It-Torri ta’ Babel
Ftit ġranet ilu ġie approvat il-proġett
tad-db Group fil-Bajja ta’ San Ġorġ f’San Ġiljan, bieb ma’ bieb ma’ djar
residenzjali f’Pembroke. Proġett b’riħa tinten ta’ korruzzjoni mill-bidu
sal-aħħar tiegħu.
Ibda biex il-mod kif ingħatat din l-art,
mingħajr ma nħareġ tender, lill-entità privata, għal prezz ridikolu (il-prezz
ta’ sular wieħed tal-proġett li qed isir). Imbagħad, ħallasna minn butna
mas-€60 miljun biex mexxejna l-ITS għal binja oħra fi Smart City,
b’inkonvenjent kbir għal mijiet ta’ studenti li issa tneħħew mill-qalba
taz-zona turistika li kienet ideali għall-istudji tagħhom, apparti li ser
nitilfu l-binja tal-ITS preżenti li suppost hija skedata. Issa, rridu nħallsu
miljuni oħra biex intejbu l-infrastruttura taz-zona biex tiflaħ għal proġett
bħal dan, fosthom toroq u l-famuż tunnel li mingħajru tinħoloq konġestjoni
massiċċa. Ħa nkunu qed nidfnu r-residenti ta’ Pembroke b’binja enormi, u se
ssir ħsara ambjentali indeskrivibbli.
Issa sirna nafu li ħallasna wkoll biex
bgħattna jet privat iġġib Malta lil waħda mill-membri tal-Bord biex tiġi
tivvota favur. Membru li falliet xi tletin minn sebgħin vot ieħor. Imma dan
kien importanti hux, ma tmurx ma jgħaddix!
Il-mistoqsijia quddiem proġett bħal dan mihiex
kemm marru tajjeb id-db, imma min ħa jsir miljunarju magħhom biex sar dan
it-tnawwir kollu. Xi Ministru? Dawk l-10 membri tal-Bord? Il-Partit Laburista?
Il-Prim Ministru?
Il-Prim Ministru issa qed jilgħabha
tal-iblah, u jipprova jikkonvinċina li ma jaqbilx mad-deċiżjoni tal-jet privat
għal membru tal-Bord. Bħallikieku mhux kulħadd jaf li dan kien proġett li ried
hu, li għadda l-art hu, li ried li jiġi approvat hu, li ivvutaw favurieh
il-membri tal-Bord nominati minnu, fosthom id-Deputat tiegħu. U meta kulħadd
jaf li spiċċajna ngħixu f’pajjiż fejn kull nitfa minn kull Dipartiment trid
tiġi infurmatha biha Kastillja, diffiċli nemmnu li ma kienx jaf bid-deċiżjoni
tal-jet privat minn qabel.
L-Oppożizzjoni għamlet kulma setgħet quddiem
l-abbużi ta’ dan il-proġett. Talbet l-Awditur Ġenerali jinvestiga
t-trasferiment tal-art, ivvutat kontra fil-Bord tal-Awtorità tal-Ippjanar,
ħadet sehem fid-dimostrazzjonijiet li saru mir-residenti, u permezz
tad-Deputati ta' dak id-Distrett resqet l-oġġezzjonijiet tar-residenti quddiem
il-Bord, u talbet inkjesta fuq din il-biċċa xogħol tat-titjira privata għal
membru tal-Bord.
Għalina r-resident u l-vulnerabbli, jibqa’
l-ewwel. Qabel il-flus u l-profitti. Iżda ngħixu f’pajjiż fejn il-flus saru
l-alla l-ġdid u fejn il-liġi ma għadhiex tapplika l-istess għal kulħadd.
Jittimbrawk b’miġnun
Storja li kexkxitni din il-ġimgħa hija
l-aħbar xokkanti li ħareġ is-sit Net News (http://netnews.com.mt/2018/09/27/storja-xokkanti-minn-monte-carmeli-impjegata-tinqafel-taht-constant-watch-ftit-jiem-wara-argument-ma-superjur-taghha/)
dwar impjegata fl-isptar Monte Karmeli illi għax kellha argument mas-superjur
tagħha, din ftit ġranet wara ġiet maqfula taħt constant watch fl-istess sptar bħala pazjenta mingħajr ma biss ra
psikjatra jew psikologu.
Dan hu każ
ċar ta’ abbuż, każ fejn xi ħadd uża l-poter tiegħu biex jintimida lil min hu
taħtu. Att barbaru u ta’ min jistmerru, u li għandu jwerwer lil kull wieħed u
waħda minna jekk jgħaddi qisu qatt ma kien xejn. Quddiem każ bħal dan għandha
ssir investigazzjoni serja, u dan is-superjur għandu mhux biss jitneħħa minn
postu iżda jiġi proċessat kriminalment. Dawn mhumiex affarijiet taċ-ċajt.
Dan
l-episodju jfakkarni f’episodju aktar kmieni fl-ewwel leġislatura ta’ Muscat,
fejn individwu li għamel protesta quddiem Kastilja dwar kif ġie trattat mill-Awtorità tal-Ippjanar spiċċa ttieħed f’Monte Karmeli għal ftit ġranet. Biex
jippruvaw jittimbrawh b’miġnun u jaqtgħu qalb kulmin jipprotesta.
Dakinhar ħafna għalqu għajnejhom. Iżda issa
qed naraw minn dik il-ftit abbuż fejn wasalna. Meta ddejjaqhom, jaqfluk. U jekk
jerġa’ ħadd ma jgħid xejn għal din l-impjegata, jispiċċa ħadd ma jgħid xejn
meta xi darba jmiss lilek.
Comments
Post a Comment