar. Nittama biss li almenu din l-aħbar iżżid mal-kuxjenza li qed titqajjem.

Rajna wkoll l-każi li qajmu furur taż-żwiemel tal-karrozzini, fosthom taż-żiemel li allegatament tah attakk tal-qalb minħabba s-sħana waqt li kien qed iġorr karozzin fit-telgħa ħdejn l-Isptar Boffa. Ir-reazzjonijiet kienu diversi, fosthom ta’ min sejjeħ saħansitra biex jitneħħew il-karozzini mit-toroq (ara hawn).

Jien konvint li jekk hawn nies li jieħdu ħsieb iż-żwiemel u jaraw li jtuhom l-aħjar li jistgħu huma l-kuċċiera tal-karrozzini, għax għalihom iż-żwiemel mhumiex biss annimali imma l-mezz tal-għixien tagħhom. U allura li wieħed jippretendi li dawn jitneħħew għal kollox naħseb ikun qed imur għal miżura estrema. Pero’ importanti li jiġi assikurati li inċidenti bħal dawn ma jerġgħux jiġru, u naħseb fis-sħana tas-Sajf Malti, m’għandux jibqa’ permess l-użu ta’ dawn il-karrozzini b’mod partikolari fil-ħinijiet l-aktar prekarji ta’ bejn nofsinhar u l-erbgħa.

Matul dil-ġimgħa wkoll ġie rappurtat li passew minn Malta mat-tmintax-il ċikonja. Sfortunatament, bħalma jiġri spiss, aħbar bħal din tkun akkumpanjata ma’ aktar aħbarijiet dwar kemm minn dawn l-għasafar inqatlu. Sal-aħħar tal-ġimgħa, minn dawn it-tmintax jidher li inqatlu żgur ħamsa iżda jista’ jagħti l-każ li nqatlu iktar, hekk kif mill-grupp intlemħu biss sebgħa, li jfisser li probabilment inqatlu sitta oħra mingħajr ma rrappurtahom ħadd (ara hawn).

Hija ħasra li għad hawn numru mdaqqas ta’ kaċċaturi li jaħsbu li l-liġi ma tapplikax għalihom, li jaħsbu li jistgħu jagħmlu li jridu. Din il-kultura ta’ impunità issa rabbiet wisq l-għeruq f’sezzjonijiet sħaħ ta’ nies, u tkompli tikber iżjed mal-poplu jara l-impunità f’dawk li jmexxuh. L-infurzar anke hawn huwa laxk wisq.

U kif qed insemmu ċ-ċikonji, ma nistax ma nsemmix l-iktar ħaġa li żgur laqtitni mhux biss f’din il-ġimgħa, imma f’ħajti: it-twelid ta’ l-ewwel iben tagħna Jack nhar il-Ħadd li għadda. 

Forsi għalhekk matul din il-ġimgħa kont ħafna iżjed sensittiv għal aħbarijiet li jolqtu r-rigal tal-ħajja, għax kont qed nesperjenza dan ir-rigal mill-qrib. Ejja napprezzaw il-ħajja, ta’ kull bniedem u ta’ kull ħlejqa, u naraw li ngħożżuha, nagħtu sehemna biex nieħdu ħsiebha, u biex kull ħlejqa fid-dinja ikollha l-opportunità tgħixha bi kwalità.

Dan l-artiklu deher fin-Nazzjon tal-Erbgħa 15 t' Awwissu 2018.