Din il-ġimgħa
tħabbar li l-iskola primarja l-ġdida fil-Qawra, li kellha titlesta fl-2017,
reġgħet ġiet posposta għal sena oħra. Kien tliet snin ilu li l-Gvern Laburista
kien ħabbar li kien ser jibni skola ġdida fil-Qawra għal popolazzjoni li f’San
Pawl il-Baħar issa qabżet l-20,000 ruħ. Din kellha tkun lesta sal-2017, u
kellha tinkludi parkeġġ, gym, futsal pitch
u żewġ courts tal-badminton (ara hawn)
Iżda waslet biex
tiftaħ is-sena skolastika 2018-2019, u l-Gvern ser jerġa’ jipposponi l-ftuħ ta’
din l-iskola li l-bżonn tagħha issa sar ħafna aktar kruċjali. Sar kruċjali
minħabba l-politika ta’ immigrazzjoni bla pjan tal-Gvern, li jidher li għalih
dan hu l-unika mod li jaf li bih ikabbar l-ekonomija. Jekk ser iżżid
il-popolazzjoni, għandek taħseb tal-inqas għall-iskejjel għal din iż-żieda.
Imma dan mhux isir. Mhux talli mhux isir dan, iżda l-Gvern lanqas qed iżomm
mal-pass ta’ Gvern Nazzjonalista li fl-edukazzjoni kien jiftaħ skola ġdida kull
sena u jżid l-investiment kull sena.
Il-frott ta’ dan
qed igawduh l-istudenti li llum jattendu l-Ħandaq, il-Verdala, il-Mosta,
Pembroke, in-Naxxar, Ħal Kirkop u Għawdex. Skejjel ġodda b’faċilitajiet moderni
u attrezzati minn kollox.
Iżda min-naħa
l-oħra, waqt li l-kanvaser tal-Ministru tal-Edukazzjoni komdu jlesti l-blokok
tal-appartamenti, il-Ministeru lanqas kapaċi jlesti skola ġdida waħda.
X’differenza bejn
minn verament l-edukazzjoni kien itiha priorità, u min għalih hija biss għodda biex iħaxxen butu.
Mhux biss l-iskola posposta, imma anke t-trasport tat-tfal
Kemm il-Partit
Nazzjonalista u kemm il-Partit Laburista fil-programm elettorali li għadda
wegħdu li t-trasport tat-tfal għall-iskejjel, anke dawk tal-Knisja u dawk
indipendenti, jibda jingħata b’xejn. Dan għal żewġ raġunijiet prinċipali:
l-ewwelnett biex jgħin lill-ġenituri fl-ispejjeż li jkollhom, u t-tieni biex
iħajjar iżjed ġenituri jibagħtu lit-tfal tagħhom bit-trasport organizzat biex
itaffu mill-problema tat-traffiku.
Ta’ min ifakkar
li din kienet ġiet issuġġerita mill-Partit Nazzjonalista tliet snin qabel, imma
l-Gvern dak iż-żmien irredikola din il-proposta u ħlejna issa erba’ snin mindu
din setgħet tibda tiġi prattikata.
Għalkemm din
kellha tibda minn din is-sena skolastika, ninsabu inqas minn tliet ġimgħat
bogħod mill-ftuħ tal-iskejjel, u kemm l-għalliema u kemm il-ġenituri għadhom
fid-dlam dwar x’ser jiġri, meta din kienet imħabbar fil-Baġit ta’ sena ilu.
Jidher li l-Gvern tant tnikker fuq din, u tant ma pjanax kif ħa jħaddimha, li
issa l-Ministru Bartolo spiċċa jgħidilna li l-ġenituri ħa jintalbu jħallsu huma
għat-trasport kif kienu jagħmlu dejjem, u imbagħad il-Gvern jirrifondi
l-ispejjeż (ara hawn).
Lanqas
fl-affarijiet li jwegħdu li ser iwettqu huma stess mhu qed jippjanaw, aħseb u
ara kemm qed isir pjanar fit-tul f’dak li qed jiġri fl-ekonomija tagħna, u
fir-riperkussjonijiet tal-politika ta’ żieda fil-popolazzjoni bl-immigrazzjoni
li qed iħaddem il-Gvern.
Dan l-artiklu deher fir-rubrika Cyberspace tal-Ħadd 02 ta' Settembru 2018
Comments
Post a Comment