Ftit tal-ġranet
ilu, l-aġenzija internazzjonali Standards and Poor’s niżlet ir-rating,
il-marka, li tagħti lil Malta fis-settur bankarju (ara hawn).
Dan id-downgrade, kif jgħid
ir-rapport tagħhom, hu attribwit l-iktar abbażi tar-rapport tal-Awtorità Bankarja Ewropea, li ikkonkluda li l-FIAU kien
qed jikser sistematikament id-direttivi ta’ kontra l-ħasil tal-flus, b’mod
partikolari bil-mod kif ġab ruħu mal-Bank Pilatus.
Fir-rapport
tagħhom, Standards and Poor’s jgħidu hekk: “fl-opinjoni tagħna,
l-allegazzjonijiet ta’ ħasil ta’ flus fuq il-Bank Pilatus, bank żgħir
internazzjonali ibbażat f’Malta, kif ukoll il-perċezzjoni tagħna ta’ nuqqas
kbir ta’ trasparenza f’xi banek oħra, żiedu r-riskji ta’ reputazzjoni u ta’
operazzjoni għas-settur bankarju Malti b’mod ġenerali.”
Dan ir-risku li
qed jaffetwa s-settur bankarju kollu hu biss frott tal-mod kif is-supervizjoni
u l-kontrolli fis-settur finanzjarju tħallew jonqsu u jiftaqru. Mhux bi
traskuraġni, imma b’mod sistematiku. Mhux għax hemm nies inkompetenti, imma
għax riedu li ma jkunx hemm kontrolli. Għax riedu li ċertu affarijiet jitħallew
isiru mingħajr ħadd ma jissorvelja fuqhom.
U għal dan mhu
responsabbli ħadd ħlief l-awtoritajiet suppost superviżjorji u investigattivi,
b’mod partikolari l-FIAU, l-MFSA u l-Pulizija, u min hu direttament
responsabbli minnhom, b’mod speċjali l-Ministru Edward Scicluna li ħalla dan
is-settur, li hu direttament responsabbli minnu hu, jieħu din id-daqqa
fir-reputazzjoni tiegħu.
Il-Ministru
Scicluna kellu reputazzjoni tajba. Kien meqjus bħala bniedem serju u
professjonali. Fil-5 ta’ April 2016 infatti, kien stqarr fil-Parlament li
l-Prim Ministru kellu bżonn jieħu deċiżjonijiet iebsa minħabba dak li ħareġ
fil-Panama Papers, biex iħares dawn is-setturi. Dawn id-deċiżjonijiet ma
ttieħdux. Il-Ministru nnifsu, spiċċa b’mod kompliċi biex jgħatti xtur sħabu
flok jissalvagwardja din l-industrija daqstant importanti. Għaldaqstant,
fid-dawl ta din id-daqqa ġdida fuq is-settur, għandu jkun il-Ministru Scicluna
nnifsu li jieħu d-deċiżjoni iebsa u jerfa’ r-responsabbilità politika għal għemilu, li
wassal għal dan id-downgrade.
Jgħaddi ż-żmien bin-nies
Il-Barts and London School of Medicine and Dentistry, li kellha tiftaħ
Għawdex sena u nofs ilu, ħabbret li ser tiftaħ ċentru ġdid tal-anatomija maġenb
l-Isptar Ġenerali ta’ Għawdex f’Settembru li ġej. Il-campus u l-faċilitajiet
ta’ Barts kellhom jinbnew mill-Vitals, fil-ftehim suspettuż li bih ħadu
f’idejhom tliet sptarijiet prinċipali tagħna.
Ftit xhur wara, dan il-ftehim kien inbidel u minflok Vitals kienu daħlu
Steward Healthcare, bil-Gvern jgħid li dawn ħa jieħdu fuqhom il-kundizzjonijiet
kollha li kellhom diġa’ Vitals. Vitals dak iż-żmien kienu ħadu €60 miljun
mill-Gvern Malti, u ħallew biss ħofra f’Għawdex flok is-suppost campus ġdid.
Issa Barts ħabbru li ser jinfetaħ dan iċ-ċentru ġdid, iżda minflok ċentru
ġdid mibni minn Steward, kif kien jitlob il-ftehim, dawn ħadu f’idejhom
ic-Child Development Centre li kien bena Gvern Nazzjonalista u ħa jkunu qed
jużaw lilu għal dan iċ-ċentru ġdid tal-anatomija.
Din m'hi xejn ħlief daħka f’wiċċ il-poplu Malti u Għawdxi. Mhux talli
l-poplu ma ħax dan iċ-Ċentru ġdid li kien miftiehem, iżda talli reġa’ tilef
investiment li kien sar fil-passat. Investiment li kien inbena bil-flus ta’
Eko-Għawdex biex jingħataw is-servizzi kollha li għandhom x’jaqsmu mat-tfal
minn binja waħda, ser jingħata lill-privat għal qliegħ tiegħu (ara hawn)
Dan hu aġir ieħor tal-mistħija, li jkompli jikkonferma kemm hemm ħmieġ
f’dan il-ftehim tas-saħħa li kien sar mal-Vitals u li mbagħad mexa għal
Steward. Min qed igawdi minn dan kollu, għadna ma nafux.
Dan l-artiklu deher fir-rubrika Cyberspace tal-Ħadd 12 t' Awwissu 2018
Comments
Post a Comment