Il-Ħamis li
għadda assistejna għal xeni li konna ilna ma naraw bħalhom. Grupp ta’ żgħażagħ,
mużiċisti, u attivisti ta’ diversi NGOs, marru l-bini tal-Awtorità tal-Ippjanar fejn kien qed jiltaqa’ l-Bord biex
jiddeċiedi dwar l-applikazzjoni tal-bini ta’ fuel station oħra b’art barra z-zona tal-iżvilupp, din id-darba
fiż-Żejtun qrib Bulebel. Zona fejn diġa’ hemm mal-ħames fuel stations qrib xulxin, u fejn l-art li saret l-applikazzjoni
fuqha hija art agrikola (ara hawn).
L-argument
tal-attivisti kien wieħed sempliċi. Għaddew disa’ xhur mindu l-Gvern wiegħed li
ser jirrevedi l-policy tal-Fuel
Stations. Policy li wasslet għal bini eżaġerat ta’ numru ta’ pompi tal-petrol
ta’ daqs enormi, kważi kumplessi sħaħ, ħafna drabi qrib ħafna ta’ xulxin.
Policy li qed teqred art agrikola, art barra z-zoni tal-iżvilupp, għal xi ħaġa
li huwa ċar li m’hawnx dan il-bżonn kbir għaliha. Speċjalment meta l-Prim
Ministru kien ħabbar li sa ftit għexieren ta’ snin oħra jrid li f’pajjiżna
jispiċċa l-użu ta’ karozzi jaħdmu b’dawn il-fuels. Viżjoni li tmur għal kollox
kontra din il-policy, u li tkompli
tikkonferma n-nuqqas ta’ pjanar fil-mod li qed jitmexxa pajjiżna.
Il-Pulizija
iddeċidew li jkaxkru l-barra b’użu ta’ vjolenza eċċessiva lil dawn
id-dimostranti, bil-konsegwenza li uħud minnhom sfaw feruti. Kien hemm bżonn
ta’ dan l-użu eċċessiv ta’ forza fuq nies li ma kienu tal-ebda theddida fiżika,
imma biss ta’ theddida fil-messaġġ li kienu qed iwasslu? Ma’ dawn iż-żgħażagħ
il-Pulizija kienu pronti jużaw il-forza u jieħdu azzjoni, meta għandna Ministru
ewlieni u c-Chief-of-Staff tal-Prim Ministru jiġru barra filwaqt li mad-dinja
kollha ġew pubblikati provi tat-tixħim tal-ħasil tal-flus li kienu qed
jorkestraw? Ma’ dawn, il-Pulizija għadhom ma ħassewx il-bżonn li jieħdu azzjoni
u jarrestawhom?
L-agħar ħaġa
f’dan il-każ kollu pero’ mihix l-użu tal-forza tal-Pulizija, imma r-reazzjoni
ta’ wħud minn ħutna Maltin. Ċertu Maltin iddeċidew li jikkundannaw lil dawn
l-attivisti li kienu qed jiddefendu lil pajjiżhom, u jiġġustifikaw dak li
għamlu l-Pulizija. Wħud tismagħhom jgħidu “Ħeqq ħaqqhom, għax m’obdewx
l-ordnijiet”. Imma x’mentalità servili tlajna fiha? Min qallek li int obbligat tobdi dejjem? Min qallek
li int għandek tbaxxi rasek għall-Awtorità u taċċetta dak kollu li ġej minn
fuq? Lanqas lil Pulizija m’għandek tobdi dejjem meta dak li qed jitolbok imur
oltre’ minn dak li ttih dritt li jordnalek il-liġi! U f’dan il-każ, l-attivisti
għandhom mitt elf raġun. L-ebda diskussjoni u l-ebda dimostrazzjoni ma waslet
lil Gvern jirranġa din il-policy għal
kollox żbaljata. U mhux billi l-Prim Ministru jipprova jilgħabha tal-eroj u
jikkundanna l-azzjoni tal-Pulizija, il-Prim Ministru għandu l-poter kollu li
jirranġa din il-policy li qed teqred
il-pajjiżna, imma għadu m’għamel xejn fuq. Ħajr lil dawn l-attivisti li tkellmu
f’isimna u kienu lesti jiddefendu lil pajjiżhom. M’hemmx patrijott akbar minn
dak li lest jiddefendi lil pajjiżu anke’ mill-Gvern tiegħu stess.
Dwar din il-policy il-Partit
Nazzjonalista diġa’ kien ċar, u ilu minn Jannar li għadda li sejjaħ għal
reviżjoni ta’ din il-liġi li qed twassal għal abbuż u għal qerda ta’ art
agrikola verġni għal faċilitajiet li l-bżonn tagħhom mhuwiex daqshekk
importanti (ara hawn).
Huwa quddiem abbużi bħal dawn li l-poplu Malti għandu jkun magħqud bħala poplu,
u mhux jeħodha kontra ħutu stess biex jiddefendi l-“arma” tal-Partit tiegħu.
Comments
Post a Comment